2 ᑲᕒᐃᑎᔭᓇᒃ 2 - Ojibwe Kihcimasina'ikan

¹ Miitahsh kaakii'onci‑inentamaan ciantawaapamihsinowinakook miinawaa, maakishaa hsa kitaaoncimaanentaam.

² Aaniihsh kiishpin oncimaanentamekipan e'waapaminakook, awenen tahsh awiya keminwentami'ihpan, aaniihsh kahkina nintaamaanentamo'aak kekiiminwentami'iwaahpan.

³ Miitahsh kaakii'onci oshipii'amawinakook, kaawiin ninkii'inentansii ahpii otihsinakook cimaanentami'iwaahpan iki pemaatisiwaatc kekiiminwentami'iwaahpan. Miitahsh eshikehcinaa'oyaan kiishpin kiiminwentamaan kekiinawaa e'minwentamek.

⁴ Ahpii hsa kii'oshipii'amawinakook, aahpici ninkiihkihcimikoshkaatentam, ekiihkosikote'eyaan kaye, aaniihsh kaawiin nintinentansii ewii'maanentami'inakook. I'i hsa ciwaapantamek cikihkentamek kaye aaniin ehpiihcisaaki'inakook.

Keshipoonentamawintc a'a kaamacitootawinek

⁵ Kiishpin tahsh awiya kiimaanentami'iwetc, kaawiin tahsh niin ehta ninkii'maanentansii, kekiinawaa hsa kahkina kaatahshiyek kikii'maanentaam. Miitahsh kaaonci‑ihkitoyaan, kaawiin nintinentansii cisanaki'ak.

⁶ Miitahsh wa'a kaakiihtootawinek, aasha teminihk kikiihkakwaataki'aawaa i'i kaakiihtootawek.

⁷ Noonkom itahsh poonentamawihk, kanoonihk kaye weweni cipimaatisitc; maakishaa o'o tootawaahsiwek tanimaanentam piinihsh kaye wiinke tanipakicii.

⁸ Miitahsh eshipakohsenimininakook, cikihkentank wiinke ehsaaki'ek.

⁹ Kikii'oshipii'amawininim hsa o'o oshipii'ikan ekii'antakihkenimininakook kiishpin tepwe mooshak ciahshwiiyek ci‑ishihcikeyek i'i kaakii'ishikihkino'amawinakook.

¹⁰ Ahpii hsa kiipoonentamawek awiya aaniin iko kaakii'ishihciketc, keniin hsa nimpoonentamawaa. Ahpii hsa keniin kiipoonentamaakeyaan, kiishpin kota kiiayaak kekoon cipoonentamaan, nintishihcike hsa o'o Christ enaahsamiitc kiinawaa onci.

¹¹ Aaniihsh kaawiin kinantawenimaahsiwaanaan maciaya'aa Setan cishaakooci'inank. Kikihkentamowaamin aaniihsh aaniin waa'ani‑ishihciketc.

Pwaal ekii'ocaanimentank i'imaa Caroowahsink

¹² Ahpii hsa ekiihtakohshinaan weti Caroowahs (Troas) ootenaank ewiihkakiihkwaatamaan minwaacimowin ewiihtashimak Christ, ninkii'ishimihkaan hsa aasha kaaTipenciketc ekiihtawinamawitc pisaan iko niin cianohkiiwak.

¹³ Miitahsh i'i kaa'ocaanimentamaan aaniihsh kaawiin ninkii'mihkawaahsii niitanami'aa Taitahs (Titus). Miitahsh ninkiihpooshoo'aak pemaatisiwaatc weti ekii'nakanakwaa, Maahsitooniya (Macedonia) ahkiink inahke ekii'ani‑ishimaacaayaan.

Christ kaamiininank shaakoocihtwaawin

¹⁴ Taka miikwehciwenimaataa Kishemanitoo. Wiin iitok kaakii'ishinaakosi'iyamintc ci‑ishinaakosiyaank tahkonikanak kaapimiwinintwaa Christ e'niikaaniitc ekiihshaakoocihtwaatc. Wiin nintaapaci'ikonaan misiwe cioncikihkenimintc taapishkoo kekoon kaaminomaakwahk.

¹⁵ Christ nintaapaci'ikonaan e'minaahsamawintc Kishemanitoo. Iki tahsh kaapimaaci'intwaa iki kaye kaani nihshiwanaatisiwaatc ominaantaanaawaa minaahsikan.

¹⁶ Iki aaniihsh kaaninihshiwanaatisiwaatc taapishkoo nipowinink otishimaantaanaawaa, iki tahsh kaapimaci'intwaa, pimaatisiwinink otishimaantaanaawaa. Awenen tahsh ketepihsehpan o'owe ci‑inanohkiitc?

¹⁷ Kaawiin itahsh wiin nintootansiimin i'i Kishemanitoo otihkitowin taapishkoo aaninta kaapaahtiinowaatc kaatootamowaatc ewii'ontinaawaatc tepinaahk shooniyaan. Kaawiin niinawint i'i nintishihcikehsiimin. Aaniihsh Kishemanitoo ninkii'ishinisha'okonaan weweni cikaakiikitoyaank enaahsamiitc, taapishkoo Christ otanohkii'aakana'.