1 Saamiyoo 15 - Ojibwe Kihcimasina'ikan

Amalehk Kaatinowinitc Kiimiikaanikowaatc Isriyalak

¹ Saamiyoon (Samuel) tahsh Swaal (Saul) okii'ikoon, “Niin hsa kaaTipenciketc kaakiih piicinisha'ohpan ci⁠onaapaminaan ci⁠okimaahkantawatwaa pemaatisiwaatc Isriyalak (Israel); pisintamow itahsh o'o ehkitotc kaaTipenciketc.

² Mii hsa 'oweni ehkitotc kaaMaawaci mashkawisiitc kaaTipenciketc, ‘Niin hsa niwii nana'ahsaak Amalehk (Amalekites) kaatinowiwaatc i'i kaakiih tootawaawaatc Isriyala', ekii nakaashkawaawaatc Iicipahkiink kiih⁠pionci takohshininitc.

³ Maacaan hsa awi miikaash Amalehk, kahkina kaye kekoon kika nihshiwanaacihtaawaam tepentamowaatc, keko kaye manaaci'aahkekwaanik. Ininiwak, ihkwewak, apinoonciishak, apinoonciishenhsak kaye kika nihsaawaak. Otawahkaanini kaye, pishihkiwak, maanahcaanihshak, pihkwaawikane mihtatimook, maanshimihtatimook kaye,’ ” kii‑ihkito.

⁴ Miitahsh Swaal kaa⁠ishi antomaatc otininiima' ewii waapamaatc i'imaa Telaim (Telaim) ayaawinink. Niishwaahk tahsink mitaahswaahk hsa kii⁠tahshiwa' 200,000, tako tahsh mitaahciink mitaahswaahk 10,000 wenciinitc Coota ahkiink (Judah).

⁵ Miitahsh kaakii ishaawaatc, i'i otininiima' eshi otootenaaminitc Amalehk kaatinowinitc, eshi pahsatinaanik itahsh kii‑ishi ahkantoowak.

⁶ Miitahsh kaa⁠ishi kanoonaatc Kiinii (Kenites) kaatinowinitc kaakii minotootawaanitc Isriyala' Iicipahkiink (Egypt) kiihpi onciinitc, o'o ekii'inaatc, “Nakanihkwak Amalehk kaatinowiwaatc ci⁠tako nihsikoohsiwek nihsankitwaa,” okii inaa'. Miitahsh kaa⁠ishi nakanaanitc.

⁷ Miitahsh Swaal kaakiih shaakooci'aatc Amalehk kaatinowinitc, ekii miikaanaatc i'imaa Hapila (Havilah) ayaawinink piinihsh weti Sher (Shur) pikwatahkamik, waapanonk inahke Iicipahkiink.

⁸ Okiih kaahcitinaan kaye Amalehk onci kihciokimaan Ekak (Agag) eshinihkaasonitc kikipimaatis. Kahkina tahsh wiin okii nihsaa' pemaatisinitc.

⁹ Kaawiin itahsh wiin Swaal, i'i kaye otininiima' kaawiin okii nihsaahsiwaawaan Ekakoon, i'i kaye maawac wenishihshinitc maanahcaanihsha', pishihkiwa' kaye, kaa‑aanciponitc kaye pishihkiinhsa', kahkina hsa ko kekoon wenishihshininik. Kahkina tahsh wiin kekoon kaa‑aanawencikaatenikin, kekoon kaye eh⁠piihtentaakwahsininikin okii nihshiwanaacihtoonaawaan.

Swaal Kii'aanawencikaniwitc Ekihciokimaawitc

¹⁰ Miitahsh o'o Saamiyoo kaa'ikotc kaaTipencikenitc,

¹¹ “Wiinke hsa nimaanentam ekii kihciokimaawi'ak a'a Swaal, aaniihsh kaawiin aasha nimpiminisha'okohsii, kaawiin kaye ishihcikehsii kaakii inaahkonakipan ci‑ishihciketc,” okii'ikoon. Saamiyoo tahsh kii⁠onci mikoshkaatentam, ekii anami'aatc pehkihsh ekii mawitc enaahsamiinitc kaaTipencikenitc kapetipihk.

¹² Miitahsh wiipa kikishep Saamiyoo kaakii wanishkaatc ekii anta nakishkawaatc Swaalan o'o ekii inaawintipanen, “Swaal ohsha ahpane ishaa weti Kaarmal (Carmel) waciink. Mii hsa weti kaakii awi oshihtamaasotc kihkinawaacihcikan ke⁠onci maamihkawinotawaakaniwitc. Weti tahsh inahke Kilkal (Gilgal) ootenaank kii⁠ani ishaa,” kii‑inaawintipan.

