1 Piitar 3 - Ojibwe Kihcimasina'ikan

Wiiwiimaak, onaapemimaak kaye ehkanoonintwaa aaniin keishihcikewaahpan

¹ Kiinawaa wiiwiimaak, miitahsh peshikwan ishipakitinitisok citipeniminekwaa kinaapemiwaak. Inashke mihsawaa ko tepwehtansikwaa Kishemanitoon otihkitowinini, kitishipimaatisiwiniwaa ohsha okakashki'ikonaawaa citepwehtamowaatc, kaawiin itahsh memwehc kekoon kikaihkitohsiim.

² Aaniihsh okawaapantaanaawaa eshipehkaatisiyek, tepwe kaye ehkohtaanenimimek Kishemanitoon.

³ Taka kaye kiminonaakosiwiniwaan kaawiin ta'onciihsinoonan kaaishiwaweshi'itisoyek saakicaya'ii aaniin eshikakwe minonaakohtooyek kiinisihsiwaan, ehkikishkamek kaye kaaosaawi shooniyaawiwankin naapishkikanan, ini kaye kaa/⁠aahkwakintekin kikishkikanan.

⁴ Taka hsa 'i kiminonaakosiwiniwaan taonciimakanoon piincaya'ii kite'iwank, mii hsa 'i tino minonaakosiwin wiihkaa kepoonihsehsinok kaaonciik kiinoohkaatisiyek, kiipisaanaatisiyek kaye. Mii hsa 'iweni Kishemanitoo maawac iko kaakihtakintank.

⁵ Inashke iki otaanaank kaakiihpimaatisiwaatc ihkwewak kaakii'anami'ewaatisiwaatc kaakii'ahpenimonotawaawaatc Kishemanitoon, kii'ishi nihtaa waweshi'itisowak, ekiihpakitinitisowaatc onaapemiwaa' citipenimikowaatc.

⁶ Sera (Sarah) hsa ekii'na'ihtawaatc Eparahaaman (Abraham) kaakii'onci ishinihkaanaatc “nintookimaam.” Miitahsh e'otaanihsiminek Sera kiishpin ishihcikewek kaakwayahkonaakwaninik, kiishpin kaye pakitinansiwek kekoon ciseki'ikoyek aaniin ketootawinekwaa kinaapemiwaak.

⁷ Kekiinawaa tahsh onaapemimaak, mii hsa peshikwan ishiwiicipimaatisiimihkwak kiwiiwiwaak weweni cinihsitawenimekwaa wiinawaa noonta' e'ahpiihciiwaatc, aaniihsh ihkwewiwak. Naakohtaaw tahsh ehkihtenimekwaa aaniin entootawekwaa. Kewiinawaa ohsha tatipinawewisiwak kaawiihtipinawewisiyek i'iweni pimaatisiwin Kishemanitoo kaamihcimiikiwetc. Kiishpin tahsh i'i ishihcikeyek, kaawiin kekoon tawanashkwe'iwemakahsinoon ahpii anami'ehtawek Kishemanitoo.

Awiya kaakakwaatakihtootc okwayahkwaatisiwinink onci

⁸ O'owe tahsh kitinininim ishkwaac, kahkina hsa kaatahshiyek peshikwan ishinaanaakatawentamok, cikoohpaatenintiyek. Ishisaaki'itik kaye kaaishisaaki'itiwaatc kaaowiicihkiwentiwaatc, minotootaatik kaye, tapahsenimok kaye.

⁹ Awiya kaye macitootawihk, keko macikekoon tipa'ikaakehken. Awiya kaye maci‑inihk, keko aashite maci‑inaahken. Takwac hsa kiin kakwecimim Kishemanitoon ciminohse'ikotc. Citepinamowek ohsha kaakii'onciantominek ciminohse'inek Kishemanitoo.

¹⁰ Kihcimasina'ikan hsa ishipii'ikaate: “Awenen hsa ko kewii'minwentank ehpimaatisitc, kaamihsaawentank kaye ciwaapantank kaaminohsewikiishikaninik, mii hsa 'i eshinaakwaninik cimacikiishwehsikipan, cipoonihtoohpan kaye kaaishinihtaakiiwanimotc.

