1 Piitar 2 - Ojibwe Kihcimasina'ikan

Kaatepwehtamowaatc ehtipenimikowaatc Kishemanitoon

¹ Taka hsa tahsh wepinamok kahkina kaamacinaakwahkin, kakiinawishkiwin, anami'ehkaasowin, aayaahshenintiwin, macitashintiwin kaye.

² Taapishkoo oshkapinoonciishak kaanihtaawikiwaatc kaawii'noontenooniwaatc, mooshak iko noontayaapaakwenotamok i'i wiinke kaapehkaakamihk coocoohshaapo keminoshkaakowaatc kitahcaahkowaak, minihkwaatamok i'imaa cionci⁠maaciikiyek cipimaaci'ikoowisiyek.

³ Aasha iitok kiinawaa kikii'masihpitamowaam ominotootaakewin kaaTipenciketc.

Christ ahsiniink kaainentaakositc, otepwehtamook kaye e'inentaakosiwaatc

⁴ Pinaasihkawihk kaaTipenciketc, kaapimaatisitc ahsin kaakii'aanawenimikotc pemaatisinitc, Kishemanitoon tahsh wiin kaakii'onakimikotc, ekiihkihci‑inenimikotc kaye.

⁵ Miitahsh kekiinawaa peshikwan ehtinowiyek ahsiniik kaapimaatisiwaatc, kitishi/⁠aapatisim i'i kaaoshihcikaatek ahcaakowaahkaa'ikan. Miitahsh i'imaa ketashi‑inwaasoyek anami'ewikimaak kaa/⁠aapaci'ikowaatc Kishemanitoon, cipakitinamawek kaa‑ahcaahkowentaakwaninikin pakitinaahsowinan, miiwan iitok kaaminwaapantank onci Ciisahs Christan.

⁶ Kihcimasina'ikan ishipii'ikaate: “Inashke nintahsaa ahsin Saayaniink (Zion) ekii'onaapamak kehci'inakinsotc kaaniikaaninihtamaapihkihshink. Awenen tahsh iko kaatepweyenimaatc kaawiin tamincinawesihsii.”

⁷ Kiinawaa tahsh kaatepwehtamek wa'a ahsin aahpici kikihci‑inenimaawaa. Iki tahsh wiin kaatepwehtansikwaa o'o ishitepimaawak: “Ini hsa ahsiniin kaawaahka'ikewaatc kaa/⁠aanawenimaawaatc, miiwan ihsa ini maawac kaaniikaanentaakosinitc ahsiniin.”

⁸ Kayehsh e'ani‑ishipii'ikaatek, “Miiwan ihsa ini ahsiniin pemaatisiwaatc kepisokeshkaakowaatc, miiwan kaye ini kekawiwepishkaakowaatc.” Miitahsh kaakii'oncipisokehshinowaatc, aaniihsh kaawiin okiina'ihtansiinaawaa i'i kaakii'ihkitonitc Kishemanitoon. Mii iitok i'i kaakii'inenimikowaakopanen Kishemanitoon ci‑ishihsewaatc.

⁹ Kiinawaa tahsh kaaohko‑onentaakosiyek, anami'ewikimaak ehtinowiyek kaa‑anohkiihtawek Kishemanitoo kaaKihciokimaawitc, pahkaan kaye kaakii'inahsinek ewii'inaapaci'inek, Kishemanitoo kaye kaatipeniminek, kikii'onaapamikowaa citipaatotamowek ominohcikewinan. Kiinawaa kaye kaakiihkanooninek cisaaka'amowek i'imaa kaaishikashkiitipihkahk kaakii'ishi ayaayekipan, i'imaa tahsh cishipiintikeshkaayek kaaishionishihshininik owaahseyaasiwin.

¹⁰ Aaniihsh otaanaank kaawiin kikiihtipenimikohsiiwaa Kishemanitoo; noonkom itahsh wiin kitipenimikowaa. Kaawiin kaye kikiihtepinamowaahsiim okoohpaasinaakewin; noonkom tahsh wiin aasha kikiihtepinamowaam.

Na'ihtawihk Kishemanitoo kahkina kaa'ishihcikeyek

¹¹ Kaasaaki'inakook, kitishikaanoonininim kaapiiwitewentaakosiyek, o'omaa kaye ahkiink kaaoncitipentaakosihsiwek, cimiitaakwenotamek kimacimihsawencikewiniwan, miiwan iitok ini kaakakwe shaakooci'ikoyek i'imaa kitahcaahkowaank.

¹² Aahpici tahsh kwayahk ishipimaatisik kaaishiayaawaatc iki kaatepwehtansikwaa, aanawiin e'ininekwaa e'maci‑ishiwepisiyek. Inashke hsa okanihsitawinaanaawaan ini kitishihcikewiniwaan kaaonishihshininikin, miitahsh keshimiikwehciwenimaawaatc Kishemanitoon ahpii kiishikaninik wiihpi anta tipaahkoniwenitc.