¹³ Miihsh Saamiyoo kaakii otihsaatc Swaalan eshi'ayaanitc. Miitahsh o'o kaa'ikotc, “Kishemanitoo hsa kika shawenimik, ninkii ishihcikewaan hsa kaakii ishi anooshihpan kaaTipenciketc ci‑ishihcikewak!”

¹⁴ Miihsh Saamiyoo kaa⁠ihkitotc, “Aaniin tahsh inaa wenci noontawakwaa maanahcaanihshak e⁠noontaakosiwaatc, pishihkiwak tahsh kaye e⁠noontaakosiwaatc?”

¹⁵ O'ohsh Swaalan okii'ikoon, “Nishimaakanihshiimak ohsha okii mahkamaawaa' Amalehk kaatinowinitc, ekii ishko'aawaatc aya'aawihsha' maawac wenishihshinitc maanahcaanihsha', pishihkiwa' kaye ewiih pakitinamawaawaatc kaaTipencikenitc kiKishemanitooman, kotak tahsh wiin kahkina ninkiih caaki'aanaanik,” okii'ikoon.

¹⁶ Miitahsh Saamiyoo kaa'inaatc Swaalan (Samuel), “Pehkaa pinamaa, kiwii wiintamawin aaniin kaaTipenciketc kaa'ishitc tipihkonk.” Swaal hsa kii‑ihkito, “Haw, wiintamawihshin.”

¹⁷ Miihsh Saamiyoo kaa⁠ihkitotc, “Aana hsa wiin kiin iko aapitink ekii akaahsenintisoyan, kii⁠ani ishihseni kiin ci⁠okimaahkantawatwaa Isriyalak (Israel); kaaTipenciketc ohsha kaakii onaapamihk ci⁠okimaahkantawimatc Isriyala'.

¹⁸ KaaTipenciketc ohsha kikii ishinisha'ok kekoon ci⁠wii ishihcikewatc ekii inihk, ‘Maacaan awi caaki' kaa⁠macaatisiwaatc pemaatisiwaatc Amalehk kaatinowiwaatc, miikaash, wawiinke hsa piko caaki'.’

¹⁹ Wekonen itahsh kaa⁠onci na'ihtawaahsiwatc kaaTipenciketc i'i kaakii inihk; mii hsa kaa⁠ishihcikeyan awahshime ekii aahskonentamowatc otaya'iimiwaan, ekii ishihcikeyan noociko enaahsamiitc kaaTipenciketc,” okii'inaan.

²⁰ Miihsh o'o Swaalan kaa⁠ishi nahkwehtaakotc, “Ninkii na'ihtawaa ohsha kaaTipenciketc, ekii ishihcikewak aaniin kaakii'ishitc ahpii kii⁠maacinisha'otc, ekiih piinak a'a kihciokimaa Ekak (Agag) eshinihkaasotc, wawiinke kaye ekii caaki'akwaa Amalehk kaatinowiwaatc.

²¹ Nintininiimak itahsh kaawiin okii nihsaahsiwaawaa' maanahcaanihsha', pishihkiwa' kaye, kaawiin kaye okii nihshiwanaacihtoohsiinaawaan kekoonan maawac wenishihshininikin. Miiwan tahsh ini kaa⁠miinintc Kishemanitoo ci⁠pakitinaahsoohtamawintc kaaTipenciketc kiKishemanitoom o'omaa ootenaank Kilkal (Gilgal),” okii'ikoon.

²² Miitahsh Saamiyoo kaa⁠ihkitotc, “Nawac ina kaaTipenciketc ominwentaanan kaa‑ankwaahkitenikin kaa⁠pakitinamawintc, kaa⁠pakitinaahsoohtamawintc kaye, ahpiihc wiin ci⁠na'ihtawintipan aaniin ehkitotc? Inashke nawac ohsha onishihshin awiya ci⁠na'ihtankipan ahpiihc wiin ci⁠pakitinaahsohpan, nawac kaye onishihshin awiya ci⁠pisintankipan ahpiihc wiin ci⁠pakitinikaatenikipan opimitewiniwaa aape maanahcaanihshak.

