2 ᑲᕒᐃᑎᔭᓇᒃ 10 - Ojibwe Kihcimasina'ikan

Pwaal ekiihtashintank otanami'ewanohkiiwin

¹ Niin ihsa piko Pwaal (Paul) e'ishiyek tahsh ehkohtaaciyaan ahpii weti kii'ayaayaan weti kaaishiayaayek, aahpici tahsh e'aahkwaatisiihkantawinakook waahsa kii'ayaayaan. Kitishikakwecimininim tahsh i'imaa Christ enoohkaatisitc eminwaatisitc kaye.

² Keko kekoon ci‑ishihcikehsiwek keonci aahkwaatisiihkantawinakook ahpii otihsinakook. Ninkihkentaan kaye cikashkihtooyaampaan cinana'ahsakwaa “Ahkiink ohsha otoontinaanaawaa kaaishihcikewaatc” kaaishiyamintwaa.

³ Tepwe hsa kiwiiyawinaanink kitishipimaatisimin. Kaawiin tahsh wiin ahkiiwi miikaasowin kitaapacihtoohsiimin.

⁴ Kaawiin tahsh wiin ahkiiwi aapacihtaakanan nintaapacihtoohsiimin i'i e'miikaasoyaank. Kishemanitoo hsa kaamashkawisiimakaninikin omiikaasowi aapacihtaakanan nintaapacihtaawaamin, cinihshiwanaacihtaawankitc kaamashkawentaakwaninikin owaahkaa'ikanan kaamiikaaninank.

⁵ Ninkanihshiwanaacihtoomin kaye ini macikiihkaantiwinan. Ini hsa kaye ninkapiikonaamin kaakihci‑inenintisoomakahkin kekoonan kaamiitaakweshkaakemakahkin cikihkenimaahsiwintc Kishemanitoo, kahkina kaye inentamowinan ninkihciwinaamin Christ cina'ihtaakotc.

⁶ Ahpii tahsh kiihkehcinaa'ikooyek aasha ekii'na'ihtamek, aasha ohsha ninkiihkiishihtaamin ewii'nihshiwanaacihtooyaank kahkina shashiipihtamowin.

⁷ Kiinawaa tahsh wiin akwaciink ehta kitishikanawaapantaam. Awiya na weti ayaa e'inenintisotc Christink e'ishitipentaakositc? Taka miinawaa tanaanaakatawenintiso aaniihsh mii peshikwan keniinawint Christink nintishitipentaakosimin taapishkoo kewiin kaaishitipentaakositc.

⁸ Kaawiin tahsh ninshaakwenimohsii niipiwa' tashintamawinakook kaaTipenciketc kaakii'miininankitc kashki'ewisiwin. Kiinawaa hsa ciompikiyek kaakii'oncimiinikooyaank, kaawiin wiin ewii'nihshiwanaaci'ikooyek.

⁹ Kaawiin tahsh wiin ninantawentansiin ci‑ishinakosiyaan taapishkoo ehkakweseki'inakook nintooshipii'ikanan e'aapacihtooyaan.

¹⁰ E'ihkitowaatc hsa kaye: “Aahpici hsa niipiwa' ishipii'ike i'imaa otooshipii'ikanink, aahpici kaye mashkawikiishwemakaniniwan. Kiishpin tahsh wiiyawink kiiwaapamankitc o'omaa kiiayaatc, aahpici hsa macentaakosi, i'i kaye kaaihkitotc kaawiin kekoon ahpiihtentaakwahsinini,” nintikook.

¹¹ Taka keko o'o awiya tainentansii! Aaniihsh kaaishimashkawipii'ikeyaank i'imaa nintooshipii'ikaninaanink, mii hsa peshikwan keshimashkawikiishweyaank ahpii waapamikooyek.

¹² Kaawiin tahsh wiin nintaaishihcikehsiimin ci‑inenintisoyaank taapishkoo hsa iki kaaishi‑ishpenintisowaatc, aahpici kaye ehkakiipaatisiwaatc. Wiinawaa hsa kaye e'oshihtoowaatc aaniin waa'ishitipaapantisowaatc. Miitahsh i'imaa kaye eshitipaapantisowaatc.

¹³ Niinawint itahsh wiin kaawiin awahshime ninkatashintisohsiimin, aaniihsh Kishemanitoo kaakii'ishionahtamawiyamintc ehta ninkaihkitomin. Miitahsh kaye peshikwan eshihcikeyaank i'imaa kaaishianohkiiyaank weti kaaishiayaayek.

¹⁴ Kiinawaa tahsh i'imaa e'ayaayek Kishemanitoo kaakii'ishionahtamawinankitc, kaawiin hsa awahshime ninkii'ishihcikehsiimin ahpii kaakii'otihsikooyek, ekii'wiintamaakooyek i'i minwaacimowin Christ kaaishitashinsotc.

¹⁵ Kaawiin kaye niwiihtashintamowaahsiimin otanohkiiwiniwaan ikiweniwak kotak kaakakiihkwewaatc, Kishemanitoo kaakii'ishi onahtamawinankitc ehta nintashintamowaamin. Awahshime hsa nimpakohsentaamin cimaaciikihkin kitepwehtamowiniwaan, awahshime cianohkiiyaank i'imaa kaaishiayaayek, cipiminisha'amawankitc Kishemanitoo kaakii'ishimiishiyamintc.

¹⁶ Miitahsh kaye ewiihkakiihkwaatamaank i'i minwaacimowin pepahkaan ahkiink nawac iko waahsa ewii'ishaayaank. Kaawiin tahsh kaye kotak inini otanohkiiwin kaakii'miinintc niwiihtashintamowaahsiimin.

¹⁷ Kihcimasina'ikan tahsh e'ishipii'ikaatek: “Awiya hsa kekoonini kaawiihtashintank taka okatashintaan aaniin kaaTipencikenitc kaakii'ishihcikenitc.”

¹⁸ Awiya hsa kii'inentank ekii'minotootank kaawiin wiin i'imaa onciminwakimaahsii. Paanimaa hsa kaaTipencikenitc kii'inenimikotc, miitahsh i'i payesh e'minwaakimintc.