1 Saamiyoo 2 - Ojibwe Kihcimasina'ikan

Hena Onikamowin Ehtashintenik

¹ Hena tahsh kii⁠anami'aa ekii ihkitotc: “KaaTipenciketc hsa nimooshkine tepinawe'ik ninte'ink, nintoonci minwentamowaan hsa 'i aaniin kaakiih pi'ishihciketc! Nimpaahpi'aak hsa iki kaa⁠shiinkenimiwaatc, aahpici hsa niminwentam aaniihsh Kishemanitoo niwiici'ik.”

² “Kaawiin hsa awiya kotak ishi kihtentaakosihsii taapishkoo kaaTipenciketc; kaawiin kotak awiya pahkaan ayaahsii kiin ehta, kaawiin hsa kaye awiya pahkaan inentaakosihsii e⁠naatamaaketc taapishkoo kiKishemanitoominaan.

³ Poonihtook hsa i'i kaashi nihtaa maamiihkwaanitisoyek, keko kaye pakitinintisohkek ci⁠kakiipaacikiishweyek. KaaTipenciketc ohsha tinowi Kishemanitoo kaa⁠kihkentaasotc, wiin kaye kahkina kaa⁠onaahkonaatc pemaatisinitc aaniin eshihcikenitc.

⁴ Kaa⁠mashkawisiiwaatc shimaakanihshak hsa omihtikwaapiimiwaa' ta⁠pahkihseniwa' meshkwac hsa kaa⁠macentaakosiwaatc ta⁠soonkentaakosiwak.

⁵ Iki hsa pemaatisiwaatc kaakii nihtaa weweni wiihsiniwaahpan; miihsh noonkom eshihcikewaatc e⁠inanohkiihtamaasowaatc ke⁠onci wiihsiniwaatc. Meshkwac tahsh iki kaawii wiihsiniwaahpan kaawiin noonkom wiihkaa noontehsehsiiwak miicim. A'a hsa wiiwimaa keshkihtoohsikipan ci⁠otapinoonciishimitc niishwaahso onihtaawiki'aa' apinoonciisha', a'a tahsh niipiwa' kaakii ayaawaatc kaawiin awaac peshik oka ani ayaawaahsiin.

⁶ KaaTipenciketc ohsha nihshiwe, kiiwe pimaatisii'iwe kaye, ishi pakitiniwe ninkwa'ahkaanink, wiin kaye wanishka'iwe.

⁷ Wiin hsa kaa⁠ishi'aatc aaninta awiya' ci⁠kitimaakisinitc, aaninta kaye ci⁠wenootisinitc. Wiin kaye kaa⁠tootawaatc aaninta awiya' ci⁠tapahsentaakosinitc, aaninta kaye ci⁠kihci inentaakosinitc.

⁸ Wiin kaye kaa⁠onci ompinaatc ketimaakisinitc i'imaa kaashi paashkinehsenik, wiin kaye kaa⁠ompinaatc onoontehse' i'imaa eshi'ayaanitc ishkwaahkishenk. Miihsh kaye entootawaatc ci⁠wiitapimaanitc keni okimaawinitc, otishi namatapi'aa kaye keshi kihtentaakosinitc. I'i hsa kaashi ahtenik ahkiini kaaTipenciketc otipentaan; mii hsa i'imaa kaa⁠ishi ahtootc o'o ahkiini.”

⁹ “Onaakacihtamawaa' hsa opimaatisiwinini i'i opimaatisiima' tepwe kaa⁠piminisha'okotc, iki tahsh wiin noociko kaa⁠ishihcikewaatc ta‑ankonaakosiwak kaashi kashkiitipihkaninik; kaawiin ihsa awiya wiihkaa otahpiihciiwinink onci shaakoocihtwaahsii.

