1 Saamiyoo 16 - Ojibwe Kihcimasina'ikan

Tepit Kii'onaapamintc Ci'anikihciokimaawitc

¹ KaaTipencikenitc itahsh Saamiyoo okii'ikoon, “Aaniin hsa minihk waa⁠mawimatc Swaal (Saul). Ninkii aanawenimaa iitok o'o kaashi kihciokimaahkantawaatc Isriyala'! Pimite hsa mooshkinepatoon i'imaa kaashi nihtaa ahtoopaakeyan maanatihko ehskan. Miitahsh ishi maacaahkan. Weti hsa kitishinisha'oon ootenaank Pehtalihem (Bethlehem) ecikaatek kaashi ayaatc inini Cehsi (Jesse) kaa⁠ishinihkaasotc. Peshik ohsha okosihsan niin iko niwii onaapamimaan ci⁠kihciokimaawinitc,” okii'ikoon.

² Saamiyoo (Samuel) hsa kii‑ihkito, “Aaniin itahsh ke⁠onci ishaayaan? Inashke Swaal ahpii noontank, ninka nihsik kehcinaac,” kii‑ihkito. Miihsh o'o kaa⁠ishi nahkwehtaakotc kaaTipencikenitc, “Noonshe pishihkiinhs hsa maaciish, o'o hsa ihkitoohkan; mii hsa kaa⁠onci piishaayan ewiih pakitinaahsoohtamawak kaaTipenciketc.

³ Cehsi (Jesse) tahsh kaye antomaahkan kaawii ishi pakitinaahsoyan; kika kihkino'amawin tahsh aaniin ke⁠ishihcikeyan. Kika siikinamowaan hsa pimiteni ohtikwaanink a'a inini niin iko ke⁠onaapamak,” okii'ikoon.

⁴ Miihsh Saamiyoo kaa⁠ishihciketc kaakii'ikotc kaaTipencikenitc ekii ishi takohshink i'imaa ootenaank Pehtalihemink (Bethlehem). Kaakii niikaanisinitc hsa i'imaa ootenaank okiih pi'anta nakishkaakoo' ekii nininkaanimisinitc ekii'ikotc, “Pisaan ina kipi takohshin?” okii'ikoo'.

⁵ Mii hsa kaa⁠ihkitotc, “Eya', pisaan nimpi takohshin, nimpi anta pakitinaahsoohtamawaa kaaTipenciketc kaa⁠onci piishaayaan. Pehki'itisok itahsh cishi wiiciiwiyek kaawiih tashi pakitinaahsoyaan.” Okiih pehki'aan hsa kaye Cehsiwan i'i kaye okosihsini ekii ishi wiishaamaatc kaakii wii ishi pakitinaahsotc.

⁶ Ahpii hsa weti kaa‑ani takohshinowaatc Saamiyoo okii waapamaan Iilaaipan (Eliab). Mii hsa kaa⁠inentank, “Wa'a hsa inini kehcinaac niipawiwitok enaahsamiinitc kaaTipencikenitc, ewii onaapamikotc ci⁠kihciokimaawitc,” kii‑inentam.

⁷ KaaTipencikenitc hsa okii'ikoon, “Keko wiin aaniin eshinaakositc ishi kanawaapamaahken, aaniin kaye ehkoositc aaniihsh aasha niin ninkii aanawenimaa. Niin kaaKishemanitoowiyaan kaawiin nintishi kanawaapamaahsii inini, ininiwan kaashi kanawaapamikotc; inini hsa saakicaya'ii ishi kanawaapancike, Kishemanitoo tahsh wiin ote'imaa okanawaapantaan,” okii'ikoon.

⁸ Cehsiwan hsa okii antomaani kotak okosihsini Apinataap (Abinadab) eshinihkaasonitc Saamiyoo ci⁠waapamaatc. Saamiyoo itahsh kii‑ihkito, “Kaawiin kaye ono kaaTipenciketc otoonaapamaahsiin.”

⁹ Cehsiwan itahsh okii ani'ininaani Shama (Shammah) eshinihkaasonitc Saamiyoo ci⁠waapamaatc. Miihsh Saamiyoo kaa⁠ihkitotc, “Kaawiin hsa kaye ono kaaTipenciketc otoonaapamaahsiin.”

¹⁰ Cehsiwan tahsh minciniishwaahso (7) okosihsini kiih⁠piishaawa' eshi'ayaatc Saamiyoo ci⁠waapamaatc. Mii hsa kaa'inaatc Cehsiwan, “KaaTipenciketc ohsha kaawiin o'o otoonaapamaahsii',” okii'inaan.

