2 ᑲᕒᐃᑎᔭᓇᒃ 8 - Ojibwe Kihcimasina'ikan

Otanami'aa kaashimiikiwetc

¹ Kiinawaa tahsh niitanami'aanaanik, kinantawenimikoom cikihkentamek aaniin Kishemanitoo okishewaatisiwin eshianohkiimakaninik pepahkaan otepwehtamook kaaishimaawaci'itiwaatc i'imaa Maahsitooniya (Macedonia) ahkiink.

² Aana tahsh wiin ekii'maashihsewaatc onsaam ekiihpaahtiinatinkin aanamisiwinan, shaakooc tahsh kaa'ahpiihciminwentamowaatc, aahpici hsa kii'minohcikewak ahpii e'miikiwewaatc shooniyaan aanawiin ehkiihkitimaakisiwaatc.

³ Kiwiintamawininim tahsh, ekii'miikiwewaatc tahsh minihk iko ehkokashkihtoowaatc, awahshime kaye kii'miikiwewak, wiinawaa hsa ko ekii'inentamowaatc.

⁴ Miitahsh ninkiihpakohsenimikonaanik, ninkiihkakwecimikonaanik kaye ewii'wiici'aawaatc i'i Kishemanitoo opimaatisiima' kaakitimaakisinitc Cootiiya (Judea) ahkiink kaa‑ayaanitc.

⁵ Awahshime tahsh kii ishihcikewak kaakii'ishi pakohsentamaankipan, pinamaa hsa okiih pakitinamawaawaan opimaatisiwiniwaan kaaTipencikenitc, kaye niinawint ninkiih pakitinamaakonaanik kaaishi antawentaminitc Kishemanitoon.

⁶ Mii hsa tahsh maano kaakii'oncikanoonankitc Taitahs (Titus) ciwiici'inek cikiishihtooyek ewii'naakohtooyek kisaaki'iwewiniwaa, wiin aaniihsh okiimaacihtoon i'i kipakitinikewiniwaa.

⁷ Aahpici hsa misiwe e'ishiwenootisiyek, i'imaa kitepwehtamowiniwaank, kikiikitowiniwaank, kikihkentamaawiniwaank, i'imaa kaye weweni kaaishiwiitoohkaasoyek, kaaishisaaki'iyaank tahsh keniinawint; miitahsh kaye eshiantawenimikooyek aahpici cinaakwahk kisaaki'iwewiniwaa o'o waa'ishiminohcikeyek.

⁸ Kaawiin tahsh wiin kekoon nintoonahtoohsiin aaniin keishihcikeyekipan! Kikii'wiintamawininim aaniin kewiinawaa otepwehtamook kaakii'ishiwiicihtwaawaatc ehpakitinikewaatc, keoncikihkentamaan aaniin mayaa kekiinawaa ehpiihcisaaki'iweyek.

⁹ Kikihkenimaawaa aaniin kaa‑ahpiihci kishewaatisitc Tepenciketc Ciisahs Christ, aanawiin ekii'wenootisitc, miitahsh kaa'ishi'itisotc cikitimaakisitc kiinawaa onci, i'imaa hsa okitimaakisiwinink kiinawaa cionci wenootisiyek.

¹⁰ Miitahsh niin enentamaan: aahpici taaonishihshin cikiishihtooyekipan i'i kaakii'maacihtooyek pipoononk. Kiinawaa aaniihsh nihtam kikii'maaciipakitinikem, ekii'minwentamek kaye ewii'ishihcikeyek.

¹¹ Kiishitook tahsh i'i anohkiiwin. Taapishkoo hsa kaakii'ishimoocikentamek kiimaacihtooyek, mii hsa peshikwan ishikiishihtook ciaapacihtooyek ini noonkom kaa ayaayek.

¹² Kiishpin hsa ciihkentamek e'miikiweyek, Kishemanitoo hsa okaotaahpinaanan kimiikiwewiniwaan aaniihsh i'imaa kekoonan kaa‑ayaayek kitooncimiikiwem, aaniihsh kaawiin memwehc kekoon kitaamiikiwehsiim kiishpin kekoon eyaahsiwek.

