2 ᑭᒋᐅᑭᒫᒃ 5 - Ojibwe Kihcimasina'ikan

Neaman Kii'antawi'intc

¹ A'a tahsh inini Neaman (Naaman) eshinihkaasotc kiih⁠shimaakanihshiiwikimaawi ekiih tipenimaatc oshimaakanihshiimini ini kehci'okimaawinitc weti Siiriya ahkiink (Syria). Wiinke tahsh okii kihci inenimikoon kihciokimaan aaniihsh wiin okii aapaci'ikoon kaaTipencikenitc kaakii onci nihtaa shaakoocihtwaanitc Siiriyawininiwa'. Wiinke kaye kii⁠sanakisi kii⁠miikaasotc a'a Neaman, shaakooc iko kiih⁠sanaki omikiiwaahpine.

² Siiriyawi shimaakanihshak itahsh pepahkaan kii⁠ayishaawaakopan ekii ayohkwiinowaakopanen. Peshik tahsh ihkwesenhsan kii⁠onci mahkantwewaakopan Isriyal ahkiink. Miitahsh wa'a ihkwesenhs kaakiih pamiihtawaatc Neamanan wiiwini.

³ Miitahsh a'a ihkwesenhs kaa'inaatc otookimaahkweman, “Ampehsh nintookimaam wiiciiwaahpan ini kenootamawaanitc Kishemanitoon weti Sameriya (Samaria) ahkiink eyaanitc. Otaakii nanaantawi'ikoon ohsha 'i kaa⁠inaahpinetc,” okii'inaan.

⁴ Okii anta waapamaan tahsh otookimaaman ekii awi wiintamawaatc aaniin kaa⁠ihkitonitc ini ihkwesenhsan Isriyal ahkiink kaakii onciinitc.

⁵ Miitahsh kaa'ikotc ini kaakii kihciokimaawinitc Siiriya ahkiink, “Haw shemaak maacaan, ninka oshipii'amawaa hsa kihciokimaa weti Isriyal ahkiink kaa‑ayaatc,” okii'ikoon. Miihsh Neaman kaa⁠ishi maacaatc, ekii maaciinaatc ninkotwaahciink mitaahswaahk (6,000) osaawaapihko shooniyaan, niishwaahswaahk naanimitana (750) tahso kosikwan waapaapihko shooniyaa waapihkoon kaye, mitaahswewaan kaye kikishkikanan okiih tako maaciitoonan.

⁶ I'iweni tahsh oshipii'ikan kaakiih piitamawaatc ini Isriyali kihciokimaan mii 'owe kaa⁠ishipii'ikaatenik, “Mii hsa eshipii'amawinaan, e⁠ishinisha'wak nintanohkii'aakan Neaman ci⁠nanaantawi'atc i'i kaa⁠inaahpinetc.”

⁷ Ahpii tahsh Isriyali kihciokimaa e⁠anamihtootc i'i oshipii'ikan, mii hsa kaa⁠ishi taashkiikipitootc okikishkikanan ehpiihci koshkwentank ekii ihkitotc itahsh, “Nimanitoow ina, awiya kii⁠nihsak ci⁠kiiwe pimaatisii'akipan? Wekonenini tahsh wa'a inini wenci piicinisha'waatc awiyan ci⁠mino'ayaa'imak kaa⁠sanaki omikiiwaahpinenitc? Mii hsa 'i eshihciketc eh⁠kakwe mihkank aaniin keshi maanshi wiiciiwitc.”

⁸ Ahpii tahsh Ilaaihsha (Elisha) Kishemanitoon wetininiimikotc e⁠noontank Isriyali kihciokimaan ekiih taashkiikipitoonitc okikishkikanini, miihsh kaa⁠ishi anoohkiitc ci⁠wiintamawimintc kihciokimaan o'o ekii ihkitotc, “Wekonen tahsh wenci taashkiikipitooyan kikikishkikanan? Inashke niin ninka pi anta waapamik, oka kihkentaan itahsh e⁠ayaanitc okiikitoohtamaaken o'omaa Isriyal ahkiink!” kii‑ihkito.

⁹ Neamanan tahsh kiih⁠piishaawan kaakii ishi'ayaatc ekiih piinaanitc omihtatimoomini; otootaapaanaahkoni kaye, ekii ishi kipihciinitc eshi ishkwaantemiwaninik owaahkaa'ikan.

