1 Piitar 4 - Ojibwe Kihcimasina'ikan

Kipimaatisiwiniwaan ciaancinaakwahkipanen

¹ Christ itahsh kewiin ekiihkakwaatakihtootc owiiyawiink, miitahsh kekiinawaa eshinaakwahk ci‑ishikiishiiyekipan peshikwan i'i nahke ci‑ishinaanaakatawentamekipan. Aaniihsh awiya kaakakwatakihtootc owiiyawiink aasha okiihpoonihtoon macitootamowin.

² Miitahsh i'i eshinaakwahk minihk iko kepimaatisiyek o'omaa ahkiink ci‑ishipimaatisihsiwekipan kaaishi nihtaa mihsawencikewaatc pemaatisiwaatc; i'i hsa ci‑ishipimaatisiyekipan Kishemanitoo kaaishiantawentank.

³ Aasha iitok teminihk otaanaank kikii'ishiwepisim kaaishiwepisiwaatc kaatepwehtansikwaa. Miitahsh o'o kaa'ishiwepisiyek, ekii'wiinaatisiyek, ekii'macimihsawencikeyek, ekii'nihtaa kiiwashkwepiiyek, ekii'nanihtaa ohkwiinoyek ekiihpaapaa‑⁠kiiwashkwepii‑⁠nihshiwanaatahkamikisiyek, ekii'ishi nihtaa anami'ehtawekwaa kaye manitoohkaanak ekii'ishihcikeyek kekii manaa ishihcikeyekipan.

⁴ Wiinke tahsh kimaamahkaatenimikowaak iki kaatepwehtansikwaa, e'wiiciiwaahsiwekwaa kaanihtaa ishicikewaatc kaaishinihtaa osaamihcikewaatc, miitahsh i'i noociko kaaonci‑ininekwaa.

⁵ Wiinawaa hsa piko okanahkwehtawaawaan Kishemanitoon i'i kaakii'ishihcikewaatc, aasha kaakiishiihtaanitc ewiihtipaahkonaanitc i'i kaapimaatisinitc, i'i kaye kaaniponitc.

⁶ Mii hsa tahsh kewiinawaa kaakii'onciwiintamawintwaa minwaacimowin iki aasha kaakii'nipowaatc. Aanawiin ininiinaank inahke ekii'ishitipaahkonintwaa owiiyawiwaank, shaakooc itahsh otahcaahkowaank taishipimaatisiwak Kishemanitoonaank inahke.

Miikiwewinan Kishemanitoonk kaaonciikin weweni citoocikaatekipanen

⁷ I'i hsa kahkina kekoon kaawii'ishkwaahsek aasha pehshonaakwan, kashkihtook itahsh kwayahk ci‑ishitipenintisoyek, waapaahkamentamok kaye cikashkihtooyek cianami'aayek.

⁸ Maawac itahsh iko o'o ishihcikek, aahpici hsa saakiwiiciintik, aaniihsh mii 'imaa saaki'iwewinink eshiankonaakwahkin kaapaahtinatihkin macitootamowinan.

⁹ Paahpaahkintenamaatik kaye kitaawiniwaan; keko tahsh i'i oncikihcikaakiikitohkek.

¹⁰ Entahsopeshikoyek itahsh kaakii'ishimiinikoowisiyek miikiwewinan cinaanaakacihtooyek, miitahsh eshinaakwahk ci‑inaapacihtooyekipan kimiinikoowiniwaan Kishemanitoo kaakii'miininek cionciminohse'itiyek kaatahshiyek.

¹¹ Awenen tahsh iko kaakiikitotc, ishinaakwanini citashintankipan Kishemanitoon ehkitonitc. Awenen tahsh iko kaye kaapamiihtaaketc ishinaakwanini ciaapacihtoohpan mashkawisiiwin Kishemanitoon kaamiinikotc, kahkina hsa piko kekoonink Kishemanitoo cimiikwehciwentaakositc onci ini Ciisahs Christan. Wiin iitok kaatipentank kihci‑inentaakosiwin, mashkawisiiwin kaye, nehpic iko, emen.

Otanami'aa okakwaatakihtoowin ehtashintenik

¹² Kaasaaki'inakook, keko maamahkaatentankek i'i kaa'otihsikoyek kaawiisakentaakwahkin koci'ikoowinan kaakakwaataki'ikoyek taapishkoo e'inentaakwahk ewii'mayaki‑ishiwepisiyek.

¹³ Meshkwac ohsha kitaaciihkentaam e'inentakwahk e'wiitoohkaasoyek inahke Christ kaakii'ishi kakwaatakihtootc, ci'oncimooshkineshkaakoyek minwentamowin ahpii naakohcikaatenik okihci‑inentaakosiwin.

¹⁴ Kiishpin itahsh oncimaci‑ikooyek Christ otishinihkaasowinink, mii 'i cishawentaakosiyek, aaniihsh a'a Ahcaahk kaakihci‑inentaakositc kikikishkawaawaa, amiiwan ihsa ini Kishemanitoo otAhcaahkwan.

¹⁵ Kehcinaac maawiin kika kakwaatakihtoom. Keko tahsh wiin oncikakwaatakihtoohkek taapishkoo kaaoncikakwaatakihtootc awiya kaanihshiwetc, okiimoocishk, kaanihtaa mamaashiitc, a'a kaye kaawanashkwehkamikisitc eshiopapaamisiwinihsik.

¹⁶ Inashke hsa kiishpin awiya onci kakwaatakihtootc e'anami'ewaatisitc, taka keko ta‑akatentansii, meshkwac hsa okamiikwehciwenimaan Kishemanitoon ehpimiwitootc Christan owiinsowinini.

¹⁷ Mii ohsha 'i aasha tipa'ikan e'ocihcihsek tipaahkonikewin cimaacihsek, iki tahsh Kishemanitoonk kaaoncitipentaakosiwaatc nihtam tatipaahkonaawak. Kiishpin tahsh kiinihtamawint tipaahkonikooyank, aaniin iitok keishihsewaakwen i'i kaakii'na'ihtansikwaa minwaacimowin Kishemanitoonk wenciinik.

¹⁸ Kihcimasina'ikan ishipii'ikaate: “Kiishpin okwayahkwaatis akaawaa pimaacihcikaniwitc, aaniin tahsh kaanaka keishihsewaakwen kaakihtenimaahsikwaa Kishemanitoon, kaamaci‑ishiwepisiwaatc kaye.”

¹⁹ Taka tahsh iki kaaonci kakwaatakihtoowaatc ehtootamowaatc Kishemanitoon kaaishiantawentaminitc, okamiinaawaan opimaatisiwiniwaan kaatepweyentaakosinitc kaakii'oshi'ikowaatc, ehtootamowaatc i'iweni kaakwayahkonaakwaninik.