1 Timahti 5 - Ojibwe Kihcimasina'ikan

Aaniin keshikanawenimintwaa otepwehtamook

¹ Keko wiihkaa kishiikanoonaahken okihtaatisiik, pekihkaac itahsh kikaishikanoonaak taapishkoo e'oyoohsiyan. Iki tahsh kaaoshkaatisiwaatc taapishkoo kiicihkiweyak kikainenimaak.

² Ikihsh kaye nawac kaakihtaatisiwaatc ihkwewak taapishkoo e'omaamaamatwaa kikainenimaak. Iki kaye kaaoshkaatisiwaatc ihkwewak taapishkoo e'otawemaamatwaa; mii ehta ko pehkaya'ii nahke keshinaanaakatawenimatwaa.

³ Kikakihci‑inenimaak iki kaakii'niponitc onaapemiwaa' tepwe kaakiiwahshihsewaatc.

⁴ Kiishpin itahsh e'oniicaanihsitc a'a tino ihkwe, komaa kaye e'oyooshihsitc, wiinihtamawaa iki apinoonciishak okanikihkentaanaawaa keshipami'aawaatc ini okiiwaatisiihkwen, otanami'aawiniwaank cioncitootamowaatc. Okasakentaanaawaa otinawentiwiniwaa cinikiiwe‑⁠pami'aawaatc oniiki'ikowaa' kaye okihciaya'aamiwaa'. Mii aaniihsh 'iweni kaaminwaapantank Kishemanitoo ehtoocikaatenik.

⁵ A'a tahsh tepwe kaakiiwaatisiihkwewitc, awiyan ehpami'ikohsik, Kishemanitoon ehta otahpenimonotawaan, e'ahpisomaatc ciwiici'ikotc, ehtipihkaninik kayehsh e'anikiishikaninik e'anami'aatc.

⁶ A'a tahsh kiiwaacihkwe anoociko kaainaatisitc keonciminwentami'itisotc wiinehta, aanawiin ehpimaatisitc e'inintc, wakicaya'ii ehta ishipimaatisi. Aasha tahsh e'nipotc inentaakosi.

⁷ Miiwan ono ishiwiintamaw, kwayahk iko citootamowaatc, ekaa cimacaacimaahsiwintwaa.

⁸ Inashke kiishpin kwayahk kanawenimaahsik awiya otinawemaakana', memintake 'imaa otaawinink eyaanitc, kaawiin otaapacihtoohsiin otepweyentamowin, omihciwepinaan inentaakwanini. Awahshime ko ani‑inaatisi taapishkoo awiyan kaaotepwehtamowinihsinik.

⁹ Awiya tahsh kiiwaacihkwe kaawiihpami'ikotc otepwehtamoo', kaa mahshi tatakwakinsohsii ehteahpiihtaatisihsik, ninkotwaahsimitana ehtahsopipoonwehsik. Miitahsh o'oweni keonci ahshitakimintc, kiishpin weweni kaahtootawaakwen kaakii'onaapemitc.

¹⁰ Taminwaacimaa kaye e'nihtaa minohciketc, ekii'mino‑ompiki'aatc apinoonciisha', ekii'minopiintikanaatc piiwite', e'nihtaa kisiipiikisitenaatc ehpimiayaanitc Kishemanitoon otipenimaakanini, ekiihpi⁠minowiici'aatc kaye ini kaamacihsenitc, ci‑inintipan kaye kahkina minohcikewin ekiihkakwekashkihtootc. Mii hsa 'awe ketakwakimintc.

¹¹ Nawac itahsh kaaoshkiaya'aawitc ihkwe kaawiin taoshipii'waahsii. Aaniihsh e'ishimihsawentank ewii'onaapemitc, mii hsa 'i keonciasheyiitc kaawii'ishianohkawaahpan Christan.

¹² Miihsh i'i keshipiikonank nihtam kaakii'ishiahshotamawaahpan. Mii'i ehkashkihtamaasotc cionahshowaasotc.

