2 ᑭᒋᐅᑭᒫᒃ 2 - Ojibwe Kihcimasina'ikan

Ilaaica Kii'ishiwicikaniwitc Kihcikiishikonk

¹ Aasha tahsh kekaa Ilaaica (Elijah) kiiwii ishiwinikotc kaaTipencikenitc kihcikiishikonk, shipihshicoohshan kiiwii aapaci'aanitc. Ilaaica hsa okii wiiciiwaan Ilaaihshawan (Elisha) kiih⁠pimi ayaawak ekiih pi onciiwaatc Kilkalhkaank (Gilgal).

² Ilaaica tahsh okii'inaan Ilaaihshawan, “Taka mii kiin o'omaa ayaan. KaaTipenciketc ohsha ootenaank Pehtal (Bethel) ecikaatenik ninkii ishinisha'ok ci‑ishaawak.” Miitahsh o'o Ilaaihshawan kaa'ikotc, “KaaTipenciketc misiwe eh⁠tipenciketc, mii ehpiihci kehcinaa'entamaan cishi wiiciiwinaan aanti piko eshaayan.” Miihsh minciniish kaa⁠ishi ishaawaatc weti Pehtalink.

³ Kaakiih paahtiinowaatc itahsh kenootamawaawaatc Kishemanitoon kaakii ayaawaatc weti Pehtalink, okiih pi'anta nakishkawaawaan Ilaaihshawan ekii'inaawaatc, “Kikihkentaan ina kaaTipenciketc ewii maaciinaatc kitokimaaman noonkom kaa⁠kiishikaninik?” Miihsh'i Ilaaihsha kii‑ishi nahkwehtam, “Eya', ninkihkentaan, keko i'iwe tashintankek.”

⁴ Ilaaica tahsh okii'inaan Ilaaihshawan, “Taka mii kiin o'omaa ayaan, kaaTipenciketc ohsha nintishinisha'ok Cerahko (Jericho) ootenaank ci‑ishi ishaawak.” Miitahsh kaa⁠ishi nahkwehtaakotc, “KaaTipenciketc misiwe eh⁠tipenciketc, mii ehpiihci kehcinaa'entamaan cishi wiiciiwinaan aanti piko eshaayan.” Miihsh minciniish kaa⁠ishi takohshinowaatc Cerahko ootenaank.

⁵ I'iweniwa' hsa kenootamawaanitc Kishemanitoon weti Cerahko eyaanitc, okiih pi naasihkaakoo' Ilaaihsha ekii'ikotc, “Kikihkentaan ina kaaTipenciketc ewii maaciinaatc kitookimaaman noonkom kaa⁠kiishikaninik?” Miihsh kaa⁠ishi nahkwehtawaatc, “Eya', ninkihkentaan, keko i'iwe tashintankek.”

⁶ Ilaaica tahsh okii'inaan Ilaaihshawan, “Taka mii kiin o'omaa ayaan, kaaTipenciketc ohsha nintishinisha'ok weti Cwaartan (Jordan) siipink.” Miihsh Ilaaihshawan kaa'ikotc, “KaaTipenciketc misiwe eh⁠tipenciketc, mii ehpiihci kehcinaa'entamaan cishi wiiciiwinaan aanti piko eshaayan.” Miihsh minciniish kaa‑anishi maacaawaatc.

⁷ Naanimitana (50) tahsh kaa⁠kanootamawaanitc Kishemanitoon okii ishi piminisha'okowaa' Cwaartan siipink. Ilaaica tahsh a'a kaye Ilaaihsha i'imaa siipink kii‑ishi kipihciiwak. Iki tahsh naanimitana ininiwak waahsa kii⁠onsaapiwak.

⁸ Miitahsh Ilaaica kaakiih kiihcikoshkank okashkiikiiwin ekiih tihtipeyiikinank. Miitahsh i'iweni kaa‑aapacihtootc eh⁠pahkihte'ank nipiini. Miihsh kaa⁠ishi taashkaakamihsenik siipi. Miitahsh minciniish kaa⁠ishi aashawishkaawaatc i'i siipiini ekiih paankwahkamikaanik.

⁹ Ahpii tahsh kaa⁠ishkwaa aashawishkaawaatc i'i siipiini, Ilaaica okii'inaan Ilaaihshawan, “Wiintamawihshin aaniin ke⁠tootamawinaan cipwaa otaahpinikooyaan,” okii'inaan. Miihsh Ilaaihshawan kaa'ikotc, “Taka niishink i'i minihk kitahcaahk kaa‑ahpiihtentaakositc ninkashi miinikoowis cikii naapishkawinaan.”

¹⁰ Miitahsh kaa⁠ishi nahkwehtawaatc, “Sanakan hsa 'i kaashi kakwetweyan, shaakooc tahsh kiishpin waapamiyan otaahpinikoyaan, mii hsa 'iwe nahke keshi shawentaakosiyan. Kiishpin itahsh wiin waapamihsiwan, kaawiin iinsan i'inahke kika ishi shawentaakosihsii,” okii'inaan.

¹¹ Mekwaa tahsh e⁠ani pimohsewaatc, eh⁠kakanoonitiwaatc itahsh kaye, ketahtawin hsa kii⁠onci naakosiwan otaapaanaahkwan e⁠ishkotewinitc, mihtatimoo' kaye e⁠ishkotewinitc, mii hsa 'imaa kaa⁠onci nenaawihsewaatc. Shipihshicoohshink hsa Ilaaica kii⁠ani ishi otaahpinaa e⁠ishaatc kihcikiishikonk.

