2 ᑲᕒᐃᑎᔭᓇᒃ 9 - Ojibwe Kihcimasina'ikan

Eshiwiici'intc kotak otanami'aa

¹ Kaawiin tahsh wiin memwehc cioshipii'amawinakook ciwiintamaakooyek, iki hsa kaaishiwiici'intwaa Kishemanitoon kaatipenimikowaatc Cootiiya (Judea) ahkiink kaa ayaawaatc.

² Aaniihsh ninkihkentaan ewii'wiitoohkaasoyek. Ninkii'wiintamawaak kaye weti Maahsitooniyaawahkiink (Macedonia) kaa‑ayaawaatc awiyak aaniihsh mooshak kiwii'wiitoohkaasom. O'o tahsh ekii'ihkitoyaan: “Kiitanami'aanaanik hsa Ahkeyaawahkiink (Achaia) kaa‑ayaawaatc pipoononk ihsa aasha kiihkiishihtaawak ewii'wiitoohkaasowaatc.” I'iweni tahsh ekii'waapantamowaatc aahpici ewii'wiitoohkaasoyek, miitahsh kewiinawaa peshikwan enentamowaatc ewii'ishihcikewaatc.

³ Mii hsa tahsh kaa'onci niikaaninisha'wakwaa oko kiitanami'aanaanik, cikiiwanimohsiwak i'i mooshak kaaishiminotashimikooyek. Mii hsa tahsh keyaapi ehkitoyaan, kikakiishihtaam iitok aasha ewii'miikiweyek.

⁴ Kiishpin tahsh pakamiwiiciiwakwaa Maahsatooniyaank kaaonciiwaatc, mihkaakooyek tahsh ekiihkiishiihtaahsiwek, aahpici nintaa⁠kihciakacimin. Kekiinawaa tahsh kitaa‑akacim, aaniihsh wiinke kikihci‑inenimininim!

⁵ Miitahsh kaa'onciniikaaninisha'wakwaa oko kiitanami'aanaanik ciotihsinekwaa cipwaa takohshinaan. Miitahsh cikiishioshiihtaanotamek i'i kaakii'ahshotamaakeyek ewii'miikiweyek. Ahpii weti pitakohshinaan aasha kikakiishihtaam. Miitahsh i'imaa keshinaakwahk ehsaakihtooyek e'miikiweyek, kaawiin wiin e'miikiweyek aaniihsh e'ishinaakwahk cimiikiweyek.

⁶ O'o tahsh kitinininim, awiya hsa pankii kaakihtikaatank kihtikaanenhsan, aahpici pankii okamoona'aanan kihtikaanan. A'a tahsh niipiwa' kaakihtikaatank kihtikaanenhsan aahpici niipiwa' okamoona'aanan kihtikaanan.

⁷ Awiya hsa cishimiikiwehpan minihk iko wiin enentank, kaawiin wiin cinishkentank, kaawiin wiin kaye ci‑inentank mii hsa miinawaa cimiikiweyaan. Kishemanitoo hsa oshawenimaan ini kaaminwentaminitc kiimiikiwenitc.

⁸ Kishemanitoo hsa okashkihtoon cimiininek awahshime ahpiihc wiin kaaishinoontehseyek, mooshak hsa weweni citepihseyek kaaishinoontehseyek, citepihseyek kaye kotak awiyak cimiinekwaa.

⁹ Kihcimasina'ikan hsa e'ishipii'ikaatek: “A'a hsa kwayahk inini kaamanaacihcikehsik e'miinaatc kaakitimaakisinitc. I'i hsa okwayahkohcikewin kaawiin wiihkaa tapoonihsehsinini.”

¹⁰ Kishemanitoo hsa kaamiinaatc kihtikewininiwan kihtikaanenhsini, pahkweshikanan kaye ciwiihsininitc, mii hsa keshimiininek i'i kihtikaanenhsini minihk kenoontehseyek. Miitahsh i'imaa kaashiminohcikeyek kimiikiwewiniwaank, mii hsa i'imaa keoncimaaciikihkin, aahpihci tahsh ciwenootisiyek ahpii moona'ikeyek.

¹¹ Kishemanitoo hsa kikamiinikowaa mooshak awahshime keyaapi nawac cimiikiweyek. Inashke tahsh ahpii hsa miinankitwaa awiyak i'i kimiikiwewiniwaan, okakihcimiikwehciwenimaawaan Kishemanitoon.

¹² I'i tahsh kaaishihcikeyek i'imaa kitanohkiiwiniwaank e'miikiweyek, mii hsa 'imaa wencikihcimamihcimintc Kishemanitoo.

¹³ Iki hsa kaawiici'ekwaa aahpici taminwentamook. Kaawiin ehta i'i kaashiminohcikeyek kiimiinekwaa kimiikiwewiniwaan, okamiikwehciwenimaawaan hsa Kishemanitoon e'naakohtooyek e'ishihcikeyek i'i kaaishitepwehtamek.

¹⁴ Aahpici hsa weweni kika anami'ehtamaakowaak aaniihsh wiinke Kishemanitoo okishewaatisiwin anohkiimakanini kipimaatisiwiniwaank.

¹⁵ Taka hsa miikwehc inaataa Kishemanitoo kaamihcimiininank kihcikekoonini!