2 ᑌᓴᓬᐆᓂᔭᓇᒃ 1 - Ojibwe Kihcimasina'ikan

¹ Niinawint iko nintooshipii'ikaninaan Pwaal (Paul), Silpenahs (Silvanus), Timahti (Timothy). Kiinawaa kitooshipii'amaakoom Tehsalanaihkaank (Thessalonica) kaatashianami'aayek, e'wiiciiwinek Kishemanitoo Kaaoyoohsimank kaye kaaTipenciketc Ciisahs Christ.

² Shawenimikoowin, koshkwaawaatentamowin kikamiinikowaa Kishemanitoo Kaaoyoohsimaawitc kaye kaaTipenciketc Ciisahs Christ.

Kwayahk tainaahkonike Kishemanitoo ahpii pitakohshink a'a Christ

³ Kaawiiciotepwehtamoomikooyek, inahte mooshak cinanaahkomankitc Kishemanitoo e'mihkwenimikooyek. Kwayahk i'iwe citootamank aaniihsh awahshime kihcimaaciikin kitepweyentamowiniwaa kaye e'animihshaak kisaaki'itiwiniwaa kahkina eshisaaki'itiyek.

⁴ Aanti piko kaaishianami'ehtawintc Kishemanitoo kitishimamiihkwaanikoom, aaniihsh mihsawaa hsa wiin e'onciihkaakooyek kaye e'onci kakwaataki'ikooyek, keyaapi kimashkawentaam, keyaapi kitepweyentaam. Mii 'o enaacimikooyek.

⁵ Mii 'o kaye kaaoncikihkentaakwaninik ehkwayahkwaninik Kishemanitoo otinaahkonikewin, aaniihsh i'iwe kaaishiwepisiyek kikaonci te inentaakosim i'imaa ciayaayek oTipencikewinink. Mii aaniihsh i'iwe wencikakwaatakihtooyek.

⁶ Kwayahk itahsh wiin okanana'ahtoon, meshkwac kakwaatakihtoowin okamiinaa' i'iweniwa' kakakwaataki'inekwaa.

⁷ Kiinawaa kaakakwaatakihtooyek maamaw kikamiinikonaan cianwepiyank a'a Kishemanitoo, mii 'i ahpii kihcikiishikonk pioncinaakositc a'a kaaTipenciketc Ciisahs, ewiihkikitakohshinoomaatc i'i otencalima' e'mashkawisiinitc,

⁸ kaye ishkote kemashkawahkwanenik ehpikikisitc okameshkocitipa'amawaa' awenena' iko ekaa kaakihkenimaahsinik Kishemanitoon, kaye minihk hsa ko awiyan kaatepwehtansinik i'iwe ominwaacimikoowin kaaTipeniminank Ciisahs.

⁹ Oko taishitipa'amawaawak cinehpici⁠ayaawaatc nihshiwanaatisiwinink. Tanehpici⁠pahkewinaawak ekaa ciwaapamaahsikwaa kaaTipencikenitc kaye eshiwaahseyaanik omashkawisiiwinini.

¹⁰ Mii 'iwe ahpii eshikiishikahk ewiihpiishaatc kaaTipenciketc ewiihkihtakimikotc i'i okwayahkwaatisiima' kaye ewii'maamahkaasinaakotc i'i minihk kaatepwehtaakotc. Kaye kiinawaa kikatakoayaam i'i ahpii, aaniihsh kikiihtepwehtaam nintipaacimowininaan kaakii'wiintamaakooyek.

¹¹ Mii hsa ko ahpane wenci⁠anami'ehtamaakooyek, a'a kiKishemanitoominaan ciahpiihtakiminek ciotihsaapantamek i'iwe pimaatisiwin kaaishiantominek, maano kaye okatipihsahtwaan wekonen iko minokekoon kaakii'inentamek citootamek, kaye kahkina kekoon kitepweyentamowiniwaank kaawii'oncianohkaatamek okatipihsahtwaan.

¹² Miitahsh ono kekoonan ishihcikaatekin kiinawaa taoncikihtencikaateni owiinsowin a'a kaaTipeniminank Ciisahs, shikwa kaye kiinawaa kikatakomiinikowaa okihtentaakosiwin. Onohsh kahkina taonciimakanoon oshawencikewinink a'a kiKishemanitoominaan kaye kaaTipenciketc Ciisahs Christ.