2 ᑲᕒᐃᑎᔭᓇᒃ 13 - Ojibwe Kihcimasina'ikan

Pwaal ekii'ayaankwaamimaatc, ekiihpooshoo'aatc kaye

¹ Miitahsh o'o nihsink (3) aasha e'ishihsek ewiihpiantawaapaminakook. Kihcimasina'ikan hsa e'ishipii'ikaatek: “Kiishpin niishiwaatc (2) komaa kaye nihsiwaatc (3) awiyak mii hsa citepwehtawintwaa tipaatotamowaatc kaakii'waapantamowaatc.”

² Kiwiintamawininim tahsh kiinawaa kaakii'macitootamek, iki kaye kotak kaakii'macitootamowaatc otaanaank. Mihsawaa ko weti ayaahsiwaan kaaishiayaayek, mii hsa miinawaa peshikwan eninakook kaakii'ininakookipan ishkwaac weti kii'ayaayaan. Ahpii hsa weti takohshinaan, kaawiin hsa tashaapwiihsiiwak iki kaawiihkihcinooci'akwaa.

³ Kahkina hsa kekoon kinantawaapantaam keoncikihkentamek Christ e'aapaci'itc kekoonini kiiwii'ihkitotc. Ahpii tahsh kanooninek kikawaapamaawaa hsa e'mashkawisiitc, aaniihsh kaawiin maciiwakiihsii.

⁴ Kehcinaac hsa taapishkoo e'maciiwakiitc kii'ishinaakosi ahpii Christ kiiakosaka'ontc i'imaa aashiteyaahtikonk. Noonkom tahsh Kishemanitoon omashkawisiiwininiink ishipimaatisi. Keniinawint hsa e'wiiciiwankitc Christ mii hsa peshikwan eshinaakosiyaank e'maciiwakiiyaank. I'imaa tahsh wiin Kishemanitoo omashkawisiiwinink ninkaishiwiicipimaatisiimaanaan Christ, ahpii wiiciiwikooyek.

⁵ Taka antakihkenintisok, kanawaapantisok kaye tepweyentamowinink ci‑ishipimaatisiyek. Kikihkentaam maawiin siyaaken Ciisahs Christ ehkikishkawek. Komaa kaye aasha kaahpapwaanawihcikewekopanen.

⁶ Miitahsh eshikehcinaa'oyaan cikihkenimiyaank keniinawint ekiihpwaanawihcikehsiwaank ciminwaapamikooyaank.

⁷ Miitahsh eshianami'ehtawankitc Kishemanitoo kiinawaa ekaa noociko ci‑ishihcikehsiwek. Kaawiin wiin e'antawentamaank nintanohkiiwininaan ciminonaakwahk. Kiinawaa hsa weweni cipimaatisiyek, aana maawiin ishinaakosiyaank niinawint ekiihpwaanawihcikeyaank.

⁸ Kaawiin aaniihsh kekoon nintaatootansiimin cikipihtinamaank i'i tepwewin, mii ehta ko eshihcikeyaank ewiicihtooyaank cimaaciishkaak.

⁹ Niminwentaamin kaye niinawint e'ishinaakosiyaank e'mashkawisiihsiwaank, kiinawaa tahsh e'mashkawisiiyek. Mii kaye eshianami'ehtamaakooyek misiwe kwayahk cini‑ishinaakosiyek.

¹⁰ Miitahsh kaaoncioshipii'amawinakook mekwaa waahsa e'ayaayaan. Kaawiin hsa nintinentansii cikihcinooci'inakook cikii'aapacihtaawakipan Kishemanitoo okashki'ewisiwinini kaakii'miishitc. Mii 'i aaniihsh kaakii'oncimiinikooyaank kiinawaa ciwiici'ikooyek, ciompikiyek kaye, kaawiin wiin cipiikopinikooyek.

¹¹ Pooshoo tahsh kitinininim niicitepwehtamook! Wiinke hsa kwayahk kakwekwayahkwaatisik! Pisintamok kaaihkitoyaan. Weweni kaye pisintaatik aaniin ehkitoyek. Weweni kaye wiiciintik. Kishemanitoo hsa kaasaaki'iwetc, kaamiikiwetc kaye pisaanisiwin kikawiiciiwikowaa!

¹² Otepwehtamook anami'e ociimihkok kaapooshoo'ekwaa, mii nahke ishipooshoo'itik. Kahkina hsa Kishemanitoo ominwaatisiima' kipooshoo'ikowaak.

¹³ KaaTipenciketc Ciisahs Christ okishewaatisiwin, Kishemanitoo kaye osaaki'iwewin, Kishemanitoo otAhcaahkwan kaye ominowiiciiwiwewinini kikawiiciiwikom kahkina kaatahshiyek.