2 ᑭᒋᐅᑭᒫᒃ 4 - Ojibwe Kihcimasina'ikan

Ilaaihsha Kiiwiici'aatc Kiiwashihkwewan

¹ Peshik tahsh ihkwe kaakii onaapemitc ini kenootamawaanitc Kishemanitoon, okii ishi shaakowaanaan Ilaaihshawan (Elisha) ekii ihkitotc, “Kaakii anohkiihtawihkipan hsa ninaapem kii‑ishkwaa pimaatisi, kikihkenimaa iitok kaakii⁠anohkiihtawihk ekii kohtaanenimaatc kaaTipencikenitc. Inashke tahsh ini ininiwan kaakii masina'amawaatc okiih pi naasihkawaani ewii maaciinaanitc kaa⁠niishinitc ninkosihsa' ewii awahkaanaanitc, mii 'imaa wa⁠onci tipa'amaasonitc,” okii'inaan.

² Ilaaihsha tahsh okii'inaan ini ihkwewan, “Aaniin tahsh ke⁠ishi wiici'inaan, taka hsa wiintamawihshin wekonen eyaayan kiwaahkaa'ikanink.” Miihsh o'o kaa'ikotc ini ihkwewan, “Niin kaa⁠pamiihtawinaan kaawiin hsa kekoon nintayaahsiin, mii ehtako peshik omootayaapihk pimite eyaayaan,” okii'ikoon.

³ Miitahsh Ilaaihsha kaa'inaatc, “Anta waapam kiwiicitaamaakanak ci⁠awi'aasomatwaa kaa⁠pishihshikwaanikin omootayaapihkoon. Keko wiin pankii ehta awi'aasohken.

⁴ Miitahsh ishi piintikehkan kiwaahkaa'ikan ci⁠wiiciiwatwaa kikosihsak, kipa'amoohkan itahsh kitishkwaantem. Miitahsh i'i kipimitem ishi piinci siikinamoohkan i'imaa kahkina omootayaapihkonk; keni mooshkinepatooyan itahsh ohpime ani ahtoohkan,” okii'inaan.

⁵ Miitahsh kaa⁠ishihciketc a'a ihkwe ekiih piintiketc owaahkaa'ikanink tako okosihsa'. Okii ani mooshkinepatoonan tahsh omootayaapihkoon minihk iko okosihsa' kaah⁠piitamaakotc.

⁶ Ahpii tahsh kahkina kaa⁠mooshkinepiinikin ini omootayaapihkoon, miihsh kaa'inaatc okosihsan, “Keyaapi kotak omootayaapihkoon piitoon.” Miitahsh kaa'ikotc, “Mii ohsha 'i kahkina kiih⁠caakihsekin omootayaapihkoon.” Miitahsh i'i ekiih caakikawink pimite.

⁷ A'a tahsh ihkwe okii anta waapamaan ini Ilaaihshawan Kishemanitoo otininiiman ekii wiintamawaatc. Ilaaihsha tahsh okii'inaan ini ihkwewan, “Maacaan tahsh awi ataawaaken i'i pimite, miitahsh ci⁠tipa'aman i'i kaa⁠masina'ikeyan. Miinihk tahsh ke⁠ishkohsetc shooniyaa, mii hsa awe ke⁠ontaatisiyan, kikosihsak kaye.”

Ilaaihsha Shikwa Kaawenootisitc Ihkwe

⁸ Aapitink tahsh Ilaaihsha (Elisha) kiih⁠pi takohshin ayaawin Shoonam (Shunem) ecikaatenik eshitaaniwaninik. Ihkwewan hsa i'imaa kii‑ishitaawan wiinke ekii wenootisinitc. Miiwan tahsh ini ihkwewan kaakiih kakaansomikotc ewii ahshamikotc. Entahsink tahsh iko i'imaa kaah⁠pimi ayaatc, mii hsa 'imaa kaa⁠ishi piintiketc ekii wiihsinitc.

⁹ A'a tahsh ihkwe okii'inaan onaapeman, “Ninkehci'aa ihsa wa'a inini kaa⁠nihtaa otihsinank Kishemanitoon e⁠otininiimikotc.

¹⁰ Taka hsa oshihtamawaataa ishpimihkancikanenhs nipewikamikoonhs weti wakitapahk. Nipewinaahk tahsh kaye ahtaawaataa keshi nipaatc, toohpowinaahk itahsh kaye, tehsapiwin, waahsahkonencikan kaye ahtaawaataa. Inashke tahsh otihsinank, mii 'imaa keshi nipaatc.”

¹¹ Aapitink tahsh eh⁠kiishikaninik Ilaaihsha kiih⁠pi takohshin, miihsh i'imaa kaa⁠ishi piintiketc ishpimihkancikanink nipewikamikoonhs kaakii ishi oshihtamawintc, ekii anwehshink.

