2 ᑌᓴᓬᐆᓂᔭᓇᒃ 3 - Ojibwe Kihcimasina'ikan

Anami'ehtamawihshinaam e'inaatc

¹ Miinawaa tahsh kikakwecimininim, kaawiiciotepwehtamoomikooyek, anami'ehtamawihshinaam cimaaciishkaamakaninik kaaTipenciketc otipaacimowin, kayehsh cinikihci‑inencikaatenik taapishkoo kaye kiinawaa eshikihci‑inentamek.

² Kaye cipahpii'iyamintc a'a Kishemanitoo ekaa ciotihsaahsiwankitwaa iki kaasanakisiwaatc, iki kaye kaamaci‑ishiwepisiwaatc, ekaa kekoon citootawihsiyamintwaa. Aaniihsh kaawiin kahkina awiya otepwehtamowinihsii.

³ Tepwewiniwi tahsh a'a kaaTipenciketc. Mii 'awe kesoonkimashkawisii'inek kaye kemiitaakwenamawinek ini maciaya'aan.

⁴ Nintishi'ikonaan itahsh a'a kaaTipenciketc e'oncikwayahkwenimikooyek, aasha ekiihpi‑ishihcikeyek kaakii'ishiwiintamaakooyek kaye keyaapi ciani‑ishihcikeyek.

⁵ Maano tahsh kaaTipenciketc kikakihkino'amaakowaa peshikwan iko ci‑ishisaaki'iweyek taapishkoo wiin Kishemanitoo eshihciketc, kayehsh ci‑ishimashkawentamek taapishkoo kewiin Christ kaakii'ishimashkawentank.

Kahkina awiya ta‑anohkii cipami'itisotc

⁶ Kaawiiciotepwehtamoomikooyek! Kitishikakaansomikoom owiinsowinink kaaTipeniminank Ciisahs Christ: kikamanaawiiciiwaawaa awenen ihsa ko otepwehtamo kaawii'mihciontaaci'ikositc ehsaapianohkiihsik, ehpisintansik i'i kihkino'amaatiwin kaakii'wiintamaakooyek.

⁷ Kiinawaa aaniihsh weweni kikihkentaam cinaapihcikeyek kaakii'ishiwaapamiyaank. Kaawiin 'imaa ninkiihtashikihtimihsiimin kaaishiayaayek.

⁸ Kaawiin ninkiiwii'mihci⁠ahshamikoohsiimin. Kaye ehtipihkahk kaye ehkiishikahk ninkiihkihcianohkiimin, niinawint ninkiiwii'aapacihtoomin nintayishiiwininaanin ekaa ewiihkosikwii'ikoohsiwek.

⁹ Aanawiin ninkiihte⁠inentaakosimin cikiihpami'iyaankipan, shaakooc itahsh ninkii'anohkiihtamaasomin, kiinawaa cikihkinawaapamiyaank kaainaatisiyaank.

¹⁰ Mekwaa hsa ekii'wiiciayaamikooyek kikii'ishi⁠ayaankwaamimikoom: kiishpin awiya inentansik cianohkiitc, maano kaawiin tawiihsinihsii.

¹¹ Aaniihsh ninoontaamin aaninta e'ayaayek kaamihci⁠ayaanihsipimaatisiwaatc, e'mihcinoocihtamawaawaatc pahkaan awiyan otayintiwinini.

¹² Oko tino nintishikakaansomaanaanik kaaTipencikenitc Ciisahs Christan, koshkwaawaatisiwinink ci‑inanohkiiwaatc cipami'itisowaatc.

¹³ Kaawiiciotepwehtamoomikooyek! Keko poonihtoohkek kiminoanohkiiwiniwaa.

¹⁴ Kiishpin awiya kaawii'nehpici⁠pisintansik onoweniwan kaaishpii'amaank, kihkinawaatenimihk a'a ehtinowitc. Keko wiici'aahkek, ciakaci'ikotc otishihcikewin.

¹⁵ Keko wiin ishinawaahkek cishiinkenimek, aanciko kikakakiihkimaawaa, kiicishaaniwaa ci‑inakimek.

Opooshoo'iwewin

¹⁶ A'a kaaTipenciketc kaanihtaa miikiwetc koshkwaawaatentamowin, wiin iko tipinawe kikamiinikowaa mooshak, aaniiniko eshiwepisink. KaaTipenciketc kahkina kikawiiciiwikowaa.

¹⁷ Niin iko tipinawe nininc nintaapacihtoon e'oshipii'amaan o'o: Niin Pwaal kipooshoo'ininim. Mii ko 'iwe eshipii'ikeyaan.

¹⁸ Oshawencikewin kaaTipeniminank Ciisahs Christ mincikahkina kika‑ahshiciwiiciiwikom.