2 ᑲᕒᐃᑎᔭᓇᒃ 1 - Ojibwe Kihcimasina'ikan

¹ Niin Pwaal Ciisahs Christ otishinisha'waakanan Kishemanitoo kaakii'inentank, Timahti (Timothy) kiitanami'aanaan hsa niwiiciiwaa. Kitooshipii'amawininim kiinawaa otepwehtamook Kwaarintink (Corinth) kaaishimaawaci'itiyek, Kishemanitoo kaatipeniminek, kahkina kaye Kishemanitoo kaatipenimaatc pemaatisinitc misiwe kaa‑ayaanitc weti Ahkeyaawahkiink (Achaia).

² Taka Kishemanitoo Koohsinaan, kaaTipenciketc Ciisahs Christ kaye kikakishewaatisiihkantaakowaa; pisaanisiwinini kaye kikamiinikowaa.

Pwaal omiikwehciwi'aan Kishemanitoon

³ Taka miikwehciwenimaataa Kishemanitoo, kaaTipenciketc Ciisahs Christ Kaaoyoohsitc, kaashawenciketc Weyoohsimintc, aaniihsh mii 'i weti kahkina wenciik naatamaakoowin.

⁴ Niwiici'ikonaan hsa kiiwawaanentamimaashihseyaank, keniinawint ciwiici'ankitwaa kotak iki wiinke kaakakwaatakimaashihsewaatc, ciaapacihtoowaatc hsa i'i wiici'ikoowin Kishemanitoonk kaakii'ontinamaank.

⁵ Taapishkoo hsa kaashi wiici kakwaatakihtoomankitc a'a Christ okakwaatakihtoowinink, mii hsa peshikwan i'imaa Christink Kishemanitoo ninkawiici'ikonaan.

⁶ Kiishpin kakwaatakihtooyaank, mii hsa kaaoncikakwaatakihtooyaank, kiinawaa ciwiici'ikooyek cipimaaci'ikoowisiyek kaye. Kiishpin tahsh wiici'ikooyaank, miitahsh kekiinawaa ciwiici'ikoowisiyek, e'miinikooyek mashkawisiiwin cikashkihtooyek cishashiipentamek ini kikakwaatakihtoowiniwaan, keniinawint kaashikakwaatakihtooyaank.

⁷ Kehcinaac itahsh kitepweyenimikoom ehkihkenimikooyek kekiinawaa e'ishikakwaatakihtooyek taapishkoo kaaishikakwaatakihtooyaank, kaye e'ishiwiici'ikoowisiyek taapishkoo kaashiwiici'ikooyaank.

⁸ Niitanami'aanaanik! Kiwii'wiintamaakoom aahpici ekiihkakwaatakihtooyaank weti Eshaawahkiink (Asia) kiiayaayaank, mii hsa kaa'ahpiihcimihcaakin ini kakwaatakihtoowinan, ekiihkosikwentaakwahkin kaye kaakii'miinikooyaank, mii hsa kaa'inentamaank kehcinaac mii 'i cinipoyaank.

⁹ Miitahsh kaa'ishinaakosiyaank taapishkoo ekii'inakimikooyaank cinipoyaank. Miitahsh o'o kaakii'onci‑ishihseyaank, a'a hsa Kishemanitoo ciahpenimoyaank kaakiiwepimaatisi'aatc kaaniponitc, kaawiin wiin niinawint ciahpenimonotaasohsiwaank.

¹⁰ Aahpici tahsh ninkiihpehshwaapantaamin i'i nipowin. Kishemanitoo tahsh ninkiihshaapwii'ikonaan. Kaye ninkashaapwii'ikonaan. Wiin tahsh nintahpenimonotawaanaan miinawaa cinishaapwii'iyamintc.

¹¹ Kekiinawaa hsa kiwiici'ihshinaam kiianami'ehtamawiyaank. Mii hsa kaye eshinaakwahk kaapaahtiinatinkin kaakii'ishi⁠anami'ehtamawiyaank hsa tanahkwehcikaatewan, Kishemanitoo tahsh ninkashawenimikonaan. Aahpici hsa tapaahtiinowak kenanaahkomiwewaatc niinawint onci.

