1 Timahti 4 - Ojibwe Kihcimasina'ikan

Pahkaan kehkino'amaakewaatc ehtashimintwaa

¹ Kehcinaac aaniihsh ihkitowan Kishemanitoo otAhcaahkwan aaniin keishiwepaninik ishkwaac anikakiishikahk, aanint ewii'oncipahkewaatc otepwehtamowiniwaank, iniweniwa' kaawiihpisintawaawaatc maciaya'aank kaaonciinitc ahcaahkwa', ehkakiinawishkinitc eshikihkino'amaakenitc.

² Mii 'imaa wenciimakaninikin ono kihkino'amaakewinan kaaishikakiinawishkiwaatc kaawayeshinkeshkiwaatc. Taapishkoo awiya e'nihsitosihsik e'onsaamaahkisotc, amii 'i eshiayaanik onaakatawentamowiniwaa, ekaa keyaapi e'nihsitaawentansikwaa minoishiwepisiwin.

³ Oko tino ishikihkino'amaakewak ekaa ciwiitikehsink, shikwa aanint kekoon cimanaamiicinaakaatek. Okii'oshihtoon itahsh Kishemanitoo kahkina kekoon miicim ciaapacihtoonitc i'i otepwehtamoo' kaakihkentaminitc i'i tepwewin. Paanimaa kiinanaahkomonitc miihsh i'i cimiicinitc.

⁴ Aaniihsh kahkina kekoon kaakii'oshihtootc Kishemanitoo kii'onishihshininiwan, kaawiin kekoon awiyak ciaanawentamowaatc, kahkina tahsh ciontinamowaatc e'nanaahkomowaatc.

⁵ Aaniihsh kiishpin awiya aapacihtootc Kishemanitoon otihkitowinini, nanaahkomotc kaye, mii 'i eshionishihshentaminitc pisaan i'i nahke ci‑inaapataninik i'i miicim.

Aaniin eshinaakositc awiya kwayahk e'otanohkii'aakanimikotc Ciisahs Christan

⁶ Miiwan ono kihkino'amaw kiwiiciotepwehtamoomak, miitahsh i'i kwayahk Christ Ciisahs otanohkii'aakanan citinowiyan, e'ahshantisoyan ini ihkitowinan kaaishitepwemakahkin, 'iwe kaye kwayahk kihkino'amaakewin kaapipiminisha'aman.

⁷ Kaawiin kikapimentansiinan ini pahkaan tipaacimowinan kaamaciaya'aawiwankin. Aaniihsh kaawiin tepakentaakwahsinoon ciwiintamaakenk. Mooshak itahsh ishikakwenakaciin anami'ewaatisiwinink.

⁸ Awiya wiiyawink ishinanamaa'itisotc tepwe acina ominoshkaakon. Kaawiin tahsh acina ehta ominoshkaakohsiin anami'aawin, aaniihsh pishihshik okawiici'ikon, o'o noonkom e'onciminopimaatisitc, i'iwehsh kaye niikaanaya'ii keniayaanik pimaatisiwinink okawiici'ikon.

⁹ Tepwemakan o'o ihkitowin, kahkina awiya citepwehtank.

¹⁰ Mii 'owe kaaoncikakwaatakiiyaank ehkihcianohkiiyaank ekii'ahpenimonotawankitc kaaPimaatisitc Kishemanitoo kaapimaaci'aatc kahkina, memintake ko otepwehtamoo'.

¹¹ Mii hsa ono inaahkoniken, mii 'iwe ishikihkino'amaaken.

¹² Keko awiya kikamacitootaakohsii ehteahpiihtaatisihsiwan. Kiin itahsh kakweminoishiwepisin minokakitowinink, ishihcikewinink, saaki'iwewinink, tepweyentamowinink, peyahtakaatisiwinink, ci‑ishikihkinawaapamihkwaa kaaotepwehtamowiniwaatc.

¹³ Kiin iko ayaankwaamisiihkantan cianamihtamaakehtamawatwaa Kihcimasina'ikan, cikakiihkweyan, cikihkino'amaakeyan, piinihsh iko citakohshinaan.

¹⁴ I'iwe ahpii kaakii'onaapamikooyan kikiihkanoonikook iki kaakanootamawaawaatc Kishemanitoon, kikii'ohkosaaminikook kaye oniikaanisiik ekii'oncimiinikoowisiyan kekoon Kishemanitoonaank. Keko mihciwaniihkenotanken o'o kimiinikoowisiwin.

¹⁵ Ayaankwaamisiihkantan onoweniwan mooshak iko citashiihkaman; kahkina awiya cinikanawaapamihk e'ani‑ishinakaciiyan.

¹⁶ Keko awaac pankii pakiciihken. Ayaankwaamentan tahsh aaniin eshipimaatisiyan, aaniin kaye eshikihkino'amaakeyan. Aaniihsh kiishpin kahkina ono enitootaman kikapimaaci'itis, iki kaye kaapisintawihkwaa kikapimaaci'aak.