1 Piitar 5 - Ojibwe Kihcimasina'ikan

Kishemanitoo opimaatisiima' e'inenimaatc omaanahcaanihshima'

¹ Iki hsa kaaniikaanentaakosiwaatc kaa‑ayaawaatc weti kaaishiayayek, miiwak hsa iki kaakanoonakwaa; keniin iitok niniikaanentaakos ekii'waapamak Christ ehkakwaatakihtootc, niwii'wiitoohkaas tahsh okihci‑inentaakosiwin kaawii'naakohcikaatenik.

² Miitahsh enakwaa: Naakaci'ihkwak Kishemanitoo omaanahcaanihshima' kaamiininek cinaakaci'imek, keko wiin anihsaac ishihcikehkek, kiinawaa hsa piko kitinentamowiniwaank cionci ishihcikeyek citootamowek Kishemanitoo otinentamowin. Keko wiin ehta cimihciontisiyek onci‑ishihcikehkek, ciihkentamok hsa 'i e'anohkiihtawek e'naanaakaci'iweyek.

³ Keko wiin kaye kakwetipenimaahkekwaanik iki kaamiinikooyek cinaakaci'ekwaa, ishipimaatisik hsa keshikihkinawaapaminekwaa.

⁴ Ahpii tahsh naakositc a'a kaamaawaci niikaanentaakositc Okanawimaanahcaanishiwe, kikatepinaam tahsh i'i cikikaanohkwaanaatamek i'i kihci‑inentaakosiwin wiihkaa keniankonaakwahsinok.

⁵ Mii hsa peshikwan kekiinawaa kaaoshkaatisiyek na'ihtawihkwak iki kaakihtaatisiwaatc. Kahkina piko kaatahshiyek pihcihkonayaatamok tapahsenimowin ciwaawiitoohkotaatiyek, aaniihsh Kihcimasina'ikan ishipii'ikaate: “Kishemanitoo ohsha onakaashkawaa' kaakihci‑inenintisonitc; ominotootawaa' itahsh wiin i'i kaatapahsenimonitc.”

⁶ Kiinawaa tahsh tapahsenintisok pisaan citipeniminek Kishemanitoo kaaishimashkawisiitc, ciompininek wiin iko ahpii keshiminwaapantank.

⁷ Pakiciwanehtamawihk wiinihtam cipimiwanehtamawinek kahkina kaamikoshkaatentamo'ikoyek, aaniihsh wiin kinaanaakaci'ikowaa.

⁸ Waapaahkamentamok, ahshawaapik kaye, aaniihsh kaashinkeniminek maciaya'aa papamiayaa taapishkoo mihshipishiw kaapapaanoontaakositc e'nanaantawaapamaatc awenenan waahkitamwaatc.

⁹ Aayiicikaapawik itahsh i'imaa kitepwehtamowiniwaank, cinakaashkawek maciaya'aa. Kikihkentaam iitok kewiinawaa kahkina kiwiiciotepwehtamoomaakaniwaak misiwe ahkiink mii peshikwan e'ishipimohsewaatc kakwaataki'ikoowinink.

¹⁰ Ahpii tahsh acina kiihkakwaatakihtooyek, Kishemanitoo kaawenooci wii'miikiwetc kishewaatisiwin, kaakii'antoominek Christink ci‑ishiwiitoohkaasoyek i'imaa kaaishinehpici kihci‑inentaakositc, wiin iko kikakiishinaako'ikowaa, kikaishi'ikowaa kaye ciaayiicikaapawiyek, cimashkawisiiyek, kikanehpici⁠onahsikowaa kaye.

¹¹ Taka Kishemanitoo tatipenimiwe nehpic iko, emen!

Piitar ishkwaac opooshoo'iwewin

¹² Saailahs (Silas) hsa kaatepweyentaakositc kiitanami'aanaan kaainakimak, niwiici'ik o'o pankii kaaoshipii'amawinakook, e'antaweniminakook cimashkawentamek, e'wiintamawinakook kaye Kishemanitoo okishewaatisiwin ehtepwemakaninik. Wawiinke tahsh i'imaa aayiicikaapawik.

¹³ Iki tahsh kaye otepwehtamook kaa‑ayaawaatc Paapilanonk (Babylon) kaakii'wiicionentaakosiiminekwaa, kipooshoo'ikowaak. Kipooshoo'ikowaa kaye ninkosihsink kaainenimak Maarhk (Mark).

¹⁴ Ociimihkwak kaapooshoo'ekwaa otepwehtamook, cinaakwahk ehsaaki'itiyek. Taka pisaanentamowin kikawiiciiwikom kahkina kaawiiciiwek Christ.