1 Cwaan 5 - Ojibwe Kihcimasina'ikan

Aaniin eshishaakoocishkamank o'o ahki

¹ Kahkina awiya kaatepwehtank Ciisahsoon e'aawinitc kaakii'onakimikonitc Kishemanitoon cipimaaci'iwetc, mii hsa 'awe Kishemanitoon kaaoniicaanihsimikotc. Kahkina tahsh kaye awiya kaasaaki'aatc Kaaoyoohsimimintc, osaaki'aa' kaye awenena' iko Kishemanitoon kaaoniicaanihsimikonitc.

² Miitahsh o'o wencikihkentamank ehsaaki'imank Kishemanitoo oniicaanihsa', kiisaaki'ank Kishemanitoo, ehtootamowank kaye otinaahkonikewinan.

³ Ehkanawentamowank tahsh Kishemanitoo otinaahkonikewinan, mii 'imaa eshinaakohtaawank ehsaaki'ank. Otinaahkonikewinan tahsh kaawiin sanakentaakwahsininiwan.

⁴ Awenen itahsh iko kaaoniicaanihsimikotc Kishemanitoon oshaakoocishkaanan ahkiink kaatanentaakwaninikin. Aaniin itahsh mayaa wencipahkinawaatamank ahkiink kaatanentaakwahk? Kitepwehtamowininaanink ohsha!

⁵ Awenen tahsh keshaakoocishkankipan ahkiink kaatanentaakwaninikin? A'awe hsa ehta kaatepwehtank Ciisahsoon e'oKosihsimikonitc Kishemanitoon.

Kaatipaacimikotc Ciisahs Christ

⁶ Ciisahs Christ ohsha kaakiihshaaposhkank nipiini kiisiika'antaasotc, miskwiini kaye kiinihcikaniwitc. Kaawiin wiin nipiink ehta kiipi‑ishishaaposhkaahsii, minciniishwayek hsa nipiink, miskwiink kaye. Kishemanitoo otAhcaahkwan tahsh iko tipaacimowan ehtepwewaninik o'o, aaniihsh otAhcaahkwan tepwewin tinowiwan.

⁷ Nihswayek hsa oncitipaacimaa Ciisahs.

⁸ Kishemanitoo otAhcaahkwan, nipi, i'i kaye miskwi. Ono hsa nihswayek peshikwan onci‑inaacimaa.

⁹ Inashke kitepwehtamowaamin inini otinaacimowin, shaakooc tahsh wiin Kishemanitoo otipaacimowin nawac mashkawitepwemakanini, wiin iitok mayaa kaatipaacimaatc oKosihsan.

¹⁰ A'a hsa kaatepweyenimaatc Kishemanitoon oKosihsini, otayaan ote'ink kaaishitepweyaacimimintc oKosihsimaan. Awenen itahsh iko kaatepwehtawaahsik Kishemanitoon, mii 'i okakiinawishkink ehtootawaatc, ehtepwehtansik Kishemanitoon enaacimaanitc oKosihsini.

¹¹ Miitahsh o'o tipaacimowin ehshihsink, Kishemanitoo ekii'miininank pimaatisiwin wiihkaa kepoonihsehsininik. I'i hsa pimaatisiwin oKosihsink onciini.

¹² A'a tahsh kaa‑ayaawaatc oKosihsimaan otayaan pimaatisiwin. A'a tahsh wiin kaa‑ayaawaahsik Kishemanitoon oKosihsini kaawiin otaayaahsiin pimaatisiwin.

Pimaatisiwin wiihkaa kaawiihpoonihsehsinok ehtashintek

¹³ Kitooshipii'amawininim itahsh ono kiinawaa kaatepwehtamowek owiinsowinini Kishemanitoo oKosihsan, cikihkentamek e'ayaayek pimaatisiwin wiihkaa kepoonihsehsinok.

¹⁴ Miitahsh kaye kaaoncikehcinaa'oyank kiinaasihkawank Kishemanitoo: kiishpin ishikakwecimank enahtenik otinentamowin, kikanoontaakonaan.

¹⁵ Kiishpin tahsh kihkentamank e'noontawinank aaniin iko kaashikakwecimank, kikihkentaamin cimiininank i'i kaakii'ishikakwecimank.

¹⁶ Kiishpin awiya waapamaatc wiitanami'aan tootaminitc macitootamowin tino kaaishiwishiwemakahsininik nipowinink, otaa‑anami'ehtawaan ohsha Kishemanitoon, okamiinikoni tahsh pimaatisiwin. Iki kota kaainakwaa omacitootamowiniwaan kaaishiwinikohsikwaa nipowinink. Ayaa hsa macitootamowin kaaishiwishiwemakahk nipowinink. Kaawiin nintihkitohsii cikii'anami'ehcikaatekipan o'o tino.

¹⁷ Kahkina ohsha wanitootamowin macitootawin inakincikaate. Ayaa tahsh macitootamowin kaaishiwishiwemakahsinok nipowinink.

¹⁸ Kikihkentaamin iitok awiya Kishemanitoon kaaoniicaanihsimikotc kaawiin nihtaa⁠macitootansii. Kishemanitoon oKosihsini ohsha okanawenimikoon, maciaya'aan tahsh kaawiin okakashki'ikohsiin cimaashihse'ikotc.

¹⁹ Kikihkentaamin Kishemanitoo e'oniicaanihsiminank; iki tahsh wiin o'omaa ahkiink kaaoncitipentaakosiwaatc maciaya'aan otipenimikowaan.

²⁰ Kikihkentaamin kaye Kishemanitoo oKosihsan ekiihpitakwihshininitc, ekii'miiniminank kaye nihsitohtamowin, cioncikihkenimank kaamayaawentaakositc Kishemanitoo. Kiwiiciayaamaanaan tahsh kaamayaawentaakositc Kishemanitoo, ini kaye oKosihsan Ciisahs Christan. Mii hsa wa'a Kishemanitoo kaatepwewiniwitc, wiin hsa 'a pimaatisiwin wiihkaa kepoonihsehsininik.

²¹ Kaasaaki'inakook niniicaanihsak, keko papaamenimaahkekwaanik manitoohkaanak.