1 Saamiyoo 4 - Ojibwe Kihcimasina'ikan

¹ Saamiyoo (Samuel) tahsh kaakii ihkitotc okii noontamini kahkina Isriyala' (Israel). I'i hsa ahpii Isriyalak kii‑ishaawak ekii anta miikaanaawaatc Pilistii (Philistines) kaatinowinitc. I'imaa tahsh Epaniisar (Ebenezer) ayaawinink kii‑ishi kapehshiwak. Pilistii kaatinowinitc itahsh wiin weti ootenaank Ehpek (Aphek) ecikaatenik kii‑ishi kapehshiwa'.

Isriyalak Kiimahkamintwaa Ahshotamaakemahkahkoni

² Miihsh kaakiih piishaanitc ewii miikaanikowaatc. Ahpii hsa kaa⁠miikaatinaaniwank, Isriyalak hsa kiih⁠shaakoocihcikaniwiwak. Pilistii kaatinowinitc hsa ninkoci ko niiwink mitaahswaahk 4,000 okii nihsikowaa' kaakiih tashi miikaatiwaatc mihshawahkamik.

³ Ahpii hsa shimaakanihshak kaah⁠piikiiwewaatc eshi kapehshiwaatc, mii hsa 'i Isriyalak kaa⁠niikaanisiwaatc kaa⁠ihkitowaatc, “Wekonen ini tahsh kaaTipenciketc kaa⁠onci pakitinaatc Pilistii kaatinowinitc ci⁠shaakooci'inankwaa noonkom kaa⁠kiishikaninik? Taka hsa naasihkantaa kaaTipenciketc otahshotamaakemahkahk weti Shaailoo (Shiloh) ootenaank kaa‑ayaanik, ci⁠ayaanik o'omaa mekweya'ii eshi'ayaayank, ci⁠naatamaakoyank eshi mashkawisiiwaatc kaa⁠shiinkeniminankwaa,” kii‑ihkitowak.

⁴ Miitahsh kaakii ishinisha'waawaatc ininiwa' Shaailoo ootenaank ci⁠naasihkaminitc kaaTipencikenitc Kaa⁠Maawaci mashkawisiinitc otahshotamaakemahkahkoni, kaakii apinitc ishpimink inahke eshi'ayaanitc Cerapii'. Iilaai (Eli) hsa niishin okosihsa' Haahpnaai (Hophni), ini kaye Pineyahs (Phinehas) eshinihkaasonitc kiihpi kikiiwa' eh⁠piicikaatenik Kishemanitoon otahshotamaakemahkahkoni.

⁵ Ahpii tahsh eh⁠pakamiwicikaatenik i'i kaaTipencikenitc otahshotamaakemahkahkoni i'imaa eshi kapehshiwaatc, kahkina hsa Isriyalak kii⁠kihci shaakowewak, mii hsa 'i kaa⁠ishi koshkohsenik ahki.

⁶ Ahpii hsa Pilistii kaatinowiwaatc e⁠noontamowaatc e⁠shaakowenaaniwaninik, mii hsa 'i kaa⁠ihkitowaatc, “Amanc inaa enwaatamowaakwen kaa⁠matwe kihci shaakowenaaniwank weti Hiiparoowak (Hebrews) kaashi kapehshiwaatc,” kii‑ihkitowak. Ahpii hsa kaa⁠kihkentamowaatc ekiih pakamiwicikaatenik kaaTipencikenitc otahshotamaakemahkahkoni eshi kapehshinitc,

⁷ mii hsa 'i kaa⁠ishi sekisiwaatc. Miihsh o'o kaa⁠ihkitowaatc, “Manitoon hsa matwe takohshinoon eshi kapehshiwaatc! Mii hsa 'i ci⁠koohpaaci'ikooyank! Kaawiin hsa o'o kekoon wiihkaa otaanaank pi‑ishihsehsinoon!

⁸ Mii hsa ci⁠koohpaacihseyank! Awenen itahsh inaa ke⁠naatamawinank i'i kaashi mashkawisiinitc i'i manitoo'! Miiwak iitok iki manitook kaakiih tootawaawaatc Iicip kaatinowinitc kahkina maanshihsewinan ci⁠otihsikonitc weti pikwatahkamik.

⁹ Pilistii kaatinowiyek, taka mashkawentamok, ininiink kaye inentaakosik, ci‑ishiwepisihsiwank ci⁠kakwaataki mihtanohkii'inankitwaa Hiiparoowak taapishkoo kaashi kakwaatakanohkii'ankwaa; taka hsa ininiink inentaakositaa ci⁠miikaasoyank,” kii‑ihkitowak.

¹⁰ Miitahsh Pilistii kaatinowiwaatc kaa⁠ishi miikaanaawaatc Isriyala' ekiih shaakooci'aawaatc itahsh. Kahkina hsa entahshinitc kiih⁠kiiwepa'iwewa'. Wiinke Isriyalak kii⁠kihci shaakooci'aawak, nihsimitana tahsink mitaahswaahk 30,000 ekii nihsimintc oshimaakanihshiimiwaa'.