¹² Miitahsh Ilaaihsha ekiih kanoonaatc pemiihtaakotc Kahesii (Gehazi) eshinihkaasonitc ekii'inaatc, “Antom a'a Shoonemiiwihkwe ci⁠piishaatc.” Miihsh kaakii ishi kanoonaanitc. Ini tahsh ihkwewan kiih⁠pi niipawiwan eshi'ayaatc.

¹³ Miihsh Ilaaihsha kaa'inaatc Kahesiiwan, “Taka kakwecim a'a ihkwe aaniin meshkwac ke⁠tootawankitipan o'o e⁠kihci anohkiitc e⁠minotootawinank. Ninantawenimik ina ci⁠kanoocikehtamawak, ci⁠kanoonimak kihciokimaan, komaa kaye miikaasowi shimaakanihshiiwikimaan.” Ini tahsh ihkwewan o'o kii‑ishi nahkwehtamoon, “Kahkina hsa kekoon nintayaan kaa⁠noontehseyaan o'omaa kaashi wiicitaamakwaa niicipimaatisiik,” kii‑ihkitowan.

¹⁴ Miitahsh Ilaaihsha kaa⁠ihkitotc, “Aaniin tahsh inaa kekii ishi wiici'intipan?” Kahesiiwan tahsh kii‑ihkitowan, “Kaawiin kii⁠okosihsihsii, onaapeman kaye ahkiwensiiwiwan.”

¹⁵ Ilaaihsha tahsh kii‑ihkito, “Antom a'a ihkwe.” Ahpii tahsh kaa‑antomimintc, ishkwaantenk tahsh kii⁠niipawiwan.

¹⁶ Miitahsh Ilaaihsha kaa'inaatc ini ihkwewan, “O'o hsa ahpii miinawaa ani ocihcihsek, ci⁠tahkonaawaahsoyan ci⁠okosihsiyan.” Miihsh ini ihkwewan kaa'ikotc, “Taka keko kiiwanimohtawihshihken, Kishemanitoo iitok kitootininiimik,” okii'ikoon.

¹⁷ Miitahsh a'a ihkwe kii⁠ani kikishkawaawahsotc kwiiwisenhsan ekii nihtaawikinitc ahpii e⁠ocihcihsenik Ilaaihshawan kaakii'ikohpan ci⁠oniicaanihsitc.

¹⁸ I'iwe tahsh kaa‑ani ompikitc a'a kwiiwisenhs aapitink eh⁠kiishikaninik okii anta waapamaan oteten kaakii wiiciiwaanitc omanishike'.

¹⁹ Miitahsh kaa'inaatc oteten, “Etatawe nintewihkwehse!” Oteten tahsh okii'inaani otanohkii'aakanini, “Ishiwinihk kaashi ayaanitc omaamaan.”

²⁰ Miitahsh a'a anohkii'aakan kaa⁠ishi otaahpinaatc ini kwiiwisenhsan ekii ishiwinaatc eshi'ayaanitc omaamaani. A'a tahsh kwiiwisenhs ekii minciminikotc omaamaan ociinkwaniniink piinihsh ekii naawahkwenik, miihsh piinihsh kaa⁠ishi nipotc.

²¹ Miitahsh a'a ihkwe kaa⁠ishi ahkwaantawewinaatc okosihsan ekii awi pakitinaatc onipewininiink Ilaaihshawan eshi nihtaa nipaanitc Kishemanitoon wetininiimikonitc. Okiih kipa'aan tahsh ishkwaantem miihsh kaa⁠ishi maacaatc.

²² Miihsh kaakii antomaatc onaapeman ekii'inaatc, “Taka piicinisha'o peshik anohkii'aakan, peshik kaye maanshimihtatim, ewii anta waapamak Kishemanitoon wetininiimikotc, ehpiisihkaayaan iko ninka pikiiwe,” okii'inaan.

²³ Miihsh kaa'ikotc, “Wekonen tahsh noonkom kaa⁠kiishikahk waa⁠onci ishaayan? Kaawiin iitok mahshi Anwepiiwi kiishikahsinoon, kaawiin kaye mahshi oshkakoocinihsii tipihkikiisihs kaa⁠ishi nihtaa wihkwantinaaniwank,” okii'ikoon. A'a tahsh ihkwe kii‑ishi nahkwehtam, “Mii ko 'iwe pisaan iko.”

²⁴ Miitahsh kaa⁠ishi anoohkiitc ci⁠onahpinimintc ini maanshimihtatimoon ekii'inaatc anohkii'aakanan, “Haw, maacaan, keko wiin nihshihk pimi ayaahken niin onci, paanimaa hsa kanooninaan nihshihk pimi ayaahkan.”

²⁵ Miitahsh kaa⁠ishi maacaatc a'a ihkwe ekii anta waapamaatc Ilaaihshawan weti kaakii ishi'ayaanitc kihci ishpatinaank Karamel (Carmel) ecikaatenik. Niiyaak tahsh Kishemanitoon wetininiimikotc okii waapamaan ini ihkwewan eh⁠pinaakosinitc. Miihsh kaakii'inaatc Kahesiiwan pemiihtaakotc, “Inashke na awe Shoonemiiwihkwe kaa⁠pinaakositc.