¹⁰ I'i hsa kaye kaa⁠shiinkenimikotc kaaTipenciketc ta⁠nihshiwanaacihcikaniwiwa', kihcikiishikonk inahke oka onci paakinaanaa'. KaaTipenciketc ohsha owiih tipaahkonaa' misiwe eyaanitc o'omaa ahkiink, miihsh ci⁠miinaatc ci⁠mashkawisiinitc okihciokimaaman, oka ishi'aan kaye ini kaakii onaapamaatc okihciokimaaman ci⁠shaakoocihtwaanitc,” kii‑ishi anami'aa.

¹¹ Miitahsh i'i Elkena kaa⁠ishi kiiwetc Oremaa (Ramah) ootenaank kaakii onciitc; A'a tahsh wiin kwiiwisenhs okii anohkiihtawaan kaaTipencikenitc, Iilaaiwan ekii otookimaamitc.

Iilaai Okosihsa' Ehtashimimintc

¹² Iilaai (Eli) itahsh okosihsa' kii⁠maci'ishiwepisiwa', kaawiin okii kihci inenimaahsiini kaaTipencikenitc.

¹³ Kaawiin kaye okiih pisiskentansiini kaakii nihtaa ishihcike'itinitc anami'ewikimaa', pemaatisinitc kaye. Awiya hsa piko kiih⁠pakitinank opakitinaahsowin, anami'ewikimaa hsa otanohkii'aakanan okiih tahkonamini nehswaapiteyaanik ciihta'ipon mekwaa wiiyaahs e⁠ontenik.

¹⁴ Miitahsh kaa⁠ishi antwaakami'ikenitc i'imaa kihci onaakanink, komaa kaye ahkihkonk, minihk itahsh iko kaa‑akwaa'aminitc wiiyaahs, mii hsa 'i weni kaah⁠tipentaminitc anami'ewikimaan. Miitahsh kahkina Isriyalak (Israel) kaah⁠tootawintwaa kaakiih piishaawaatc i'imaa Shaailoo (Shiloh) ootenaank.

¹⁵ Miitahsh kaye kaa⁠ishihcikenitc, mihsawaa hsa ko cipwaa ankwaahkitenik pimite, anami'ewikimaa hsa otanohkii'aakana' okiih pi naasihkawaani ini ininiwan pekitinaahsonitc o'o ekii'inaanitc, “Taka miishihshin i'i wiiyaahs ke⁠kiishisank anami'ewikimaa; kaawiin kika otaahpinamaakohsii kiishpin ontenik, kikashkininik ehta oka otaahpinaan,” okii'inaani.

¹⁶ Kiishpin itahsh ini pekitinaahsonitc o'o ihkitonitc, “Taka weweni ishihciketaa, pinamaa ci⁠ankwaahkitek pimite, miitahsh ci⁠otaahpinaman minihk iko entawentaman.” Miihsh o'o kaa'inaanitc, “Kaawiin, shemaak iko noonkom miishihshin i'i wiiyaahs, kiishpin miishihsiwan, kika mahkamin,” okii'inaani.

¹⁷ Miitahsh o'o kaa⁠ishi maci'ishihcikewaatc iki oshkiniikiwak. Wiinke okii kihci aanwaapantamini kaaTipencikenitc, aaniihsh onsaam kaawiin okii kihtentansiinaawaa eshi pakitinamawimintc kaaTipencikenitc.

Saamiyoo Kii'ayaatc Shaailoo ootenaank

¹⁸ A'a tahsh wiin kwiiwisenhs Saamiyoo (Samuel) kiih⁠tashi anami'ewanohkii enaahsamiinitc kaaTipencikenitc, ekiih kikishkank ohkaahkikani naapishkikanenhs.

¹⁹ Miitahsh entahso pipoon kaakiih piishaanitc omaamaan ekii nihtaa oshihtamaakotc kinwaapiikiwi kashkiikiiwinenhs. Okii nihtaa piitooni hsa ahpii kiih⁠piishaanitc, kiihpi wiiciiwaanitc onaapemini kiihpi anta pakitinaahsonitc entahso pipoon.