¹¹ Miitahsh kaa‑ani'inaatc, “Mii na 'i ehta entahshiwaatc kikosihsak?” Miihsh o'o Cehsiwan kaa⁠ishi nahkwehtaakotc, “Keyaapi hsa peshik ayaa maawac kaa⁠ohshiimenshimaawitc; weti tahsh ayaa kaashi naanaakaci'aatc maanahcaanihsha',” okii'ikoon. O'ohsh Saamiyoo kii‑ihkito, “Taka hsa antomihk ci⁠piishaatc, kaawiin hsa kika onapihsiimin paanimaa kiih⁠takohshink,” kii‑ihkito.

¹² Miitahsh Cehsiwan kaa⁠ishi antomaanitc ci⁠piicikaniwinitc ini okosihsini. Aahpici hsa kii⁠minonaakosiwan, kii⁠mino'ayaawinaakosiwan kaye, kii⁠minwaapewiwan kaye. KaaTipencikenitc tahsh Saamiyoo okii'ikoon, “Mii ohsha wa'a kaa⁠onaapamak, siikinamaw pimiteni ohtikwaanink,” okii'ikoon.

¹³ Mii hsa tahsh Saamiyoo kaa⁠ishi siikinank pimiteni ohtikwaaninink mekweya'ii eshi'ayaanitc wiicihkiweyini. I'i hsa ahpii eh⁠kiishikaninik, kaaTipencikenitc otAhcaahkoni okii mashkawi naasihkaakoon a'a Tepit (David). Mii hsa Saamiyoo kaa⁠ishi pasikwiitc ekii ani kiiwetc ootenaank Oremaa (Ramah) ecikaatenik.

Tepit Kii'ayaatc Swaalan Otaawininiink

¹⁴ Swaal (Saul) tahsh okii nakanikoon kaaTipencikenitc otAhcaahkoni, maci'ahcaahkwan tahsh okiih piicinisha'amaakoon kaaTipencikenitc ci⁠kakwaatakentamo'ikotc.

¹⁵ Miitahsh otanohkii'aakana' kaa'ikotc, “Inashke hsanaa Kishemanitoo maci'ahcaahkwan kitishinisha'amaak ci⁠kakwaatakentamo'imihk.

¹⁶ Taka hsa anoonihshinaam ci⁠nanaantone'wankitc awiya ke⁠nihtaa kitohciketc matweyaapiikipicikanan. Kika kitohcikehtamaak itahsh ahpii otihsimihk maci'ahcaahkwan ke⁠piicinisha'amawihk kaaTipenciketc, miihsh papenak ci‑inamanci'oyan,” okii'ikoo'.

¹⁷ Miitahsh Swaal kaa⁠ishi anoonaatc ekii'inaatc, “Ontinamawihshik awiya ke⁠nihtaa kitohciketc, o'omaa tahsh piinaahkek eshi'ayaawak,” kii‑ihkito.

¹⁸ Peshik itahsh otanohkii'aakanan okii'ikoon, “Ninkii waapamimaan hsa Cehsi (Jesse) ootenaank Pehtalihemink (Bethlehem) kaa⁠onciitc okosihsan wiinke e⁠nihtaa kitohcikaakenitc matweyaapiikipicikanan. Aahpici hsa soonkite'ewan, miikaasowininiiwiwan kaye. Wiinke kaye nihtaa kaakiikitowan, aahpici kaye minonaakosiwan. KaaTipencikenitc hsa kaye owiiciiwikoon.”

¹⁹ Miitahsh Swaal kaa⁠ishi ishinisha'waatc awiya' o'o ci⁠awi'inaanitc Cehsiwan, “Taka piicinisha'o kikosihs Tepit (David), kaa⁠kanawenimaatc maanahcaanihsha',” okii'inaan.

²⁰ Miitahsh Cehsi kaa⁠ishinisha'waatc Tepitoon ci‑ishiwitamawaanitc Swaalan ci⁠tako piinaanitc maanatihkoonhsan, pahkweshikanan kaye ekiih pihciwane'aatc maanshimihtatimoonk, peshikooshkimot kaye shoominaapooni.

²¹ Ahpii tahsh Swaal wetihsikotc Tepitoon, mii 'i kaa⁠ishi maatanohkiihtaakotc. Wiinke okiih saaki'aan, ekiih tinowi'aatc ci⁠pimiwitoonitc omiikaasoowayaan.

²² Miitahsh Swaal kaakii anoohkiitc ci⁠awi'inimintc Cehsiwan, “Taka pakitin Tepit o'omaa ci⁠ayaatc ci⁠anohkiihtawitc, wiinke ohsha niminwaapamaa,” kii‑ihkito.

²³ Ahpii tahsh iko maci'ahcaahkwan e⁠otihsikotc Kishemanitoon eh⁠piicinisha'amaakotc, mii hsa 'i Tepitoon kaa⁠ishi otaahpinaanitc omatweyaapiikipicikanini ekiih kitohcikenitc. Miitahsh kaa⁠ishi nakanikotc ini maci'ahcaahkwan, papenak kaye ekii inamanci'otc, ekii aahtemanci'otc.