¹² Ahpii tahsh Ilaaihsha kaa⁠waapanketc aaniin kaa⁠ishihsenik, miihsh kaa⁠ishi shaakowetc, “Nintete, nintete! Kiin kaa⁠kohtaanentaakositc Isriyali onaatamaake!” Kaawiin tahsh awahshime okii waapamaahsiin. Miitahsh Ilaaihsha kaa⁠ishi taashkipitootc okikishkikanan.

¹³ Okii otaahpinaan tahsh Ilaaicawan okashkiikiiwinini kaakiih pankihsitoonitc; ekii ishi ashe kiiwetc ekii ishi niipawitc e⁠ahkopiihkaanik Cwaartan siipink.

¹⁴ Miitahsh kaa⁠ishi otaahpinank Ilaaicawan okaashkiikiiwinini ekiih pahkihte'ank i'i nipiini, ekii ihkitotc, “Aaniinti tahsh a'a kaaTipenciketc, Ilaaica oKishemanitooman?” Kaa⁠ishkwaa pahkihte'ank tahsh nipiini, mii hsa 'i kaa⁠ishi taashkaakamihsenik; miitahsh pisaan iko Ilaaihsha kaa⁠ishi aashawishkaatc.

¹⁵ Ahpii tahsh iki kenootamawaanitc Kishemanitoon Cerahko ootenaank wenciinitc e⁠waapamikotc Ilaaihsha mii 'i kaa⁠ihkitonitc, “Ilaaicawan iinsan otahcaahkoni okikishkaakoon Ilaaihsha,” kii‑ihkitowa'. Miitahsh kaah⁠pi ishi anta nakishkaakotc ekii animihkohtaanitc eshi niipawitc.

¹⁶ Miihsh kaa'ikotc, “Inashke, naanimitana (50) ohsha nintahshimin o'omaa, aahpici kaye nisoonkaatisimin. Taka tahsh ninka ishaamin ci⁠nanaantawaapamankitc kitookimaam. Maakishaa hsa kaaTipencikenitc otahcaahkoni kii⁠maaciinikotc, ninkoci ko kihci waciink, komaa kaye kaashi pahsatinaanik okii ishi nakanikotokwenan,” okii'ikoo'. “Keko ishaahkek,” itahsh Ilaaihsha okii inaa'.

¹⁷ Okiih kakaansomikoo' tahsh ewii ishaanitc, miihsh kekahpii kaa⁠ishi shaakoosomikotc. Miitahsh o'o kaa'inaatc intawaa, “Haw, pisaan ishaak.” Naanimitana (50) tahsh ininiwa' okii ishinisha'waa' nihsokiishik ekii nanaantone'ikenitc; kaawiin hsa okii mihkawaahsiini Ilaaicawan.

¹⁸ Miitahsh kaah⁠pi'ishi ashe kiiwenitc Cerahko ootenaank eshi'ayaatc Ilaaihsha. Miitahsh kaa'inaatc, “Kitaanakii'ininim iitok cikii ishaahsiwekipan,” okii inaa'.

Ilaaihsha Kaakii'ishimaamahkaacihciketc

¹⁹ Aaninta tahsh ininiwa' Cerahko wenciinitc okiih pi'anta waapamikoo' ekii'ikotc, “Nintookimaaminaan, inashke o'o ootena wiinke minwahte, nipi tahsh kaawiin onishihshisinoon, miitahsh kekoon kaa⁠onci nihtaawikihsinok o'omaa ahkiink!” okii'ikoo'.

²⁰ Miitahsh kaa'inaatc, “Shiiwihtaakan ahtook oshki onaakanink, piitamawihshik itahsh!” Miihsh kaa⁠ishi miinintc.

²¹ Miihsh kaa⁠ishi ishaatc eshi moohkiciwaninik nipi ekiih pahkopii wepinank i'i shiiwihtaakan o'o ekii ihkitotc, “Mii hsa 'oweni ehkitotc kaaTipenciketc, ‘Nimpehkaakamihtoon ihsa o'o nipi. Kaawiin miinawaa wiihkaa ta⁠nihshiwemakahsinoon, miihsh i'i ci⁠maacii nihtaawikink kekoon i'imaa ahkiink,’ ” kii‑ihkito.

²² I'i hsa tahsh nipi piinihsh o'o ishi ahpii keyaapi pehkaakamin ekii ishihsenik Ilaaihsha kaakii ihkitokopanen.

²³ Ilaaihsha tahsh kii⁠onci maacaa i'imaa Cerahko ootenaank ekii ishaatc ootenaank Pehtal (Bethel) ecikaatenik. E⁠ani pimi ayaatc itahsh aaninta kwiiwisenhsa' ootenaank kiih⁠pi onciiwa' ekii'miihkinsomikotc e'ikotc, “Mitahskihtikwaan, ninkoci omaa onci'ishaan! Mitahskihtikwaan, ninkoci omaa onci ishaan!” ekii'ikotc.

²⁴ Miitahsh kaakiih kwehkikaapawitc ekiih kanawaapamaatc, ekii'inaatc kekoon ci⁠onci macihsenitc otishinihkaasowinink kaaTipencikenitc. Miihsh niishin noonshe mahkwa' kaakii mataapiinitc, ekiih piihsipinaanitc i'i niimitanashiniishin (42) kwiiwisenhsa'.

²⁵ Ilaaihsha tahsh weti kii‑ishaa kihci ishpatinaank Karmel (Carmel) ecikaatenik, paanimaa hsa naanaake Sameriya ootenaank kii⁠ani ishi kiiwe.