¹¹ Ishinaakwanini hsa cipoonihtoohpan macikekoonan, meshkwac tahsh citootankipan i'i kaaonishihshininik, cikakwe mino wiiciiwiwehpan, mooshak iko 'i cikakwe ishihcikehpan.

¹² KaaTipenciketc ohsha okanawaapamaa' kakwayahkwaatisinitc, opisintawaa' kaye kiianami'ehtaakotc; kaawiin tahsh wiin ominwaapamaahsii' i'i kaamacitootaminitc.”

¹³ Awenen tahsh kekashkihtoohpan cimaashitootawinek kiishpin mihsawentamek ewiihtootamek i'i kaaonishihshik?

¹⁴ Mihsawaa hsa ko oncikakwaataki'ikooyan ehtootaman i'i kaakwayahkonaakwahk, etatawe hsa kikihcishawentaakos. Keko kaye kohtamowaahkek awiya kaawiihtootawinek; keko kaye ocaanimentankek.

¹⁵ Anami'e kohtaanenimihk itahsh Christ kite'iwaank, aaniihsh te⁠ahpiihtentaakosi ci‑ishikihtenimintipan ehTipenciketc. Ahshwiin tahsh mooshak iko cinahkwehtawatipan awiya kaakakwecimihk ciwiintamawatc, i'iweni kaa'ahpite'ehshimoonowatc.

¹⁶ Weweni oncikanoosh kinoohkaatisiwinink. Weweni ishipimaatisin waawiinke cipehkiayaak kaa'oncinaanaakatawentaman. Iki hsa noociko kaaitamowaatc i'i kaaishiminotootamowatc e'wiiciiwimatc Christan, taonciakaci'itisowak i'i kaashi⁠macitashimihkwaa.

¹⁷ Nawac iitok taonishihshinini kiishpin Kishemanitoon inentaminitc, awiya cioncikakwaatakihtoohpan ehtootank kaaonishihshininik, ahpiihc wiin awiya cioncikakwaatakihtoohpan macikekoonink.

¹⁸ Mii hsa Christ kewiin kaa'ishiwepisitc: Christ hsa aapitink kii'oncinipo, cipoonencikaatenikin macitootamowinan, mii 'i kiihtetipa'ank; wiin kaakwayahkwaatisitc ekii'nipoohtamawaatc i'i kaakwayahkwatisihsinik, ewii'ishipiininek Kishemanitoon kaashiayaanitc. Wiiyawimaank hsa inahke kii'ishinihcikaniwi, ahcaahkonk itahsh wiin inahke kiihpimaatisi'aa.

¹⁹ Miitahsh i'i nahke kaakii'ishi‑ishaatc ekii'awi wiintamawaatc ahcaahkwa' weti kaakiihtashikipa'omintc.

²⁰ Miiwa' ihsa 'i otahcaahkowaa' iki otaanaank kaakii'na'ihtawaahsikwaa Kishemanitoon ahpii kiishashiipi pii'onitc mekwaa Noowawan (Noah) kiioshihtoonitc kihciciimaanini. Aahpici tahsh pankii, nihshwaahso (8) ehta pemaatisiwaatc kii'oncipimaaci'aawak nipiink.

²¹ I'i tahsh nipi, mii 'i eshinaakwahk siika'antaasowin noonkom kaapimaaci'ikoyek. Kaawiin wiin ehta noociko kekoon kaakiisiiyaapaawacikaatek kiwiiyawiwaank kitoonci pimaaci'ikoowisihsiim. I'iwe ohsha awiya kaaonci ahshotamawaatc Kishemanitoon kwayahk e'ishinaakwaninik kaaoncinaanaakatawentank. Christ hsa kaakii'ishi kiiwepimaatisi'intc nipowinink onci, mii hsa 'imaa wencipimaaci'ikoowisiyek.

²² Wiin iitok Christ kaakii'ishaatc kihcikiishikonk ekii'awi apitc okihcinihkiniink inahke Kishemanitoon, ekii'miinintc citipenimaatc encala', i'i kaye kaa‑ahcaahkwentaakosinitc kaakashki'ewisinitc, i'i kaye kaamashkawentaakosinitc.