Pwaal ekii'aantentank waa'ishihcikehpan

¹² O'owe tahsh wiinke ninkihci‑inentaamin, ehkihkenintisoyaank kwayahk ekii'ishipimaatisiyaank o'omaa ahkiink, kwayahk kaye ekii'wiiciiwikooyek. Aahpici hsa weweni kikii'wiiciiwikoom, aaniihsh Kishemanitoo okishewaatisiwin ninkii'wiici'ikomin. Kaawiin wiin ininiiwi⁠kakiihtaawentamowin ninkii'wiici'ikohsiimin.

¹³ Keshianamihtooyek, keshinihsitohtamek ihsa ehta kitishipii'amaakoom, miitahsh eshipakohsenimikooyek cinihsitohtamek piinihsh weti ishkwaac.

¹⁴ Aanawiin pankii ehta e'nihsitohtawiyaank, kiinawaa ohsha cishikihci‑inenimiyaank taapishkoo keshikihci‑inenimikooyek ahpii Ciisahs kaaTipenciketc pitakohshink.

¹⁵ Nihtam hsa kehcinaac ninkii'inentaanaapan ewii'mawatihsinakook cionciminwentamek niishwaa.

¹⁶ Weti hsa Maahsitooniya (Macedonia) ahkiink kaawii'ishaayaampaan, ninkii'inentaanaapan ewii'waapaminakook, miinawaa pikiiweyaampaan ewii'waapaminakookipan cikii'wiici'iyekipan weti kaawii'ishaayaampaan Cootiiya (Judea) ahkiink.

¹⁷ O'o hsa ekii'ishihcikehsiwaan kaakii'inentamaampaan, mii na'i kaa'ishinaakosiyaan taapishkoo kekoon ehta e'mihci‑inentamaan, e'ishihcikehsiwaan kaakii'inentamaan? Taapishkoo e'mihciwawaanentamaan ina nintishinaakos? Mii na'i eshinaakosiyaan “mii nanke” kii‑ihkitoyaan, ehtootansiwaan tahsh i'i kaakii'ihkitoyaan?

¹⁸ Kehcinaac hsa Kishemanitoo kaashitepweyentaakositc, mii hsa 'iwe keniinawint eshitepweyaank kaainaacimohtaakooyek.

¹⁹ A'a hsa Ciisahs Christ Kishemanitoo oKosihsan kaakiihkakiihkwaanankitc Timahti (Timothy), Saailahs (Silas), keniin tahsh, kaawiin wiin Christ kaamihciwawaanentaakositc, wiin ihsa a'a Tepwewin.

²⁰ Mii hsa a'a kaatepweyentamohtootc kahkina Kishemanitoon otahshotamaakewinini. Miitahsh “emen” wenci‑ihkitoyaank, Christ Ciisahs ehtepweyenimankitc. Mii hsa eshinaakwahk e'naakohtaawankitc Kishemanitoo okihci‑inentaakosiwin.

²¹ Wiin ohsha Kishemanitoo otishihcikewin kaaoncimashkawikaapawiyaank, kaye kiinawaa kaaoncimashkawikaapawiyek Christ e'wiiciiwinank. Kishemanitoo ohsha pahkaan kikii'ishioninikonaan ci‑inanohkawank.

²² Wiin ohsha Kishemanitoo kikii'miinikonaan otAhcaahkwan, ekii'ishikihkinawaaci'inank, taapishkoo ekiihkihciwitipa'ank, ninkotink kehcinaac citipentamowank kaakii'ahshotamawinank.

²³ Kishemanitoo hsa kitaawiintamaakowaa ehtepweyaan kaaihkitoyaan, okihkentaan kaye enentamowak. Ekaa cimaanentansiwek ohsha kaakii'oncipiishaahsiwaan Kwaarintink (Corinth).

²⁴ Kaawiin wiin ninkakwetipentansiimin kitepwehtamowiniwaa. Ninkihkentaamin hsa e'mashkawikaapawiyek i'imaa kitepwehtamowiniwaank. Kiwiitanohkiimikoom kaye awahshime ciminwentamek.