1 Timahti 3 - Ojibwe Kihcimasina'ikan

Aaniin keishipimaatisitc awiya waa'niikaanisitc anami'aawinink

¹ Tepwemakan o'owe ihkitowin: kiishpin inini antawentank ciniikaanisitc anami'aawinink, onishihshinini o'oweni anohkiiwin kaa/⁠antawentank.

² Antawentaakosi tahsh ekaa kekoon ci‑inaatisihsik oniikaanisi. Tapeshikowan ehta wiiwan. Shikwa kaawiin inikaanc okatootansiin opimaatisiwin, tanipwaahkaa tahsh cisakahkamaatisitc. Okanekaami⁠piintikanaa' awiya' otaawinink, okakashkihtoon kaye cikihkino'amaaketc.

³ Kaawiin itahsh tanihtaa kiiwashkwepiihsii, kaawiin kaye ta/⁠aahkwaatisihsii. Tanoohkaatisi tahsh, weweni kaye tatootaake. Kaawiin kaye okasaaki'aahsiin shooniyaan.

⁴ Shikwa kwayahk okatipenimaa' otaawinink kaatahshinitc, ehkashki'aatc oniicaanihsa' cipisintaakotc, ehkihci‑inenimikotc.

⁵ Kiishpin aaniihsh a'a inini kihkentansik keshitipenimaatc otaawinink kaa/⁠ayaanitc, aaniihsh ina keshikanawenimaahpan i'i Kishemanitoon kaa/⁠anami'ehtawaanitc?

⁶ Shikwa kaawiin awiya kaaoshki⁠kwehkaatisitc ta‑aawihsii, maakishaa wiipa ko mii aasha e'ishpenintisotc, mii peshikwan keinaahkonintc ini kaakii'inaahkonimintc maciaya'aan ekiihkihtenimonitc.

⁷ Taonaapamaa tahsh awiya aasha kaaminwakimikotc i'i ekaa kaaotepwehtamowinihsinik, ekaa cipankihshinsik cimenihshentami'itisohsik, ekaa kaye cinakwaanikohsik ini maciaya'aan.

Keishipimaatisiwaatc owiici'iwek

⁸ Iki tahsh kaye kaawiicihtwaawaatc, peshikwan iko taishiminwaatisiwak, ekaa cinihtaa minihkwehsikwaa shoominaapo, ekaa kaye ciaaskonaatisihsikwaa,

⁹ e'minciminamowaatc itahsh tepweyentamowin kaakihkentaakohtootc Kishemanitoo, ehkihkenintisowaatc ekaa kekoon e'ishiayaahsikwaa.

¹⁰ Pinamaa tahsh tamihcikoci'aawak. Paanimaa tahsh naake wawiinke hsa ko ehkwayahkwencikaasowaatc tainanohkiiwak.

¹¹ Mii hsa tahsh peshikwan ini wiiwiwaa' keinaatisinihpan, misiwe ko ciminwaatisinihpan. Kaawiin macikekoon tanihtaa aanihko/⁠aacimohsiiwa'. Weweni okakanawentamini opimaatisiwinini, misiwe kaye citepwewiniwinitc.

¹² A'a tahsh owiicihtwaa tapeshikowan ehta wiiwan, kwayahk iko ehtipenimaatc oniicaanihsa', otaawinink kaye minihk awiya' kaawiicitaamikotc.

¹³ Iki aaniihsh kaaminoanohkiiwaatc ishikashkihtamaasowak minwakimikoowin. Kaawiin kaye tashaakwenimohsiiwak ewii'mohshe wiintamaakewaatc aaniin i'i kaaishitepwehtawaawaatc Christ Ciisahsoon.

Ehkihci‑inentaakwaninik kaakihkentaakohtootc Kishemanitoo

¹⁴ O'owe tahsh kitooshipii'amawin aanawiin wiipa ewiihkakwe⁠otihsinaan.

¹⁵ Kiishpin tahsh kinwesh ontentiyaan, kikaoncikihkentaan aaniin keishihcikewatc i'imaa Kishemanitoo kaaishitipenimaatc otepwehtamoo'. Mii 'owe otanami'aawin kaaPimaatisitc Kishemanitoo, miiwan ini kaamaamawitipenimaatc, kaa‑aahswaahkwa'ikaakaaniwank i'i tepwewin, mii 'imaa wenciaayiicihsek i'i tepwewin.

¹⁶ Wawiinke hsa tepwemakan, aahpici kihci‑inentaakwan kitanami'aawininaan Kishemanitoo kaakiikihkentaakohtootc: Tepwe kii'naako'itiso e'ininiiwitc, Kii'oncikwayahkwakimaa e'wiiciiwikotc Kishemanitoo otAhcaahkwan, Okii'waapamikoo' encala', Kiihtipaacimaa kaatahswewaanakisinitc ekii'wiintamawimintc, Kiihtepweyenimaa ahkiink, Kii'ishiompishkaa kihcikiishikonk.