1 Saamiyoo 1 - Ojibwe Kihcimasina'ikan

Ahpii Saamiyoo Kiinihtaawikitc

¹ Kii⁠ayaa hsa inini Elkena (Elkanah) eshinihkaasotc i'imaa Oremaa (Ramah) ootenaank, Soohp (Zuphite) eh⁠tinowitc. Weti hsa kii⁠oncii eshi papiihkwatinaanik Iihpariyam (Ephraim) ahkiink. Ceroham (Jeroham) hsa kii‑ishinihkaasowan oteten. Omishoomihsan itahsh Ilaaiho (Elihu) kii‑ishinihkaasowan. Otaanihkoopisan itahsh Tooho (Tohu) kii‑ishinihkaasowan, kaakii otetenitc Soohp eshinihkaasonitc, Iihpariyam (Ephraim) ekii ontahkaanesinitc.

² Elkena hsa kii⁠niishoohkwewe, Hena (Hannah) peshik kii‑ishinihkaasowan wiiwan. Ini tahsh kotak wiiwan Penina (Peninnah) kii‑ishinihkaasowan. Peninawan hsa okii ayaawaani apinoonciisha', ini tahsh wiin Henawan kaawiin okii kashkihtoohsiini ci⁠otapinoonciishiminitc.

³ Entahso pipoon hsa tahsh Elkena otootenaamink kii⁠onci maacaa ekii ishaatc Shaailoo (Shiloh) ootenaank ekii anta pakitinaahsoohtamawaatc kaaMaawaci mashkawisiinitc kaaTipencikenitc. Niishin hsa Iilaai (Eli) okosihsa' kii⁠anami'ewikimaawiwa' weti ekii anohkiihtawaanitc kaaTipencikenitc; Haahpnaai (Hophni), Pineyahs (Phinehas) hsa kii‑ishinihkaasowa'.

⁴ Ahpii hsa kaa⁠ocihcihsenik Elkena ci⁠pakitinaahsotc, okii ahshamaan wiiwan Peninawan kahkina kaye okosihsini, otaanihsini kaye.

⁵ Iniweniwan tahsh wiin kotak wiiwan Henawan niishink i'i minihk okii ahshamaan aaniihsh okiih saaki'aan, kaaTipencikenitc aana aanakii ishi'ikonitc ci⁠otapinoonciishimihsinik!

⁶ A'a tahsh Hena etatawe okiih kakwaatakimikoon Peninawan wawiinke ekii onci wiiyakishkentank, aaniihsh kaaTipenciketc okii ishi'ikoon ci⁠otapinoonciishimihsik.

⁷ Miitahsh o'o kaah⁠tootaakotc Peninawan entahso pipoon, tahsink iko kii‑ishaatc owaahkaa'ikaniniink kaaTipencikenitc ekii miihkinsomikotc Peninawan piinihsh ekii moohkomikotc, kaawiin kaye kii⁠wiihsinihsii.

⁸ Onaapeman itahsh Elkenawan okii'ikoon, “Hena wekonen itahsh wenci mawiyan? Wekonen kaye wenci wiihsinihsiwan, wekonen kaye wenci maanentaman? Kaawiin ina niin nawac kikihci inenimihsii ahpiihc wiin mitaahso okosihsimaak?” okii'ikoon.

Hena, Iilaai Kaye Ehtashimintwaa

⁹ Aapitink tahsh e⁠ishkwaa wiihsiniwaatc, kaa⁠ishkwaa minihkwewaatc kaye weti Shaailoo (Shiloh) ootenaank, Hena (Hannah) kiih⁠pasikwii. I'imaa tahsh kaakii ishi ishkwaantemiwaninik i'i owaahkaa'ikanini kaaTipencikenitc, kii⁠namatapiwan Iilaaiwan (Eli) tehsapiwinink kaakii anami'ewikimaawinitc.

¹⁰ Wiinke hsa tahsh Hena ekiih piikwentank, okii anami'ehtawaan kaaTipencikenitc, ekii kihci mawitc ekii wiyakishkentank.

¹¹ Miitahsh kaakii ahpimotc ekii ihkitotc, “Oo kaaMaawaci mashkawisiiyan kaaTipencikeyan, taka kanawaapamihshin, niin iitok kaa⁠pamiihtawihk. Maamihkawinotawihshin kaye, keko waniihkenotawihshihken. Miishihshin hsa ci⁠okosihsiyaan; miitahsh ci⁠kiiwe miininaan a'a kwiiwisenhs minihk iko ke⁠pimaatisitc, kaawiin kaye wiihkaa ta⁠pashkwaakohtikwaanehsii,” kii‑ishi anami'aa.

¹² Mekwaa tahsh e⁠anami'ehtawaatc kaaTipencikenitc, Iilaaiwan hsa okiih kanawaapantamini otoon.

¹³ Ote'ink hsa Hena kii‑ishi anami'aa ekii wawaahkawitoonetc, kaawiin kanake cikii noontaatitc. Miihsh kaa⁠inenimikotc Iilaaiwan eh⁠kiiwashkwepiitc.

¹⁴ Miitahsh kaa'ikotc, “Aaniin tahsh minihk waah⁠kiiwashkwepiiyan? Wepinan i'i kishoominaapoom, taka mii 'i ishi pooni minihkwen,” okii'ikoon.