¹⁰ Miitahsh Ilaaihsha kaa'inaatc otanohkii'aakanan, ci'inaanitc Neamanan, “Maacaan awi kisiihsipason niishwaahcink 7 Cwaartan (Jordan) siipink, miitahsh i'i kishakay ci⁠kiiwe minonaakositc, miitahsh i'i ci⁠pehkisiyan,” okii'inaan.

¹¹ Neaman tahsh wiinke kii⁠nishkaatisi, ekii ani maacaatc ekii ihkitotc, “Inashke mii 'i kaa⁠inentamaan kehcinaac maawiin ci⁠saakicikaapawihtawitc, ekii inenimak ci⁠kanoonaatc eshinihkaasonitc kaaTipencikenitc oManitooman, cikiih pi ayishininciipani'otc kaye eshi aahkosiwak, miihsh i'i cikii mino'ayaawakipan.

¹² Nawac iitok siipiin Apaana (Abanah), Parpar (Pharpar) kaa⁠ishinihkaatekin, weti Timaaskahsink (Damascus) siipi kaye pehkaakaminoon ahpiihc wiin i'i kahkina nipi kaa‑ayaak o'omaa Isriyal ahkiink. Kaawiin ina weti nintaashi kisiihsipasohsii ci⁠mino'ayaayaampaan itahsh?” Miihsh kaa‑anishi maacaatc ewii ani kiiwekitaasotc.

¹³ Otanohkii'aakana' tahsh okii naasihkaakoo' ekii'ikotc, “Kaa⁠otetewakimikooyan, kiishpin hsa okiikitoohtamaake inihkipan kihci kekoonini ci‑ishihcikewatc, kitaa ishihcikewaan iitok. Nawac iitok kitaa ishihcikewaan emihci'inihk, kisiihsipason miitahsh i'i ci⁠mino'ayaayan.”

¹⁴ Miitahsh Neaman kaa⁠ishi naasipiitc ekiih kakintaapiikipani'otc niishwaahcink nipiink, ekii ishihciketc kaakii'ikotc Kishemanitoon otininiimini. Oshakayan tahsh kiih⁠kiiwe ishinaakosiwan taapishkoo apinoonciishenhsan kaa⁠ishishakayenitc; miihsh kaa⁠ishi mino'ayaatc.

¹⁵ Miihsh Neaman kaa⁠ishi kiiwe ishaatc eshi'ayaanitc Ilaaihshawan, ekii wiiciiwaatc kahkina kaakii wiiciiwikotc. Miihsh kaa⁠ishi inaahsamikaapawihtawaatc ekii'inaatc, “Mii hsa 'i kiih⁠kihkentamaan kaawiin ayaahsii pahkaan manitoo misiwe ahkiink mii ehta ko oKishemanitoomiwaan Isriyalak. Taka hsa tahsh kanake otaahpinan ono kaa⁠miininaan, kitanohkii'aakanink e⁠inenimoyaan,” okii'inaan.

¹⁶ Miitahsh Ilaaihsha kaa⁠ihkitotc, “Kehcinaac iko kaaTipenciketc eh⁠pimaatisitc e⁠anohkiihtawak, kaawiin kekoon niwii otaahpinansiin.” Neamanan okiih kakaansomikoon, miihsh kaawiin Ilaaihsha kii‑inentansii.

¹⁷ Miitahsh o'o kaa'ikotc Neamanan, “Kiishpin tahsh inentansiwan, taka hsa kanake pakitinihshin ci⁠kiiwewitooyaan o'o ahkamik minihko niishin shoonshoomihtatimook ke⁠kashkiwanewaatc. Niin hsa kitanohkii'aakanink e⁠inenintisoyaan. Kaawiin miinawaa niwii ankwaahkisamawaahsiik pakitinikewinan, kaawiin kaye niwiih pakitinaahsoohtamawaahsiik kotak manitook; mii ehta ko kaaTipenciketc!

¹⁸ Taka hsa kaaTipenciketc ninka poonentamaak peshikoyek kekoonini, niin kitanohkii'aakanink kaa⁠inenintisoyaan; Ahpii nintookimaam piintiketc anami'ewikamikonk kaashi anami'ehtawimintc ini Oriman (Rimmon) enimintc, animihkohtaatc itahsh kii⁠aasoshink ninihkink, keniin tahsh animihkohtaayaan eshi anami'ehtawintc Oriman enintc, taka kaaTipenciketc ninka poonentamaak o'o ishihcikewak,” kii‑ihkitowan.