²⁶ Taka anta nakishkaw, miitahsh ishi kakwecimaahkan, ‘Kimino'ayaa na? Kinaapem ina mino'ayaa? Kiniicaanihs ina kaye mino'ayaa?’ ” Miihsh kaakii ihkitonitc ini ihkwewan, “Eya', niminohse.”

²⁷ Ahpii tahsh ini ihkwewan tekohshininitc kihci ishpatinaank i'imaa eshi'ayaatc Kishemanitoo otininiiman, miihsh kaa⁠ishi kihciwinikotc i'imaa ositaank eh⁠pakohsentamaakotc kekoonini. Kahesii tahsh pehsho kiih⁠piishaa ninkoci ewii ishi kaanciwepinaatc ini ihkwewan. Ilaaihsha okii'inaan, “Keko papaamenimaahken, wawiinke ohsha mikoshkaatentam piincaya'ii opimaatisiwinink. KaaTipenciketc ohsha kaawiin mahshi ninkihkentamoonikohsii, kaawiin kaye mahshi niwiintamaakohsii.”

²⁸ Ini tahsh ihkwewan okii'ikoon, “Nintookimaam, kikiih kakwecimin ina ci⁠ayaawak kwiiwisenhs? Kitaanakii'inin iitok ci⁠kiiwanimohtawihshihsiwan.”

²⁹ Miitahsh Ilaaihsha kaa'inaatc Kahesiiwan, “Ihkwahpitoon i'i kikashkiikiiwin, maaciitoon kaye o'o nimihtikoom, mii 'i ishi maacaan. Kiishpin awiya nakishkawatc, keko pooshoo'aahken. Kiishpin tahsh kaye awiya pooshoo'ihk, keko papaamihtawaahken. Owatenkonk tahsh kwiiwisenhs ishi minciminamow i'i nimihtikoom,” okii'inaan.

³⁰ Ini hsa ihkwewan kii‑ihkitowan, “KaaTipenciketc misiwe eh⁠tipenciketc, mii ehpiihci kehcinaa'entamaan kaawiin kiwii nakanihsinoon.” Miihsh Ilaaihsha ekiih ani piminisha'waatc ini ihkwewan.

³¹ Kahesii tahsh kii⁠niikaanii, miihsh kaa⁠ishi ahtootc i'i mihtikoni owatenkwaniink ini kwiiwisenhsan. Kaawiin tahsh awaac iko kii⁠noontaatihsiiwan, kaawiin kaye kii⁠wahkawiihsiiwan. Miihsh kaa⁠ishi kiiwetc ekii anta nakishkawaatc, ekii wiintamawaatc Ilaaihshawan, “A'a hsa kwiiwisenhs kaawiin kii⁠wanishkaahsii,” ekii'inaatc.

³² Ahpii tahsh Ilaaihsha tekohshink i'imaa waahkaa'ikanink, tepwe hsa kaawiin kiih⁠pimaatisihsiiwan ini kwiiwisenhsan ekiih pimihshininitc i'imaa onipewinink.

³³ Miitahsh kaakii ishi piintiketc ekiih kipa'ank ishkwaantem kwiiwisenhsan ehta i'imaa ekii wiiciiwaatc, miihsh kaa⁠ishi anami'ehtawaatc kaaTipencikenitc.

³⁴ Miitahsh kaa⁠ishi patakoshkawaatc ini kwiiwisenhsan, ekii ishitoonehshink otooniniink, ekii ishishkiishikwehshink tahsh kaye oshkiinshikoniink, ekii ishininciihshink itahsh kaye oninciinink. Ekiih patakoshkawaatc itahsh ini kwiiwisenhsan piinihsh kii⁠ani kiishiwiiyawiwewan.

³⁵ Miitahsh kaa⁠ishi wanishkaatc ekii aayaashawishkaatc i'imaa piintik ekiih papaamohsetc. Miitahsh miinawaa kaa⁠ishi patakoshkawaatc kwiiwisenhsan. Miihsh niishwaahcink kaakii ani aayinimonitc, miihsh piinihsh kaa⁠ishi ayinaapinitc.

³⁶ Miitahsh kaa'inaatc Kahesiiwan, “Antom tahsh a'a Shoonemiiwihkwe.” Miitahsh kaa⁠ishi antomaanitc. Ahpii tahsh ehpi piintikenitc ini ihkwewan o'o okii'inaan, “Ina wa'a kikosihs.”

³⁷ Miitahsh kaa⁠ishi piintiketc a'a ihkwe mihcisak ekii animihkopani'otc eshisitekaapawinitc, ekii ishi miikwehciwentank. Miihsh kaa⁠ishi otaahpinaatc ini okosihsan ekii ani maacaatc.