¹⁵ Miitahsh o'o Hena kaa⁠ishi nahkwehtawaatc, “Nintookimaam, kaawiin ninkiiwashkwepiihsii. Niin ohsha ihkwe kaa⁠wiiyakishkentamaan nintahcaahkonk. Kaawiin nintoonci minihkwehsii shoominaapo, kaa⁠mashkawaakamik kaye minihkwewin. KaaTipenciketc ohsha niwiintamawaa eshi wiiyakishkentamowak!

¹⁶ Keko tahsh inenimihshihken taapishkoo tino ihkwe kekoon enentaakosihsik; nintoonci anami'aa ohsha o'o kaashi kakwaatakentamaan, kaashi maanentamaan kaye,” okii'inaan.

¹⁷ Miitahsh Iilaaiwan kaa'ikotc, “Maacaan, mii 'i ishi pisaanentan. Taka Kishemanitoo kaa⁠tipenimaatc Isriyala' (Israel) kika miinik i'i kaashi pakohsenimatc,” okii'ikoon.

¹⁸ Miihsh Hena kaa⁠ihkitotc, “Taka hsa minwaapamihshin e⁠inentaakosiyaan ihkwe kaa⁠pamiihtawihk.” Miitahsh i'i Hena kaa⁠ishi maacaatc ekii awi wiihsinitc, kaawiin hsa tahsh awahshime kii⁠maanentamoowinaakosihsii.

Hena Kiihpakitinaatc Okosihsan Eshi'ayaanitc KaaTipencikenitc

¹⁹ Wiipa tahsh kikishep e⁠ani waapaninik kii⁠wanishkaawak ekii anami'ehtawaawaatc kaaTipencikenitc. Miitahsh kaa⁠ishi kiiwewaatc otaawiniwaank weti kaakii onciiwaatc ootenaank Oremaa (Ramah) ecikaatenik. Miitahsh Elkena (Elkanah) kaakii wiihpemaatc wiiwan Henawan (Hannah). Miitahsh kaaTipenciketc kaakii maamihkawinotawaatc Henawan.

²⁰ Naanaake tahsh e⁠ani ishihsenik Hena kiih⁠kikishkawaawahso, ekii nihtaawikinitc kwiiwisenhsan. Saamiyoo (Samuel) hsa okii ishinihkaanaan. Miihsh kaa⁠ihkitotc, “KaaTipenciketc iitok ninkiih kakwecimaa ono kwiiwisenhsan,” kii‑ihkito.

²¹ A'a tahsh Elkena kii‑ishaa kahkina piko entahshitc ekii awi pakitinaahsoohtamawaatc kaaTipencikenitc, ekii ishihciketc kaakii ishi ahpimokopanen.

²² Hena tahsh wiin kaawiin kii‑ishaahsii; mii hsa kaa'inaatc onaapeman, “Kaawiin niin niwii ishaahsii; paanimaa kii‑ishkwaa nooni'aawahsoyaan ninka ishaa; miihsh i'i ahpii ke⁠ishiwinak, ci⁠pakitinak kaashi ayaanitc kaaTipencikenitc nehpic iko weti ci⁠ayaatc,” ekii'inaatc.

²³ Miitahsh onaapeman Elkenawan kaa'ikotc, “Aaniin hsa piko eshi onishihshentaman ishihciken. Mii hsa o'omaa pisaan ayaan piinihsh ci‑ishkwaa nooni'aawahsoyan. Taka hsa kaaTipenciketc ta⁠ishihcike kaakii ihkitotc.” Mii hsa tahsh Hena kaa⁠ishihciketc, ekii apitc piinihsh ekiih pooni nooni'aatc okosihsan.

²⁴ Ahpii tahsh kaah⁠pooni nooni'aawahsotc, mii hsa kaa⁠ishi maaciinaatc okosihsan. Okiih tako maaciinaan kaye kaakii nihsopipoonwenitc aape pishihkiinhsan, peshikooshkimot pahkweshikanan, peshik kaye kaakii ishi piintenik shoominaapooni. Miitahsh kaakiih piinaatc i'imaa Shaailoo (Shiloh) ootenaank owaahkaa'ikaniniink kaaTipencikenitc. Ini tahsh kwiiwisenhsan aahpici kii⁠oshkaatisiwan.

²⁵ Ahpii tahsh kaa⁠ishkwaa nihsaawaatc aape pishihkiinhsan, mii hsa kaa⁠ishi ishiwinaawaatc kwiiwisenhsan Iilaaiwan (Eli) eshi'ayaanitc.

²⁶ Miihsh o'o Hena kaa'inaatc Iilaaiwan, “Oo nintookimaam, tepwe hsa ko kaa'ininaan, niin ohsha a'a ihkwe kaakii waapamatipan o'omaa e⁠niipawitc, kaakii anami'ehtawaahpan kaaTipencikenitc.

²⁷ Mii hsa wa'a kwiiwisenhs kaakii onci anami'aayaampaan, kaaTipenciketc hsa tahsh ninkii miinik aaniin kaakii ishi kakwecimakipan.

²⁸ Miitahsh noonkom e⁠miinak kaaTipenciketc ono kwiiwisenhsan ci⁠tipinawewisitc. Minihk hsa piko ke⁠pimaatisitc oka tipinawewisiimikoon kaaTipencikenitc.” Miitahsh i'imaa kaa⁠ishi anami'ehtawaatc kaaTipencikenitc?