²⁰ Mii hsa 'i Iilaai (Eli) kaakii'inaatc ci⁠minohsenitc Elkenawan, wiiwini kaye Henawan (Hannah), o'o ekii ihkitotc, “Taka hsa kaaTipenciketc kika miinik apinoonciisha' ono onci ihkwewan ci⁠meshkocihsenitc ini kaakii onci anami'aahpan ekiih kakwetwetc, kaakii miinaatc itahsh kaaTipencikenitc,” kii‑ihkito. Miitahsh kaa‑ani ishi kiiwenitc.

²¹ Miitahsh Hena kaakiih shawenimikotc kaaTipencikenitc, nihsin kwiiwisenhsa' ekii nihtaawiki'aatc, niishin kaye ihkwesenhsa' ekii ayaawaatc. A'a tahsh wiin kwiiwisenhs Saamiyoo kii⁠ompiki enaahsamiinitc kaaTipencikenitc.

Iilaai, I'i Kaye Okosihsa' Ehtashinsowaatc

²² O'o tahsh ahpii Iilaai aasha kii⁠ahkiwensiiwi. Kii⁠noontam hsa kahkina aaniin kaa⁠ishihcikenitc okosihsa' i'imaa Isriyalihkaank; ekii waawiihpemaanitc kaye i'i ihkwewa' kaakiih tashi pamiihtaakenitc i'imaa eshi ishkwaantemiwaninik maawaci'itiwi pakwaanekamikonk.

²³ Miitahsh kaa'inaatc, “Wekonen itahsh o'o wenci ishihcikeyek? Kahkina hsa awiyak niwiintamaakook macikekoon iinsan e⁠ishihcikeyek.

²⁴ Ninkosihsak, kaawiin hsa 'i kitaa ishihcikehsiim; i'i hsa kaa⁠noontamaan e⁠inaacimikooyek eshi'ayaanitc kaaTipenciketc opimaatisiima', kaawiin kiminwaacimikoohsiim.

²⁵ Inashke kiishpin awiya kii⁠maanshi tootawaatc wiicininiwan, Kishemanitoon hsa oka naatamawaani. Kiishpin itahsh inini kii⁠maanshi tootawaatc kaaTipencikenitc, awenenan itahsh inaa ke⁠naatamaakohpan?” okii inaa'. Kaawiin itahsh okiih papaamihtaakohsii' i'i okosihsa' aaniihsh aasha kaaTipencikenitc kii‑inentamoon ewii nihsikonitc.

²⁶ A'a tahsh kwiiwisenhs Saamiyoo kii⁠ani maaciiki, ekii ani minwaapamikotc kaaTipencikenitc, ininiwan kaye.

Iilaai Niiyaak Kiiwiintenik Aaniin Keni'ishihsenik Otaawin

²⁷ Kenootamawaanitc Kishemanitoon itahsh Iilaai (Eli) okii otihsikoon ekiih pi wiintamaakotc aaniin ehkitonitc kaaTipencikenitc. Miihsh o'o kaa'ikotc, “O'o hsa ihkito kaaTipenciketc, ‘Niin iitok kaakii naakosiihtawakipan kaakii okehteya'aamiyampan Eran (Aaron) otaawinink weti mekwaa Iicipahkiink (Egypt) kii⁠ayaawaahpan Peroon (Pharaoh) kii⁠tipenimikowaahpan?

²⁸ Kahkina tahsh kaakii tahswewaanakisinitc Isriyala' (Israel), kikehteya'aam hsa otaawinink ninkii onci onaapamimaa' ke⁠anami'ewikimaawinitc. Ta⁠tashi pamiihtaakewan kaashi pakitinaahsonk, ci⁠minaahsikenitc kaye, ci⁠kikishkaminitc kaye ohkaahkikani naapishkikan enaahsamiiwak. Niin kaye kaakii miinimak pisaan i'imaa cishi wiitoohkaasonitc kahkina kekoon kaakiih pakitinikaatenik i'imaa ishkotenk.