¹³ KaaTipenciketc tahsh e'wiiciiwek, na'ihtamok kahkina ininiiwi⁠onahkonikewinan; na'ihtawihk kaye a'a kaye Maawac kaaKihciokimaawitc kahkina kekoonini kaanaakacihtootc.

¹⁴ Na'ihtawihkwak kaye kaani aanihke okimaawiwaatc, aaniihsh Maawac iko kaaKihciokimaawinitc okii'onakimikowaan cinana'ahsaanitc kaanihtaa mamaashiinitc, ciminwaapamaanitc tahsh wiin i'i kwayahk kaaishihcikenitc.

¹⁵ Kishemanitoo hsa inentam i'i kaaishiminohcikeyek ci'onci poonihtoonitc i'i kaakakiipaatisinitc pemaatisinitc kaaishinihtaa kaakiikitonitc, kehkentansinik ehkitonitc.

¹⁶ Ishipimaatisik itahsh taapishkoo pemaatisiwaatc kaatipenimaahsiwintwaa, keko tahsh wiin nahpaac inaapacihtoohkek i'i kaaishitipenimikoohsiwek ci'oncikaatooyek macikekoon. Ishipimaatisik itahsh ehtinowiwek Kishemanitoo kaatipenimaatc otanohkii'aakana'.

¹⁷ Kihtenimihkwak kahkina awiyak, saaki'ihkwak kaye kiiciotepwehtamoomiwaak, kohtaanenimihk kaye Kishemanitoo. Kihtenimihk hsa 'a kaye Maawac iko Kihciokimaa.

Cikii‑ishikakwaatakihtoowankipan Christ kaakii'ishikakwaatakihtootc

¹⁸ Kiinawaa tahsh opamiihtaakek pakitinitisok pisaan iko citipeniminekwaa kitookimaamiwaak, tako kihtenimihkwak kaye. Kaawiin wiin ehta kaaminotootawinekwaa, kaanaanaakataweniminekwaa kaye; iki hsa ko kaye kaakakwaanihsakisiihtawinekwaa.

¹⁹ Kiishpin oncikakwaatakihtooyek e'naanaakatawenimek Kishemanitoo, shiipinenotamek itahsh o'o kakwaatakihtoowin kaakiih kashkihtamaasohsiwek, Kishemanitoo hsa kikashawenimikowaa.

²⁰ Kaawiin iitok kekoon kitaa onci minwakimikoohsiim kiishpin mihsawaa ko shashiipentamek i'i kaaishipahpahkihte'okooyek kimamaashiiwiniwaan onci, aaniihsh kikashkihtamaasom. Kiishpin itahsh shashipentamek i'i kaaishikakwataki'ikooyek kikwayahkohcikewiniwaank onci, Kishemanitoo hsa kikaminwaapamikowaa.

²¹ Mii hsa tahsh kaakii'onci‑ishiantomikooyek, aaniihsh Christ kiihkakwaatakihtoo kiinawaa onci, ekii'nakatamawinek kenaapaapantamowek cipiminisha'wek aaniin kaaishipimaatisitc.

²² Kaawiin iitok wiihkaa kii'macitootansii, kaawiin kaye wiihkaa kii'noontawaahsii cikiiwanimotc.

²³ Ahpii hsa noociko kii‑icikaniwitc, kaawiin kii'aashite‑⁠noociko‑⁠ihkitohsii. Ahpii kaye kiikakwaataki'intc, kaawiin okii'inaahsii' kaakiihkakwaataki'ikotc: “Haw meshkwac kiinawaa kikakakwaatakihtoom.” Mii 'i iitok kaakiihpakitinitisotc keshinaatamaakotc Kishemanitoon kwayahk kaaonaahkoniwenitc.

²⁴ Wiin hsa piko kikiihpimiwitamaakonaan kimacitootamowininaanin i'imaa owiiyawink ahpii kiinihsintc aashiteyaahtikonk, kiinawint cionci‑inentaakosiwank ekii'nipowank, cipapaamentansiwank awahshime macitootamowin, meshkwac itahsh ci‑ishipimaatisiwank cikwayahkwaatisiyank. I'i hsa tahsh kaakii'ishi maahkihcikaniwitc kitoonci minoayaa'ikoomin.

²⁵ Taapishkoo maanahcaanihshak kaakii'wanihshinowaatc kikii'ishinaakosim, aasha tahsh noonkom kikiihpi ashekiiwewinikoom cipiminisha'wek Okanawimaanahcaanihshiwe kaainintc, kaakanawentank kipimaatisiwiniwaan.