1 Timahti 6 - Ojibwe Kihcimasina'ikan

¹ Kahkina awiya kaaotanohkii'aakaniwitc wiinke okakihtakimaan ini otookimaaman kaatipenimikotc, ekaa awiyan cimacikiishwaatansinik owiinsowinini Kishemanitoon, i'iweni kaye kaaishikihkino'amaakeyank.

² Awiya tahsh kaaotanohkii'aakanimikotc otepwehtamoon, mii 'i e'ishiwiicihkiweyenimaatc, kaawiin itahsh okaonci⁠macakimaahsiin otookimaaman. Taka awahshime 'i takakweminoanohkii, aaniihsh otepwehtamoon ini kaawiici'aatc, ehsaaki'aatc. Miiwan ono ishikihkino'amaaken, ishikakaansonken.

Pahkaan kihkino'amaakewin, kwayahk wenootisiwin ehtashintekin

³ Maakishaa awiya wiihpahkaani‑⁠kihkino'amaaketc peshikwan kaaishihsitoohsik i'i kaamayaawihsininik kihkino'ikewin. Wiin itahsh iko nintoontinaamin tipinawe e'otihkitowinitc kaaTipeniminank Ciisahs Christ. Mii 'iwe kihkino'amaakewin kaaishikihkino'amaakemakahk aaniin kwayahk keshianami'ewaatisink.

⁴ Awiya tahsh pahkaan kaaishihsitootc okihkino'amaakewin, ishpenintiso, ekaa tepwe kekoon ehkihkentansik. Onsaam onantamihkwentaanan kaasanakaninikin citashintenikin, e'oshihtootc kaye cioncikakwe‑⁠shaakosontinaaniwaninik aaniin keshinihsitohtaakwaninikin ihkitowinan. Mii 'omaa ono wencihsekin ontenintiwin, pahkaanenintiwin, paahpinotaakewin, macikekoonan kaaishianaamenintink.

⁵ Mooshak itahsh kaye maashiwiiciintiwak. Miiwak oko kaanihshiwanaaci⁠naanaakatawentamowaatc. Kaawiin keyaapi owiiciiwikohsiinaawaa i'i tepwewin. Inentamook itahsh cionciontisiwaahpan otanami'aawiniwaank.

⁶ Tepwe hsa awiya okawenootisiinotaan i'i otanami'aawin, kiishpin tepihsewakentank 'iwe minihk kaa‑ayaatc.

⁷ Wekonen i'i kaahpikikisiyank o'omaa ahkiink? Kaawiin kekoon! Wekonehsh kaye i'i kenimaaciitooyank? Kaawiin kekoon.

⁸ Mii 'iwe, kiishpin iniweniwan ayaayank, miicim, kikishkikan, mii 'i keshina'entamankipan.

⁹ Iki tahsh kaawii'aahkowenootisiwaatc, ahpan iko okapatakoshkaakonaawaa cikashki'ikowaatc i'i macihcikewin, ewiihtahsoonikowaatc macikekoonan kaaishimihsawentamowaatc ehkakiipaatentaakwaninikin. Mii ko 'i piinihsh ewii'ishi⁠niihsipinikowaatc keshipanaatisiwaatc ewii'nihshiwanaatisiwaatc.

¹⁰ Ina, e'onsaamenimintc shooniyaa mii 'iwe enentaakwahk e'ociipihkaawank kahkina wencisaakikinkin macikekoonan. Aaninta tahsh awiyak e'ahpiihci mihsawenimaawaatc shooniyaan okii'wawaanaayentami'ikowaan, ekii'onci⁠aanawentamowaatc otepweyentamowiniwaa, mii piinihsh ehpiikwentami'itisowaatc niipiwa' kekoon e'mincinawesiwaatc.

Wiin Timahti e'wiintamawintc keshipimaatisitc

¹¹ Kiin itahsh kaa‑anohkawatc Kishemanitoo, kahkina oshimonotan ono macikekoonan. Kakwe nakaciinotan minoishiwepisiwin, kwayahk anami'ewaatisiwin, tepweyentamowin, saaki'itiwin, mashkawentamowin, noohkaac ci‑inaatisiyan kaye.