²³ I'i hsa shashiipihtamowin mii 'i enentaakwahk i'i maci'ishihcikewin kaa⁠kakanoonintwaa manitoohkaanak. Kihci inenintisowin hsa inentaakwan taapishkoo awiya kaa⁠manitoohketc. E⁠aanawentamowatc itahsh kaaTipenciketc kaakii inihk, kewiin hsa kitaanawenimik o'o kaashi kihciokimaawiwatc,” okii'inaan.

²⁴ Miihsh Swaalan kaa'ikotc, “Ninkii macitootam; Tepwe iinsan ninkii mamaashiihkantamowaanan kaaTipenciketc otinaahkonikewinan, ini hsa kaye kaakii'ishiyan; onsaam aaniihsh ninkiih kohsaak pemaatisiwaatc, ninkiih pisintawaak kaye aaniin kaakii'ishiwaatc.

²⁵ Taka tahsh noonkom poonentamawihshin o'o kaashi macitootamaan, taka kaye kika kiiwe wiiciiwin, ci⁠anami'ehtawak kaaTipenciketc,” okii'ikoon.

²⁶ Miihsh Saamiyoo kaa'inaatc Swaalan, “Kaawiin kiwiih kiiwe wiiciiwihsinoon; onsaam aaniihsh kikii aanawentamowaan kaakii inihk kaaTipenciketc; kewiin iitok kitaanawenimik o'o kaashi kihciokimaahkantawimatc Isriyala',” okii'inaan.

²⁷ Ahpii tahsh Saamiyoo e⁠ani kwehkikaapawitc ewii ani maacaatc, Swaalan okii tepipitooni okashkiikiiwin ekii piikopitoonitc.

²⁸ Miihsh kaa'inaatc Swaalan, “KaaTipenciketc ohsha kipiikopitamaak i'i kitookimaawiwin o'omaa Isriyalihkaank noonkom kaa⁠kiishikaninik; omiinaan ohsha kiicipimaatisiin nawac sesekaa ininiiwinitc ahpiihc kiin.

²⁹ A'a hsa Kehci inentaakositc i'imaa Isriyalihkaank kaawiin ta⁠kiiwanimohsii, kaawiin kaye ta‑aantentansii, kaawiin iitok tino ininiiwihsii ci⁠aantentankipan,” kii‑ihkito.

³⁰ Miihsh Swaalan kaa⁠ihkitonitc, “Niin hsa ninkii macitootam; taka hsa noonkom kihtenimihshin enaahsamiiwaatc oko kaa⁠niikaanisiwaatc Isriyalak, iki kaye Isriyalak. Taka tahsh kiiwe wiiciiwihshin ci⁠anta anami'ehtawak kaaTipenciketc kiKishemanitoom,” okii'ikoon.

³¹ Miitahsh Saamiyoo kaa⁠ishi kiiwe wiiciiwaatc Swaalan, miihsh kaye kaa⁠ishi anami'ehtawaanitc kaaTipencikenitc.

³² Miitahsh o'o Saamiyoo kaa⁠ihkitotc, “Piitamawihshik a'a Ekak kaa⁠kihciokimaahkantawaatc Amalehk kaatinowinitc.” Ekakoon itahsh kii⁠minwentamoon ehpi naasihkaakotc ekii inentaminitc, “Tepwe maawiin kaawiin ninka wiihsakaahpinanikoohsii.”

³³ Miihsh o'o Saamiyoo kaa'inaatc, “Kipashipa'ikewihkomaanink hsa niipiwa' ihkwewak kaa⁠onci ayaawaahsikwaa oniicaanihsiwaa', mii hsa peshikwan kimaamaa kewiin keshi'ayaawaahsik oniicaanihsa'.” Miitahsh Saamiyoo kaa⁠ishi piihsishwaatc Ekakoon enaahsamiinitc kaaTipencikenitc i'imaa Kilkalhkaank.

³⁴ Miitahsh i'i Saamiyoo kaa⁠ishi kiiwetc ootenaank Oremaa (Ramah) ecikaatenik. Kewiin itahsh Swaal owaahkaa'ikanink kii‑ishi kiiwe weti ootenaank Kiipiyah (Gibeah) ecikaatenik.

³⁵ Kaawiin itahsh Saamiyoo miinawaa okii onci waapamaahsiin Swaalan piinihsh ekii otihsaapantank eh⁠kiishikaninik kii‑ishkwaa pimaatisitc; aana hsa ekii mamawimaatc Swaalan. KaaTipenciketc hsa kewiin kii⁠maanentam ekii kihciokimaawi'aatc Swaalan ci⁠tipenimaanitc Isriyala'.