¹³ Kaawiin tahsh wiin iki kaawiici'ekwaa cimihciayayaawaatc, kiinawaa ehkihcianohkiiyek e'miinekwaa kekoon. Peshikwan iitok taaishiwiici'itim.

¹⁴ Aaniihsh mekwaa noonkom kiinawaa wiinke kiminohsem, e'wenootisiyek kaye, miitahsh eshinaakwahk ciwiici'ekwaa iki kaanoontehsewaatc. Ninkotink maawiin taishihse kiinawaa cinoontehseyek, wiinawaa tahsh ciwenootisiwaatc. Mii hsa tahsh wiinihtamawaa kikawiici'ikowaak. Miihsa tahsh pepeshikwan keshiwiitoohkotaatiyek.

¹⁵ Kihcimasina'ikan hsa e'ishipii'ikaatek: “Awiya niipiwa' kaakii'mooshakiniketc kaawiin niipiwa' awahshime kekoonini okii'ayaahsiin. A'a tahsh wiin pankii kaakii'mooshakiniketc kaawiin kii'manesihsii kekoonini.”

Taitahs, owiiciwaakana' kaye

¹⁶ Miikwehc hsa nintinaanaan Kishemanitoo ekii'miinaatc Taitahsan (Titus) kewiin peshikwan ci ishimoocikentaminitc ciwiici'iminek taapishkoo niinawint kaawii'ishiwiici'ikooyek.

¹⁷ Shemaak tahsh kaye kii'inentam ewii'ishihciketc kaakii'inankitc, wiin hsa ko ekii'inentank ewii'wiicihtwaatc, aahpic kaye ekii'inentank ewii'antawaapaminek.

¹⁸ Otihsinek itahsh okapakamiwiiciiwaan ini kaakihtenimimintc kiitanami'aanaanin. Niinawint hsa ninkii'ishinisha'waanaan a'a kiitanami'aanaan, aaniihsh aahpici kihtenimaa i'imaa pepahkaan kaaishimaawaci'itiwaatc otepwehtamook otanohkiiwinink onci kaye ehkakiihkwaatank minwaacimowinini.

¹⁹ Kaye tahsh i'imaa otepwehtamook kaaishimaamaawaci'itiwaatc kii'otaahpinikaniwi ekii'inakimintc kaye ciwiiciiwinankitc ehpimiwitooyaank saaki'iwewinink kaaonciimakahkin pakitinikewinan, kaanaakacihtooyaank kaaTipenciketc hsa cioncikihci‑inentaakositc, enaakohtooyaank itahsh kaye e'antawentamaank ewii'wiitoohkaasoyaank.

²⁰ Aahpici tahsh nintayaankwaamihcikemin o'o kaaonci ishihcikeyaank. Kaawiin aaniihsh ninantawenimaahsiwaanaan awiya ci‑inentank kwayahk e'naanaakacihtoohsiwaank o'o kaawenootahk pakitinikewin.

²¹ Miitahsh maawac eshimihsawentamaank kwayahk ewii'ishihcikeyaank. Kaawiin wiin ehta kaaTipenciketc ciminwaapantank, ininiwak hsa kaye ciminwaapantamowaatc.

²² Miinawaa tahsh kotak peshik niitanami'aanaan nin tako ishinisha'waanaan cipiwiiciiwikotc i'i kaa‑antawaapamiminek. Ninkii'antakihkenimaanaan hsa mooshak, ninkihkenimaanaan kaye aahpici ewii'wiitoohkaasotc. Aasha tahsh kikehcinaa'ikowaa, miitahsh awahshime kaaoncimoocikentank ewii'wiitoohkaasotc.

²³ Taitahs tahsh wiin, mii hsa a'a niwiiciiwaakan, e'wiitanohkiimitc o'o kaawiici'ikooyek. Iki tahsh kotak niishin kiitanami'aanaanik kaawiihpiwiiciiwaawaatc Taitahsan otishiinisha'okowaa' otepwehtamoo' pepahkaan kaaishimaawaci'itinitc. Kaye opimaatisiwiniwaank Christ oncikihci‑inenimaa.

²⁴ Waapanta'ihkok tahsh ehsaaki'ekwaa. Kehcinaac hsa misiwe kaa‑ayaawaatc otepwehtamook cikihkentamowaatc ehtepweyaank ihsa kaaishiminotashimikooyek mooshak.