¹¹ Miitahsh kaye Kishemanitoo otahshotamaakemahkahk kaakii otaahpinikaatenik. Miitahsh kaye'imaa minciniish Iilaai okosihsa' kaa⁠ishi nihsimintc Haahpnaai, Pineyahs eshinihkaasonitc.

Iilaai Kii'ishkwaapimaatisitc

¹² I'i tahsh eh⁠kiishikaninik peshik Pencimanink (Benjamin) wentahkaanesitc kii⁠onci maaciipahtoo entashi miikaatiwintc ekii ahpahtootc Shaailoo (Shiloh) ootenaank ekiih piikohkonayetc, ekii mihtaawankowaninik kaye ohtikwaan kaa‑ahpiihci mincinawesitc.

¹³ Iilaai (Eli) hsa tahsh kii⁠nanamatapi ciikihkana ekii ahshawaapitc kii⁠pakamipahtoonitc, ekii oncaanimentamo'ikotc Kishemanitoon otahshotamaakemahkahkoni. Miitahsh kaakiih pakamipahtoonitc ini kaakiih piitaacimonitc, misiwe ootenaank ekiih tipaacimonitc. Miihsh kahkina ootenaank eyaanitc kaakii shaakowenitc ekii koshkohtaminitc.

¹⁴ Ahpii tahsh Iilaai kaa⁠noontank eh⁠kishiiwenaaniwaninik, mii hsa 'i kaa⁠ihkitotc, “Aaniin itahsh enwaatek i'i kaa⁠kishiiwenaaniwank?” kii‑ihkito. Ini tahsh kaakiih piitaacimonitc weyiip okiih pi wiintamaakoon aaniin kaa⁠inahkamikaninik.

¹⁵ Iilaai shaankahsimitanashinihshwaahso (98) kii⁠tahso pipoonwe, kaawiin kaye aahpici kii⁠waapihsii.

¹⁶ Miihsh kaa'ikotc kaakiih piitaacimonitc, “Niin ohsha kaa⁠tashi miikaatink kaakiih pi'onci pakamipahtooyaan, tepwehsa niin kaa⁠tashi miikaatink ninkiih pi'onci tapasii noonkom o'owe kaa⁠kiishikahk,” okii'ikoon. Miitahsh kaa'inaatc, “Aaniin kaa⁠inahkamikahk ninkosihs?” okii'inaan.

¹⁷ Miihsh o'o kaa⁠ishi nahkwehtaakotc, “Isriyalak (Israel) okii maaciipa'iwaanaawaa' Pilistii (Philistines) kaatinowinitc, niipiwa' itahsh kaye kii⁠nihsaawak. Kikosihsak itahsh kaye minciniish kii⁠nihsaawak, Haahpnaai (Hophni), a'a kaye Pineyahs (Phinehas). Kishemanitoo otahshotamaakemahkahkoni kaye kii⁠otaahpinikaateni,” okii'ikoon.

¹⁸ Ahpii tahsh Iilaai e⁠noontank e⁠mihkootenik Kishemanitoon otahshotamaakemahkahkoni, mii hsa kaa⁠ishi aashekicihsetc eshi namatapihpan ciiki kihci ishkwaantenk. Miihsh kaa⁠ishi poohkokwehshink ekii aahpicihshink, aaniihsh inaa wiinke kii⁠ahkiwensiiwi, wiinke kaye kii⁠aancipo. Niimitana tahso pipoon hsa okii onaahkonaa' Isriyala'.

Pineyahs Wiiwan Kii'ishkwaapimaatisinitc

¹⁹ A'a tahsh ihkwe kaakii oshiimihsimikotc Iilaaiwan (Eli), kaakii onaapemitc Pineyahsan (Phinehas), kii⁠kikishkawaawahso, aasha ko kekaa ci⁠oniicaanihsitc. Ahpii hsa e⁠noontank ekii otaahpinikaatenik Kishemanitoon otahshotamaakemahkahkoni, oshihshenshan kaye ekii ishkwaa pimaatisinitc, onaapeman kaye, mii hsa 'i kaa⁠ishi maacii aahkositc. Miitahsh kaakii nihtaawikinaawahsotc.

²⁰ Eh⁠pimihshink itahsh ewii ani ishkwaa pimaatisitc, inihsh ihkwewan kaakii wiici'ikotc okii'ikoon, “Keko sekisihken, kwiiwisenhs ohsha kinihtaawiki'aa,” okii'ikoon. Kaawiin itahsh okii nahkwehtawaahsiin, kaawiin okiih papaamihtawaahsiin.

²¹ Ihkapaat (Ichabod) itahsh okii ishinihkaanaan ini kwiiwisenhsan ekii ihkitotc, “Mii hsa 'i kihci inentaakosiwin onakanikonaawaa Isriyalak (Israel).” I'i tahsh kaa'itank Kishemanitoon otahshotamaakemahkahkoni ekii otaahpinikaatenik, oshihshenshan, onaapeman kaye ekii niponitc.

²² Miitahsh kaa⁠ihkitotc, “Mii hsa 'i Isriyalak okihci inentaakosiwiniwaa e⁠nakanikowaatc, aaniihsh Kishemanitoo otahshotamaakemahkahk kii⁠otaahpinikaateni,” kii‑ihkito.