¹⁹ Miitahsh Ilaaihsha kaa'inaatc, “Mii'i pisaanisiwinink anishi maacaan.” Miitahsh Neamanan kaa‑ani ishi maacaanitc ekii nakanikotc. Waahsayiish itahsh iko ekii ani pimi ayaanitc,

²⁰ a'a hsa Kahesii (Gehazi) kaa⁠otanohkii'aakanimikotc Ilaaihshawan kii‑inentam, “Onsaam ihsa naa nintookimaam Ilaaihsha okoohpaatenimaan ini Neamanan Siiriya ahkiink wenciinitc e⁠otaahpinamawaahsik kekoonini kaakiih piitoonitc. Kehcinaac iko kaaTipenciketc misiwe eh⁠tipenciketc, niin hsa ninka kakwe atimaa kekoonini ci⁠miishitc,” kii‑inentam.

²¹ Miitahsh Kahesii kaakiih piminisha'waatc Neamanan. Ahpii tahsh Neaman e⁠waapamaatc awiyan eh⁠piminisha'okotc, kiih⁠kapaa hsa otootaapaanaahkonk ekii anta nakishkawaatc ekii'inaatc, “Kahkina na kekoon minohse?”

²² Miihsh Kahesii kaa⁠ihkitotc, “Kahkina hsa kekoon minohse. Nintookimaam hsa nimpiicinisha'ok ci‑ihkitowak, ‘Niishin ohsha oshkiniikiwak kaa⁠kanootamawaawaatc Kishemanitoon ninkiih pi'anta waapamikook weti Iihpariyam (Ephraim) ahkiink kaashi papiihkwatinaanik e⁠onciiwaatc. Taka hsa miinsh niishwaahsimitanashinaanan tahso kosikwan waapaapihko shooniyaa waapihkoo', miish kaye kikishkikanan niishink minihk ci⁠meshkocihkonayewaatc,’ ” kii‑ihkito.

²³ Neaman hsa tahsh kii‑ihkito, “Haw, pisaaniko otaahpin ninkotwaahk naanimitana tahso kosikwan waapaapihko shooniyaa waapihkoon.” Okiih kakaansomaan hsa Kahesiiwan ci⁠otaahpinaanitc ninkotwaahk naanimitana tahso kosikwan waapaapihko shooniyaa waapihkoo'. Omashkimotiniink tahsh okii ishi piina'amawaan, niishwewaan kaye kikishkikanan. Miihsh kaa⁠ishi miinaatc otanohkii'aakana', ci‑ishiwitawaanitc Kahesiiwan kaa⁠ishi'ayaanitc.

²⁴ Ahpii tahsh Kahesii kaah⁠takohshink weti kaakii ishi pihkwatinaanik, okii otaahpinamawaa' hsa 'i kaakiih pimiwitoonitc, owaahkaa'ikanink ekii ishi piintikatootc. Miitahsh kaa⁠ishi kanoonaatc i'i ininiwa' ci⁠ani maacaanitc. Kii⁠ani maacaawan tahsh.

²⁵ Miitahsh kaa‑ani ishi piintiketc ekii anta waapamaatc eshi'ayaanitc Ilaaihshawan. Miihsh kaa'ikotc, “Aaniinti kaa‑ayaayan?” Miihsh kaa⁠ishi nahkwehtawaatc, “Niin kitanohkii'aakan kaawiin inkoci nintoonci ishaahsii,” okii'inaan.

²⁶ O'o tahsh Ilaaihshawan okii'ikoon, “Kaawiin ina kikihkentansiin i'imaa nintahcaahkonk ekii wiiciiwinaan ahpii kiih⁠kapaatc a'a inini otaapaanaahkonk kii⁠anta nakishkawihk? Kaawiin ohsha ocihcihsehsinoon ci⁠otaahpinintipan shooniyaa, ini kaye kikishkikanan, kaashi kihtikaatekin kaye alip (olive) tinowiminan, kaashi kihtikaasowaatc kaye shoominak, shikwa kaye iki maanahcaanihshak, pishihkiwak, opamiihtaakek kaye kaa⁠ininiiwiwaatc, kaa⁠ihkwewiwaatc kaye.

²⁷ I'iweni tahsh Neaman otinaahpinewin kika otihsikoon, iki kaye kipiiwesiimak nehpic iko 'i kika inaahpinem,” okii'ikoon. Miitahsh Kahesii kaa⁠ishi nakanaatc Ilaaihshawan osanakii omikiiwaahpinewin ekii ahpiihci waapishkaanik taapishkoo koon kaa⁠ishinaakositc.