2 ᑲᕒᐃᑎᔭᓇᒃ 6 - Ojibwe Kihcimasina'ikan

¹ I'imaa hsa kaaishiwiitanohkiimankitc a'a Kishemanitoo, miitahsh eshipakohsenimikooyek kiinawaa aasha kaakii'miininek Kishemanitoo okishewaatisiwin, keko anihshaa otaahpinamowaahkek.

² Kishemanitoo hsa ihkito: “Ahpii hsa ekii'ocihcihsek ciwaapanta'inakook niminohcikewin, kikii'noontawininim. Ahpii hsa ekii'ishikiishikahk cipimaaci'inakook, kikii'wiici'ininim.” Inashke pisintamohk! Tipa'ikan ohsha aasha kii'ocihcihse citepinamowek Kishemanitoo ominohcikewin, mii hsa noonkom kaakiishikahk eshikiishikahk cipimaaci'ikooyek!

Pwaal kwayahk ekii'ishinaakwaninik otanohkiiwin

³ Aahpici tahsh nintayaankwaamisimin cikipishkawaahsiwankitc awiya, aaniihsh kaawiin ninantawenimaahsiwaanaan awiya cimihkank macikekoonini i'imaa nintanohkiiwininaanink.

⁴ Mii hsa eshinaakohtooyaank Kishemanitoo e'anohkiihtawankitc i'imaa kaaishishashiipentamaank ini aanimisiwinan, kaaishikakwaatakihseyaank, kaaishisanakihseyaank kaye.

⁵ Ekiihpahpahkihte'okooyaank, ekiihkipa'okooyaank, ekii'maamawiotihtinikooyaank, mooshak kaye ehkaashihpo anohkiiyaank, ekaa e'nipaahsiwaank kaye mooshak, miicim kaye ekaa ekii'ayaahsiwaank.

⁶ Pehkaatisiwinink, kihkentamaawinink, shashiipentamowinink, minotootaatiwinink kaye, mii hsa i'imaa eshinaakohtooyaank Kishemanitoo otanohkii'aakana' ehtinoowiyaank; i'imaa kaye Kishemanitoo otAhcaahkwan e'wiitanohkiimiyamintc, tepwe kaye kaaishisaaki'iweyaank;

⁷ i'imaa kaye kaaishitipaatotamaank tepwewin, Kishemanitoo kaye omashkawisiiwinink. Mii hsa i'i kwayahkwaatisiwin kaa‑aapacihtooyaank kiimiikaasoyaank, mii kaye 'iwe kaa‑aapacihtooyaank kiinaatamaasoyaank.

⁸ Ninkotink tahsh ninkihtenimikoomin, ninkotink kaye kaawiin sesik nintootaakoohsiimin, ninkotink noociko nintikoomin, ninkotink kaye niminotashimikoomin. Taapishkoo hsa ehkakiinawishkiyaank nintootaakoomin aanawiin ehtashintamaank tepwewin.

⁹ Miitahsh entootaakooyaank taapishkoo ehkihkenimikoohsiwaank, shaakooc tahsh kahkina awiyak ninkihkenimikonaanik. Taapishkoo kaye e'ishinaakosiyaank e'nipoyaank, shaakooc tahsh nimpimaatisimin kaaishiwaapamiyaank. Ehkakwaataki'ikooyaank kaye, kaawiin tahsh mahshi ninihsikoohsiimin.

¹⁰ Aana kaye e'macentamaank shaakooc tahsh mooshak ninciihkentaamin. Ehkitimaakinaakosiyaank kaye, shaakooc tahsh nipiwa' pemaatisiwaatc niwenootisi'aanaanik. E'ishinaakosiyaank kaye kekoon e'ayaahsiwaank, shaakooc tahsh kahkina kekoon nintayaamin.

¹¹ Kiinawaa hsa weti Kwaarintink (Corinth) kaa‑ayaayek, waa'ikooyek hsa kikii'ikoom, kikiihpaahkinamaakoom ninte'inaanin ehsaaki'ikooyek.

¹² Kaawiin tahsh niinawint kaakiihkipa'amaakooyek ninte'inaanin, kiinawaa ohsha kaakiihkipa'amawiyaank kite'iwaan.

¹³ Taapishkoo tahsh e'oniicaanihsiminakook kitishikanoonininim – kekiinawaa tahsh waapanta'ihshinaam ewiihsaakiwiiciiwihshiyaank, otaahpinihshinaam kite'iwaank.

Keko wiin saakihtoohkek kaamacinaakwahkin

¹⁴ Keko wiin peshikwan ishikakwewiiciiwaahkekwaanik iki kaatepwehtansikwaa, aaniihsh kaawiin taaishihsehsinoon. Taaishinaakwan ina ciniishinkipanen i'i kwayahkwaatisiwin i'i tahsh macipimaatisiwin? Tawiiciintiimakanoon ina i'i kaawaahseyaak i'i tahsh kaakashkiitipihkahk?

¹⁵ Peshikwan ina Christ a'a tahsh kaye maciaya'aa taainentamook? Peshikwan ina ishihcikewak a'a kaatepwehtank a'a kaye kaatepwehtansik?

¹⁶ Kishemanitoo na okihcianami'ewikamik ishihcikemakanini, kaaishihcikenitc i'i manitoohkaana'? Kiinawint hsa kaaPimaatisitc Kishemanitoo okihcianami'ewikamik! Kishemanitoo hsa wiin ekii'ihkitotc: “Ninkawiicikapehshiimaak hsa iki kaatipenimakwaa pemaatisiwaatc, ninkawiicitaamaak kaye mekweya'ii, Ninkaomanitoomikook tahsh, kewiinawaa tahsh ninkatipenimaak.”

¹⁷ KaaTipenciketc hsa e'ihkitotc: “Nakanihkwak, pahkaan kiinawaa ishipimaatisik, Keko wiin papaamentankek kekoon kaawiinentaakwahk. Miitahsh keshiotaahpininakook,

¹⁸ KikaoTetemim itahsh, kiinawaa tahsh kikaokosihsimininim, kikaotaanihsimininim kaye, kii'ihkito kaaTipenciketc kaaMaamawi mashkawisiitc.”