1 Saamiyoo 3 - Ojibwe Kihcimasina'ikan

KaaTipenciketc Kiinaakosiihtawaatc Saamiyoon

¹ A'a hsa kwiiwisenhs Saamiyoo (Samuel) okii anohkiihtawaan kaaTipencikenitc Iilaaiwan (Eli) ekii ani wiintamaakotc aaniin ke⁠ishihciketc. I'i hsa ahpii kaawiin aahpici kaaTipenciketc kii⁠noontawaahsii ci⁠kaanoonaatc awiyan, kaawiin kaye aahpici awiya kiih⁠pawaacikehsii.

² Aapitink tahsh eh⁠tipihkaninik Iilaai kii⁠oshihshin eshi nipaatc. Kaawiin iitok aahpici aasha kii⁠waapihsii.

³ Kaawiin tahsh mahshi kii⁠aahtawehsinini Kishemanitoon opimite waahsahkonencikanini; Saamiyoo hsa kiih⁠pimihshin piinci anami'ewikamikonk kaakii ishi'ayaanik Kishemanitoon otahshotamaakemahkahkoni.

⁴ Miitahsh kaaTipencikenitc kaakiih kanoonikotc, “Saamiyoo,” ekii'ikotc. Miihsh kaa⁠ishi nahkwehtank, “O'omaa nintayaa,” kii‑ihkito.

⁵ Miitahsh kaakii ahpahtootc eshi'ayaanitc Iilaaiwan ekii'inaatc, “Kinoontawin ohsha kaa⁠kanooshiyan.” Miitahsh kaa'ikotc, “Kaawiin kitoonci kanoonihsinoon, maacaan awi kawihshimon,” okii'ikoon.

⁶ Miihsh miinawaa kaaTipencikenitc kaakiih kanoonikotc, “Saamiyoo,” ekii'ikotc. Miitahsh Saamiyoo kaa⁠ishi wanishkaatc ekii ishaatc Iilaaiwan eshi'ayaanitc ekii'inaatc, “Kinoontawin ohsha kaa⁠kanooshiyan.” O'ohsh okii'ikoon Iilaaiwan, “Kaawiin kitoonci kanoonihsinoon, ninkosihs, maacaan miinawaa awi kawihshimon,” ekii'ikotc.

⁷ Kaawiin iitok mahshi i'i ahpii Saamiyoo okii kihkenimaahsiin kaaTipencikenitc, aaniihsh kaawiin mahshi wiihkaa okiih kanoonikohsiin.

⁸ Miinawaa tahsh kaaTipencikenitc Saamiyoo okiih kanoonikoon, mii 'i nihsink ekiih kanoonikotc. Miihsh kaa⁠ishi wanishkaatc ekii anta waapamaatc Iilaaiwan ekii'inaatc, “Kinoontawin ohsha kaa⁠kanooshiyan.” Miitahsh Iilaaiwan kaakiih kihkentaminitc kaaTipencikenitc inankwana kaa⁠kanoonikonitc a'a kwiwisenhs.

⁹ Miihsh Iilaaiwan kaa'ikotc, “Maacaan awi pimihshinin; kiishpin hsa miinawaa kanoonihk, o'o ihkitoohkan, ‘Haw, kiikiton Tepencikeyan, kitanohkii'aakan ohsha kipisintaak.’ ” Mii hsa Saamiyoo kaa⁠ishi anta oshihshink kaakii ishi nihtaa nipaatc.

¹⁰ KaaTipencikenitc hsa tahsh kiih⁠piishaawan, ekii niipawinitc i'imaa ekiih kanoonikotc peshikwan ekii ishihcikenitc ekii ihkitonitc, “Saamiyoo, Saamiyoo.” Miihsh Saamiyoo kaa⁠ihkitotc, “Haw, kiikiton, kitanohkii'aakan ohsha kipisintaak.”

¹¹ Miitahsh o'o kaaTipencikenitc kaa'ikotc, “Inashke, o'o aasha kekaa kaawii ishihcikeyaan o'omaa Isriyalihkaank (Israel), minihk hsa ke⁠noontamowaatc aahpici ta⁠kihci koshkohtamook.

¹² I'i tahsh ahpii kiishikaninik tootawak Iilaai kahkina kaa⁠ihkitowak ewiih tootamowak otaawin, ahpii hsa maacihtaawak aaniin waah⁠tootawak, paanimaa hsa kiih⁠kiishihcikewak ninka kipihciiwaan.

¹³ Aasha ohsha ninkii wiintamawaa ewii nana'ahsimak otaawinink kaa‑ayaanitc nehpic iko. Okosihsa' ohsha kiih⁠paahtaa'itisowa'. Okii kihkentaan ohsha Iilaai noociko ekii ishihcikenaaniwaninik, kaawiin itahsh okii onci'aahsii'.

¹⁴ Miitahsh kaakii ayiici'inimak Iilaai otaawinink eyaanitc i'i noociko kaashi ishihcikenitc kaawiin wiihkaa ci⁠poonentamawaahsiwimintc, mihsawaa ko pakitinaahsowinan, pakitinikewinan kaye aapataninikin,” okii'ikoon.

¹⁵ Saamiyoo tahsh kiih⁠papimihshin piinihsh ekii waapaninik, miitahsh kaa⁠ishi paahkihsitootc ishkwaanteman kaaTipencikenitc owaahkaa'ikaniniink. Kiih⁠sekisi tahsh ci⁠wiintamawaatc Iilaaiwan aaniin kaa⁠ishinank.

¹⁶ Miitahsh Iilaaiwan kaakiih kanoonikotc, “Saamiyoo ninkosihs.” Miihsh kaa⁠ihkitotc, “O'omaa nintayaa.”

¹⁷ Miihsh o'o Iilaaiwan kaa'ikotc, “Aaniin tahsh inaa kaa⁠inihk kaaTipenciketc kii⁠kanoonihk? Taka pisaan iko wiintamawihshin, keko kekoon kaatamawihshihken. Kishemanitoo ohsha kekoon kika tootaak, pooshke kaawiin kika manaaci'ikohsii; kiishpin kota manaa wiintamawiyan kahkina kekoon kaakii inihk kii⁠kanoonihk,” okii'ikoon.

¹⁸ Miitahsh Saamiyoo kaa⁠ishi wiintamawaatc kahkina kekoon, kaawiin aapiinc kekoon okiih kaatoohsiin. Miihsh Iilaaiwan kaa⁠ihkitonitc, “KaaTipenciketc ohsha iinsan a'a; pisaan iko ta⁠ishihcike aaniin eshi minonank.”

¹⁹ Saamiyoo hsa kii⁠ani ompiki, kaaTipencikenitc kaye ekii wiiciiwikotc. Kahkina hsa kaakii ihkitotc kaaTipencikenitc kii‑ishihcikewan tepwe ci‑ishihsenik.

²⁰ Kahkina hsa Isriyala' weti wenciinitc ootenaank Ten (Dan) ecikaatenik, piinihsh weti ootenaank Piiarshiipa (Beersheba) okii kihkentamini tepwe Saamiyoo ekii onakimikotc kaaTipencikenitc ci⁠tinowitc kaa⁠kanootamawaatc Kishemanitoon.

²¹ Miitahsh kaaTipenciketc miinawaahko kaakii naakositc i'imaa ootenaank Shaailoo (Shiloh) ecikaatenik, aaniihsh okii naakosiihtawaan Saamiyoon i'imaa otihkitowinink onci i'imaa Shaailoo.