¹³ Shikwa ishinanamaasi anihshaa ko cimihcikakiishikanihshitc, ehpapaa mihci⁠mawatihshiwetc. Miitahsh awahshime e'naakohtootc kekii'inaapatisihsikipan, anihshaa ehpapaa⁠ontamisiihkaasotc, ehpapaa mihci⁠aakineyaacimotc, ehpapaatashintank kekoon cipapaamintansikipan.

¹⁴ Nawac itahsh ninantawentaan ciwiitikehpan kaaoshkaatisitc kiiwaacihkwe, ciotapinoonciishimitc, cipamihtootc kaye otaawin. Mii 'iwe citootank ekaa cionci macaacimihsinowank awiya kaashiinkentank anami'aawin.

¹⁵ Aaninta tahsh kiiwaacihkwek aasha kii'oncipahkeshkaawak 'iwe kekii'inaatisiwaahpan. Miihsh kaaoncipiminisha'waawaatc ini Setanan (Satan).

¹⁶ Kiishpin ayaatc ihkwe kaaotepwehtamowinitc, e'okiiwaatisiihkwewinitc otinawemaakanan, wiin iko okakanawenimaan ini otinawemaakanihkwen. Kaawiin i'imaa taonciwiici'imaahsiiwan kaaishimaawaci'itinitc otepwehtamoo'. Mii iitok i'imaa keonciwiici'intwaapan iki tepwe kaakiiwahshihsewaatc.

¹⁷ Iki kaaniikaanisiwaatc ehkihkenimintwaa weweni ekiihkakwetootamowaatc otanohkiiwiniwaan kaaishi⁠niikaanisiihkantaakewaatc tainakimaawak niishink (2) awahshime citipa'amawintwaa, memintake ikiweniwak niipiwa' e'anohkaatamowaatc kakiihkwewin, kihkino'amaakewin kaye.

¹⁸ Aaniihsh ishipii'ikaate Kihcimasina'ikan: “Keko takipitoonehpisohsii kipishihkiim mekwaa ehpaawishkawaatc pahkweshikanimanoominan; pisaan iko oka‑amwaan.” Shikwa, “Otanohkii oncikashkihtamaaso citipa'amawintc,” ishipii'ikaate.

¹⁹ Kiishpin awiya anaamimaatc oniikaanisiin, kaawiin aapiinc iko kikapisintawaahsii. Paanimaa ehta niishin (2), komaa kaye nihsin (3) ehtahsoohkamowaatc i'i anaamimiwewin, tepwe ninkii'waapantaamin e'ihkitowaatc, miitahsh i'i payesh cipisintamampan.

²⁰ Kahkina awiya kaamaashihciketc, mohsheaya'ii taonci'aa, kotak awiyak cikohtamowaatc ekaa ci‑ishihcikehsikwaa.

²¹ Kitayaankwaamimin ehkanawaapamitc Kishemanitoo kaye Christ Ciisahs kaye otencalima' kaaishionakimimintc: onoweniwan kaawiintamawinaan, mooshak iko citootaman. Keko kiishaac onenimaahken keinaahkonatc awiya. Kaawiin awiya pepahkaan kikatootawaahsiik, aaniiniko kaawiihtootaman.

²² Keko wiin papaashiihken cisaaminatc awiya cionakimatipan cianami'ewanohkiitc. Kiishpin maashihciketc kaasaaminatc, kekiin i'imaa kikatakwentaakos. Kanawenintison itahsh cipehkaatisiyan.

²³ Piko kaye kiwiintamawin e'maamihkawiyaan: kaawiin ehta nipi kitaa/⁠aapacihtoohsiin. Pankii otaahpinan shoominaapo ciminohsink kiwiihsiniwin, ciantawi'owaakeyan eshinihtaa/⁠aahkosiyan.

²⁴ Aanint awiya omacihcikewinan mohsheaya'ii e'naakwaninikin oniikaanipii'ikonan citipaahkonikaniwitc. Aanint itahsh kaye pitashi/ayaaniwan otishihcikewinan 'iweti otaanaank, inkotink keatimikotc.

²⁵ Mii 'i peshikwan iki kaaminohcikewaatc, noonkom iko payahtenaakwaniniwan otishihcikewiniwaan. Ampooshke ini mahshi kaanaakwahsinokin piciinak cinaakwaninikin.