²⁹ Wekonen itahsh wenci maanentaman ini nimpakitinaahsoohtamaakoowinan, nimiinikoowinan kaye niin kaa‑antawentamaan nintaawinink? Wekonen itahsh nawac wenci kihtenimatwaa kikosihsak ahpiihc niin, e⁠ani onci aancipoonintisowaatc eh⁠pimi otaahpinamowaatc maawac wenishihshink wiiyaahs pekitinaminitc nimpitaatisiima' Isriyala'?’

³⁰ Niin ohsha kaaTipencikeyaan weKishemanitoomiwaatc Isriyalak, miihsh o'o ehkitoyaan, ‘Mii hsa 'i kaa⁠ishi ahshotamaampaan kitaawinink, kikehteya'aam kaye otaawinink ci⁠onciiwaahpan ke⁠nehpici anohkiihtamawiwaahpan enaahsamiiwak.’ O'ohsh noonkom nintihkit, ‘Kaawiin i'i insan intawaa ta⁠ishihsehsinoon! Iki hsa kaa⁠kihtenimiwaatc ninka kihtenimaak, iki tahsh wiin ke⁠aanawenimiwaatc keniin ninka aanawenimaak.

³¹ Ta⁠ocihcihse ohsha ci⁠kiishikahk ahpii ke⁠nihsakwaa kahkina weshkaatisiwaatc i'imaa kitaawinink wenciiwaatc, i'imaa kaye wenciiwaatc kikehteya'aam otaawinink. Kaawiin itahsh awiya ta‑ayaahsii ke⁠ahkiwensiiwitc wentahkaanesiyan.

³² Wiinke hsa kika onci ocaanimihse kitaawinink, kika aayaahshentam hsa ahpii waapankeyan keshi minotootawakwaa Isriyalak. Kaawiin itahsh wiihkaa miinawaa awiya kitaawinink ta⁠onciihsii ci⁠ahkiwensiiwitc.

³³ Shaakooc itahsh peshik kipiiwesiim ninka pakitinaa ci⁠pimaatisitc, miitahsh a'a ke⁠inanohkiitc ci⁠anami'ewikimaawitc. Kaawiin itahsh tani waapihsii, miihsh ke⁠ani ishi pakitentank. Kahkina tahsh kotak kipiiwesiimak mekwaa e⁠mashkawaatisiwaatc ta⁠nipowak.

³⁴ Aaniin itahsh ke⁠ishihsewaatc iki niishin kikosihsak, Haahpnaai (Hophni), Pineyahs (Phinehas) kaye, mii hsa 'iwe ke⁠kihkinawaasaapantaman. Minciniish ihsa ta⁠nipowak peshikwan kiishikaninik.

³⁵ Niin hsa tahsh iko ninka ontinamaahs ke⁠tepweyentaakositc anami'ewikimaa ke⁠ishihciketc aaniin eshi antawentamowak ninte'ink. Ninka miinaa hsa ke⁠opiiwesiimitc, miitahsh i'i ke⁠nehpici inanohkiinitc enaahsamiinitc ke⁠onaapamimak kihciokimaan.

³⁶ Tani ishihse tahsh entahso peshikowaatc ke⁠ishkonewaatc kitaawinink wenciiwaatc, cipi naasihkawaawaatc ini anami'ewikimaan ci⁠animihkohtaawaatc eshi'ayaanitc ci⁠antotamawaawaatc peshik waapaapihko shooniyaan, pahkweshikanan kaye o'o ci‑ihkitowaatc, “Taka inakimihshinaam ci⁠wiicihtwaayaank anami'ewanohkiiwinink, ke⁠onci ayaayaank ke⁠miiciyaank,” ’ ” okii'ikoon kaaTipencikenitc.