1 Timahti 1 - Ojibwe Kihcimasina'ikan

¹ Niin Pwaal (Paul) otishinisha'waakanan a'a Ciisahs Christ, ci‑ishianohkiiyaan mayaa eshi‑inaahkoniketc a'awe Kishemanitoo kaapimaaci'inank, Ciisahs Christ kaye, mii 'awe kitahpenimowininaan.

² Kitooshipii'amawin kiin Timahti (Timothy), tepwe piko tepweyentamowinink e'onciokosihsiminaan. Shawentaakosiwin, kitimaakinaakoowin, koshkwaawaatentamowin kikawii'onciihtamaak Kishemanitoo Kaaoyoohsimintc, Christ Ciisahs kaye ehTipeniminank.

Nahpaac kaakihkino'amaakewaatc taonci'aawak

³ Kitishinantawenimin keyaapi ci‑ishikapehshiyan i'imaa Ehpihsahs (Ephesus) ootenaank, kaakii'ininaampaan ahpan kaakii'maacaayaan weti Maahsitooniya (Macedonia) ahkiink. Aaninta awiyak i'imaa pahkaan ishikihkino'amaakewak. Kitanoonin ci‑ishiwiintamawatwaa cipoonihtoowaatc 'iwe nahpaac kihkino'amaakewin ekaa cikihkino'amaakehsikwaa miinawaa,

⁴ ekaa kaye cipisintansikwaa pahkaan tipaacimowinan ini kaye kaapoonihsehsinokin aayaanihketipaacimowinan. Mii 'owe kaaoncikakwepasikwiimakahkin kakwecintiwinan, kaawiin wiin i'iwe kaaishiantawentank Kishemanitoo 'iwe tepweyentamowinink kaa‑ayaak.

⁵ Mii 'owe kaakakweontinikemakahk o'o ninkihkino'amaakewin, cipaahtiinahk saaki'itiwin, cionciayaamakahk minote'ewinink, minokihkenintisowinink kaye, kaatepwemakahk tepwehtamowinink kaye.

⁶ Aanint i'imaa awiyak kii'oncipahkewak ekii'ishiwanihshinowaatc, anihshaa ehkakweshaakoosontiwaatc.

⁷ Wii'noonte kihkino'amaakewak Kishemanitoon otInaahkonikewinini, aanawiin ehtashikihkentansikwaa wiinawaa ko otihkitowiniwaan kaye wekonen i'i kaatashintamowaatc ehkwayahkwenimowaatc.

⁸ Kiinawint itahsh kikihkentaamin e'onishihshik Inaahkonikewin, awenen iko kwayahk keaapacihtootc.

⁹ Kikihkentaamin kaawiin wiin onci kaaminoishiwepisiwaatc kii'oncioshipii'ikaatehsinoon Inaahkonikewin, iki hsa wiin kaanihtaa⁠mamaashiiwaatc, kaakakwetipenintisowaatc kaye, iki kaye kaakihtenimaahsikwaa Kishemanitoon, omacitootamook kaye, kaapehkipimaatisihsikwaa, kaamaanentamowaatc kaye anami'aawin, iki kaye kaanihsaawaatc oniiki'ikowaa', awenen hsa piko kaanihshiwetc,

¹⁰ shikwa kaapihshikwaatisiwaatc, kaamacimihsawenimaawaatc kaye wiicininiimiwaa', iki kaye kaakiimooci⁠kimootiwaatc awiya' ciataawaakewaatc, iki kaanihtaa kakiinawishkiwaatc, kaakakiinawishkaacimowaatc kaye, awiya ko kaye kaakakwenakaashkank minokihkino'amaakewin.

¹¹ Mii o'o kihkino'amaakewin kaainahtenik ominwaacimowin kaakihci‑inentaakositc kaye kaananaahkomintc Kishemanitoo; mii 'owe minwaacimowin niin iko kaapaminamo'ikooyaan ciwiintamaakeyaan.

E'miikwehciwentank Kishemanitoo oshawencikewinini

¹² Nimiikwehciwenimaa tahsh Christ Ciisahs Tepeniminank kaamiishitc mashkawisiiwin, otayaankwaamisii kaakii'inakimitc, kaa'anooshitc cianohkawak,

¹³ niin kayahte kaakii'maci‑inak. Ninkiihkakwaataki'aa, ninkiihpaahpinotawaa kaye. Ninkiihkoohpaatenimik itahsh 'iwe onci ekiihkihkentansiwaan kaa'ishihcikeyaan mekwaa ehtepwehtansiwaampaan.

¹⁴ Kayehsh kiihpaahtiinatinini oshawencikewin kaa'miishitc kaaTipeniminank, ahshic i'iweni tepweyentamowin, saaki'iwewin kaye, kaaonciihtamaakoyank Christ Ciisahs e'wiiciiwank.

¹⁵ Tepwemakan ihsa 'i ihkitowin, teahpiihtentaakwan kaye kahkina awiya ciotaahpinamowaatc: a'a hsa Christ Ciisahs ekiihpiishaatc o'omaa ahkiink omacitootamoo' cipimaaci'aatc, entahshiwaatc niin itahsh nimaamawentaakos ehtinowiyaan.

¹⁶ Mii mayaa 'owe kaakii'oncishawenimitc Kishemanitoo, ekii'inentank Christ Ciisahs wawiinke ciwaapanta'iwetc eshishashiipenimitc, niin aana maamawentaakosiyaan maci‑ishiwepisiwinink. Mii 'iwe keoncikihkinawaapantamowaatc kahkina iki naake ketepweyenimaawaatc cimiinintwaa pimaatisiwin wiihkaa keishkwaahsehsinok.

¹⁷ Maano tahsh pishihshik ahpane takihci‑inenimaa, tananaahkomaa a'a Kihciokimaa pishihshik kaapimaatisitc, wiihkaa kenipohsik, wiyaapamaahsiwintc, mii ehta 'awe kaaKishemanitoowitc. Emen.

¹⁸ Timahti (Timothy) ninkosihs, o'o kakiihkwewin kikanawenta'in: taapishkoo kiishaa ko kaakii'inaacimikooyan, miiwan ihkitowinan ciahshwiiwaakeyan mino miikaasowinink.

¹⁹ Minciminan i'i kitepweyentamowin, i'i kaye minoinenintisowin. Iki aanint e'wepinamowaatc okii'nihshiwanaacihtoonaawaa otepweyentamowiniwaan,

²⁰ o'o eshiwepisiwaatc Haaiminiiyahs (Hymenaeus), a'a kaye Aalikihsaantar (Alexander). Ninkiihpakitinamawaak cikihkino'amaakowaatc ini Setanan (Satan), cikihkentamowaatc cipaahpinotaakehsikwaa.