2 ᑌᓴᓬᐆᓂᔭᓇᒃ 2 - Ojibwe Kihcimasina'ikan

KaaMaamawimacaatisitc kepiayaatc

¹ Kaawiiciotepwehtamoomikooyek! Ninkawiihtashintaan aaniin enentaakwaninik otakohshinowin kaaTipeniminank Ciisahs Christ, i'i kaye keshimaamawinaasihkawank i'imaa eshiayaatc. Kipakohsenimininim

² ekaa wiipa ciwahkawinikoohsiwek kinaanaakatawencikaniwaank. Kaawiin wiipa kikamikoshkaaci'ikohsiiwaa awiya e'ihkitotc aasha ehpiocihcihsenik kaaTipenciketc okiishikanoom, maakishaa awiya oncikakitotc ahcaahkonaank, maakishaa kaye kii'ihkitom niinawint ekii'ishipii'ikeyaank.

³ Keko kikawanimikohsiiwaa awiya aaniin iko keihkitokwen. Kaawiin i'i taishihsehsinoon kiishikan, paanima ehta misiwehkamik kiiaanci'itisonaaniwank e'wepinaawaatc ini kaaTipencikenitc, kaye ahpii piayaatc a'a wawiinke kaatipenimikotc macihcikewin – mii 'awe piciinak nihshiwanaatisiwinink keishiwepinintc.

⁴ Wiin wii'ishpentaako'itiso, kahkina ewii'miikaatank kaa‑anami'ehtamaatamowaatc iki pemaatisiwaatc, kaye kahkina kekoon kaamanitoowentaakwaninik. Wiin i'imaa wii'namatapi i'imaa piintik Kishemanitoo owaahkaa'ikanink, wiin ewii'inakintisotc ehKishemanitoowitc.

⁵ Kaawiin ina kimaamihkawihsiim? Kahkina kikii'wiintamawininim mekwaa kiiwiiciiwinakook.

⁶ Kekoon itahsh kipihciihkemakan ekaa ciocihcihsehsinok. Kiinawaahsh kikihkentaanaawaa wekonen i'i kaakipiayaak. Mayaa tahsh iko ahpii kaaonencikaatek ciocihcihsenik, tanaakosi a'a kaaMaamawiMacaatisitc.

⁷ Aasha tahsh pimanohkiimakan i'i macihcikewin aakawaya'ii kaaishianohkiimakahk. Kaawiin wiin newacaya'ii taishiwepahsinoon i'i kaawii'ishiwepahk, paanimaa hsa ko inkoci maaciinintc a'awe kaakipishkiketc.

⁸ Miihsh i'i ahpii tanaako'itiso a'a kaaMaamawiMacaatisitc. A'a tahsh kaaTipenciketc piciinak okanihsaan ini kaamacihcikenitc, i'i opakitanaamowin otoonink e'oncihsenik ewii'aapacihtootc. Okanihshiwanaaci'aan, owaahsesiwin ewiihpi⁠ahshicinaakositc, takohshink.

⁹ A'a tahsh kaaMaamawiMacaatisitc kepinaako'itisotc, tawiihpikikii okashki'ewisiwinini ini Setanan (Satan). Okatootaanan mamaantawihcikewinan, kihkinawaacihcikanan kaye kaamamayakinaakwaninikin ewiihkakwewayeshinketc.

¹⁰ Kahkina ko ini macikekoonan oka‑aapacihtoonan ewiihkakwe kakiinawishkimaatc minihk awiyan kaawii'nihshiwanaatisinitc. Kaawiin aaniihsh okiihsaakihtoohsiinaawaa i'i tepwewin, kaawiin otootaahpinansiinaawaa i'i cioncipimaaci'intwaapan.

¹¹ Mii 'iwe Kishemanitoo keoncipiicinisha'amawaatc i'i kewayeshi'ikowaatc, kekashki'ikowaatc citepweyentamowaatc i'i ekaa kaatepwemakahsininik.

¹² Miitahsh i'i cipaahtaayaahkonikaniwiwaatc minihk iko ikiweniwak kaatepwehtansikwaa i'i tepwewin, nawac i'iweni ekii'minwentamowaatc maci‑inaatisiwin.

Kishemanitoo kikii'onenimikowaa cipimaaci'ikoowisiyek

¹³ Kaawiiciotepwehtamoomikooyek, kiinawaa kaasaaki'inek Kishemanitoo! Kiinawaa nintooncimiikwehciwi'aa Kishemanitoo, aaniihsh maawac niikaan kikii'onenimikowaa cipimaaci'ikoowisiyek, ekii'ishianohkiinitc otAhcaahkwan Kishemanitoo, wiin iko citipeniminek, kayehsh ekiihtepwehtamek tepwewin.

¹⁴ Mii 'owe kaaishiantominek, mii 'owe minwaacimowin niinawint kaakii'wiintamaakooyek, cionciantominek cioncitepipitamaasoyek okihtentaakosiwin kaawiihpahkwenamawinek kaaTipeniminank Ciisahs Christ.

¹⁵ Haw, kaawiiciotepwehtamoomikooyek! Aayiicikaapawik, minciminamok kahkina kaakii'aanihke⁠kihkino'amaakooyek, minihk hsa ko kaahpisintawiyaank kayehsh kaa'ishipii'amaakooyek.

¹⁶ Nimpakohsenimaa wiin tipinawe kaaTipeniminank Ciisahs Christ kaye Kishemanitoo kiTetenaan kaakiihsaaki'inank, kaye ehshaweniminank kaakii'oncimiininank mashkawentamowin pishihshik kewiiciiwikoyank kaye mashkawi ahpenimowin.

¹⁷ Nimpakohsenimaa cimashkawentami'inek kaye cimashkawisii'inek kahkina kekoon ciminotootamek kaye ciminokakitoyek.