¹² Minokakwecihkanitiwin hsa inentaakwan i'i kitepwehtamowin. Mii 'imaa ishikakwe⁠pahkinaaken pimaatisiwin cimiinikooyan keishkwaahsehsinok. Mii 'owe pimaatisiwin kaakii'ishiantomihk Kishemanitoo ciontinamowatc, 'iwe ahpii kaakii'minowiintaman kaaishitepwehtaman, niipiwa' awiyak ekii'noontawihkwaa.

¹³ 'Owe tahsh kaaishikanooninaan kikanawaapamikonaan Kishemanitoo, mii 'awe kahkina kekoon kaapimaatisiishkank, a'a kaye Ciisahs Christ kaakii'minotipaacintisotc 'iwe ahpii ekii'inaahsamikaapawiihtawaatc ini Paantiyahs Paailatoon (Pontius Pilate).

¹⁴ Mii 'owe eshiayaankwaamiminaan, citipaatotaman kahkina 'iwe kaa'ishikanoonikooyan. Misiwe kakwe kwayahkohciken, ekaa kekoon cipana'ansiwan, misiwe cianiminwaapancikaatek, piinihsh iko cipinaako'itisotc 'awe kaaTipeniminank Ciisahs Christ.

¹⁵ Opinaakosiwin okaishihsehtooni Kishemanitoon mayaa kaakii'inentaminitc ci‑ishihsenik. Mii hsa 'awe Kishemanitoo kaamisiweayaatc shawentaakosiwin, kaye kaamihcipeshikoayaatc tipencikewin. Wiin otookimaamimikoo' ini kahkina kihciokimaa'. Otipenimaa' ini tipencikewin eyaanitc.

¹⁶ Wiin ehta kaawiin otayaahsiin nipowin. Waahseyaank ishitaa. Kaawiin awiyan otaakashkihtoohsiini cinaasihkaminihpan. Kaawiin wiihkaa awiyan okii'waapamikohsiin, kaawiin kaye wiihkaa awiyan otaakiihkashkihtoohsiini cikiiwaapamikotc. Kahkina otayaan kihtentaakosiwin, mashkawisiiwin! Emen.

¹⁷ Oko tahsh kaatashi⁠wenootisiwaatc o'omaa ahkiink ishikihkino'amaw ekaa ciahpenimonotansikwaa otipinawewisiwiniwaan. Kaawiin aaniihsh kwayahkwentaakwahsininiwan. Meshkwac itahsh oka/⁠ahpenimonotawaawaan Kishemanitoon kaawenoocimiiniminank kahkina kekoon keonciminwentamowank.

¹⁸ Ishiwiintamaw itahsh ciminotootaakewaatc, minohcikewin citashi⁠wenootisiinotamowaatc. Tanihtaa‑⁠miikiwewak itahsh, 'imaa otipinawewisiwiniwaank cionciwiici'aawaatc kotak awiya'.

¹⁹ Mii 'imaa keishimaawacihtamaasowaatc i'iweni kaaonishihshininik, keshiaapacihtoowaatc niikaanaya'ii cinionci⁠minopimaatisiwaatc. Miihsh i'imaa keni‑ishi otihtinamowaatc tepwe 'i pimaatisiwin.

²⁰ Haw, Timahti (Timothy)! Weweni kanawentan i'i kaakiihpaminamo'ikooyan. Keko pimentanken i'iweni aaninta ishianihshaa piko kaaishi⁠noociko⁠kakitowaatc. Onakaashkaanaawaa kwayahk i'i tepwehtamowin. Ishianihshaa inenintisowak ehkihkentaahsowaatc. Keko hsa ko pisintawaahken.

²¹ Aanawiin ninkihkentaahsomin e'ihkitowaatc, waahsa opanihsitoonaawaa i'i tepwehtamowinink kaainamoninik. Kishemanitoo okishewaatisiwin kikawiiciiwikom.