2 Piitar 3 - Ojibwe Kihcimasina'ikan

Ciisahs Christ aasha kekaa wiihpitakohshin

¹ Kaasaaki'inakook, mii hsa 'i 'owe aasha niishink (2) e'oshipii'amawinakook. Mii hsa tahsh kaakii'onci oshipii'amawinakook niishwaa cimaamihkawaaminakook ciamacihtooyaan kinaanaakatawentamowiniwaan kwayahk ci‑inentamek.

² Kinantawenimininim kaye cimaamihkawinotamek kaakii'ihkitowaatc iki kaakihtentaakosiwaatc mewisha kaakiihkanootamawaawaatc Kishemanitoon. Cimaamihkawiyek kaye otipaacimowin kaaTipenciketc kaaOpimaaci'iwemiyank kaakii'miiniminek otishinisha'waakana'.

³ O'o tahsh maawac iko mihkwentamok, ishkwaac anikakiishikahk taniayaawak pemaatisiwaatc ketipenimikowaatc omihsawencikewiniwaan. Miiwak hsa iki kepaahpinotawinekwaa.

⁴ Mii hsa tahsh keihkitowaatc: “Aaniin tahsh kaa'ishihsenik kaakii'ishi ahshotamaakekopanen ewiihpitakohshink? Inashke kikehteya'aaminaanik aasha kiihcaakinipowak, mii hsa ko peshikwan keyaapi pemi‑ishiwepahk kaakii'ishiwepahk kiioshihcikaatek o'o ahki,” taihkitowak.

⁵ Oncita piko e'waniihkenotamohshihtoowaatc, Kishemanitoon otihkitowininiink ekii'onciayaanik kihcikiishik mewisha, i'iweni kaye ahki nipiihkaank e'oncisaakipiinik, nipiini ekii'aapataninik kii'oshihcikaatenik ahki.

⁶ Mii hsa i'imaa nipiink kaakii'ishi nihkipacikaatekopanen i'i kehte ahki kaakii'ayaakopanen, mii 'imaa kaakii'ishi nihshiwanaacihcikaatek.

⁷ I'i tahsh kiishik, i'i kaye ahki noonkom kaa‑ayaakin, mii hsa peshikwan Kishemanitoo otihkitowinink wencikanawentaakwaninikin piciinak ewiihcaakisikaatenikin. Mii hsa kaaonci kanawentaakwahkin ewiihtako‑⁠nihshiwanaacihcikaatekin i'i ahpii Tipaahkonikewi Kiishikaninik, kaawii'nihshiwanaaci'intwaa iki kaakihtenimaahsikwaa Kishemanitoon.

⁸ Kaasaaki'inakook, keko tahsh wiin o'o awaac pankii waniihkenotankek, kaaTipenciketc e'inentank peshiko kiishik, mitaaswaahk tahsopipoon. Mii kaye mitaahswaahk tahsopipoon enentank peshiko kiishik.

⁹ KaaTipenciketc hsa kaawiin papeciihsii ewii'ishihciketc i'i kaakii'ishi ahshotamaaketc, taapishkoo kaaicikaniwitc ehpapeciitc. Kishashiipenimikowaa ohsha e'antawenimaahsik awiyan cinihshiwanaatisinitc. Kahkina hsa awiyan onantawenimaan cikwehkaatisinitc.

¹⁰ I'i hsa kiishikaninik kaaTipenciketc kaawiihtakohshink tasesakooci ocihcihse, taapishkoo okiimoocishk niiyaak kaakihkentaakosihsik ewiihtakohshink. Mii hsa tahsh i'i ahpii ishpimink kiishik keankonaakwahk kishiiwe noontaakwahk kekoon. Mii kaye i'i ahpii kahkina kekoonan ishpimink kaa‑ayaakin kaawii'nihshiwanaacihcikaatekin ishkote ewii'aapatahk. I'i kaye ahki, kahkina kaye kekoon i'imaa kaa‑ayaakin kaawiin takihkentaakwahsinoonan.

¹¹ O'owe tahsh inahke ewii'ishi nihshiwanaacihcikaatekin ono kahkina, aaniin itahsh kiinawaa kekii'ishipimaatisiyekipan? Mii iitok eshinaakwahk cipehkaatisiyek, cipakitinitisoyek kaye Kishemanitoo citipeniminek.

¹² Ehpiihtaawek kiishikaninik Kishemanitoo kaawiihtipaahkoniwetc, kakwe weyiipihtook wiipa ci‑ishihsek. Mii ohsha 'i ahpii kiishik kaawii'ankwaahkitek, kaawii'nihshiwanaacihcikaatek kaye. Ini kaye kahkina ishpimink kaa‑ayaakin taninkitewan keahpiihcikishitek.

¹³ Kaakii'ishi ahshotamaakekopanen itahsh kiinawint kaaoncipiihtooyank i'i kaawii'oshki oshihcikaatek kiishik, oshki ahki kaye, mii hsa 'imaa kwayahkwaatisiwin keshitaamakahk.

¹⁴ Taka tahsh, kaasaaki'inakook, ehpiihtooyek ono, aahkohcikek ahpii Kishemanitoo takohshink cimihkawinek ehpehkaatisiyek, kekoon kaye ci‑ishi anaamentaakosihsiwek, pisaan iko ciwiiciiwek.

¹⁵ Inentamowaahk itahsh i'i kaaTipenciketc eshishashiipentank, mii hsa 'imaa wenciik pimaaci'ikoowin. Taapishkoo kaasaaki'ankitc kiitanami'aanaan Pwaal (Paul) kaakii'ishipii'amawinek, ekii'aapacihtootc kakiihtaawentamowin Kishemanitoon kaakii'miinikotc.

¹⁶ Miitahsh peshikwan inahke eshipii'iketc kahkina otooshipii'ikanink onoweniwan kiitashintank. Ayaaniwan hsa aahpici kekoonan senakihtaakwaninikin otooshipii'ikanink. Miiwan hsa ini noociko kaa'inwehtoowaatc iki kaakakiipaatisiwaatc, kaakisihkawaatisihsikwaa. Mii hsa kaye entootamowaatc kotak kekoonan Kihcimasina'ikanink kaaishi⁠ayoshipii'ikaatenikin. Wiinawaa hsa kashkihtamaasowak nihshiwanaatisiwin.

¹⁷ Kiinawaa tahsh kaasaki'inakook! Aasha ehkihkentamek ono, ayaankwaamisik citako wanihshimihsinowekwaa kaaishiwayeshintisowaatc kaamaci ishiwepisiwaatc, cionci pankishinsiwek i'imaa kaaishi aayiicikaapawiyek.

¹⁸ Ishipimaatisik hsa ciani‑ishimaaciikiyek kitanami'ewaatisiwiniwaank, cinikihkenimek kaaTipeniminank kaaPimaaci'inank Ciisahs Christ. Taka wiin mooshak takihci inenimaa noonkom nehpic iko kaye. Emen.