1 Cwaan 4 - Ojibwe Kihcimasina'ikan

Cinanaantakihkenimankwaapan ahcaahkwak

¹ Kaasaaki'inakook, keko tepwehtawaahkekwaanik kahkina kaaihkitowaatc ehkikishkaakowaatc Kishemanitoon otAhcaahkoni. Antakihkenimihkok taka Kishemanitoonk cionciinikwen ini ahcaahkwan kaakikishkawaawaatc. Aaniihsh paahtiinowak kaainwaanitisowaatc ehkiikitoohtamawaawaatc Kishemanitoon, misiwe e'ishaawaatc o'omaa ahkiink.

² O'o tahsh kikaonci⁠kihkenimimaawaan kiishpin tepwe Kishemanitoo otAhcaahkwan e'aawinikwen. Entahsopeshik itahsh iko awiya kaawiintank Ciisahs Christan ininiinaank ekii'ishiowiiyawinitc, mii hsa Kishemanitoonk kaaonciinitc ini Ahcaahkwan kaakikishkaakotc.

³ Entahsopeshik itahsh awiya keihkitohsik Ciisahsoon o'o e'ishiayaanitc, kaawiin iinsan Kishemanitoonk onciihsiiwan ini ahcaahkwan kaakikishkaakotc. Mii ohsha iinsan a'a kaakakwenakaashkawaatc Christan otahcaahkoni, kaakii'noontamek aasha ewiihpitakwihshink. Inashke aasha iitok o'omaa ahkiink ayaa.

⁴ Niniicaanihsak, Kishemanitoonaank tahsh kiinawaa kitoonciim, kikiihshaakoci'aawaak kaye iki kaakii'inwaanitisowaatc ehkiikitoohtamawaawaatc Kishemanitoon, aaniihsh a'a kaakikishkawinek nawac soonkentaakosi ahpiihc wiin ini ahcaahkwan kaakikishkaakowaatc iki o'omaa ahkiink kaaoncitipentaakosiwaatc.

⁵ Ahkiink itahsh oncitipentaakosiwak, miitahsh kaye kaaonci‑ishicikewaatc kaa'ishikiishwenitc ahkiink kaainaatisinitc, mii 'i kaye kaaonci⁠pisintaakowaatc o'omaa ahkiink kaa‑ayaanitc.

⁶ Kiinawint tahsh wiin Kishemanitoonk kitooncitipentaakosimin. Awenen iko kaakiihkenimaatc Kishemanitoon kipisintaakonaan. A'a tahsh wiin Kishemanitoonk kaaoncitipentaakosihsik kaawiin kipisintaakohsiinaan. Miitahsh o'omaa keoncipehteyenimintwaa iki kaakikishkaakowaatc ini Ahcaahkwan tepwewin kaakihkino'ikenitc, iki tahsh kaye kaakikishkawaawaatc ahcaahkwan kaawaniwishiwenitc.

Kishemanitoo osaaki'iwewin ehtashintenik

⁷ Kaasaaki'inakook, taka saaki'ititaa. Saaki'iwewin hsa Kishemanitoonk onciimakan. Kahkina tahsh awiya kaasaaki'iwetc otooniicaanihsimikoon Kishemanitoon, okihkenimaan kaye Kishemanitoon.

⁸ A'awe tahsh kaasaaki'iwehsik kaawiin okihkenimaahsiin Kishemanitoon. Kishemanitoo iitok ishiayaa ehsaaki'iwetc.

⁹ Kishemanitoo tahsh kikii'naakohtamaakonaan ehsaaki'inank, ekiihpiicinisha'waatc kaamihcipeshikonitc oKosihsan o'omaa ahkiink, kiinawint ciayayaawank pimaatisiwin oKosihsink onci.

¹⁰ Miitahsh o'owe saaki'iwewin, kaawiin wiin ekiihsaaki'ank Kishemanitoo, wiin iitok kikiihsaaki'ikonaan, kaakii'onci piicinisha'waatc oKosihsan keoncipoonentamaakooyank kimacitootamowininaanin.

¹¹ Kaasaaki'inakook, kiishpin Kishemanitoo o'o nahke kii'ishisaaki'inank, kekiinawint tahsh ishinaakwan cisaaki'itiyankipan.

¹² Kaawiin mahshi wiihkaa awiya owaapamaahsiin Kishemanitoon, kiishpin tahsh saaki'itiyank, Kishemanitoo iinsan kiwiiciayaamikonaan, mii 'i kiihkiishinaakwaninik osaaki'iwewin kipimaatisiwininaanink.

¹³ Miitahsh wencikihkentamank e'wiiciayaamank Kishemanitoo, e'wiiciayaaminank kaye, aaniihsh kikii'miinikonaan otAhcaahkwan.

¹⁴ Kiinawint hsa kikii'waapantaamin, kitipaacimomin kaye Kaaoyoohsimintc ekiihpiicinisha'waatc oKosihsan cipimaaci'aanitc pemaatisinitc o'omaa ahkiink kaa‑ayaanitc.

¹⁵ Awenen tahsh iko kewiintank Ciisahsoon mayaa e'oKosihsimikonitc Kishemanitoon, mii iitok a'a e'wiiciayaamaatc Kishemanitoon, e'wiiciayaamikotc kaye.

¹⁶ Kiinawint tahsh kikiihpikihkentaamin, ekiihtepwehtamowank kaye aaniin eshisaaki'inank Kishemanitoo. Kishemanitoo hsa ishiayaa ehsaaki'iwetc. Awenen itahsh iko saaki'iwewinink entashipimaatisitc, owiiciayaamaan Kishemanitoon, owiiciayaamikoon tahsh iko kaye.

¹⁷ Kiishpin saaki'iwewin kipimaatisiwininaanink ishikiishinaakwahk, mii 'i keoncikehcina'owenimoyank ahpii tipaahkonikewikiishikahk, aaniihsh Christ kaaishinaakwaninik opimaatisiwin, mii kekiinawint eshipimaatisiyank o'omaa ahkiink.

¹⁸ A'awe kaasaaki'iwetc kaawiin kohtaacihsii. I'i hsa kaakiishinaakwaninik saaki'iwewin oncisaakicishkikaateni kohtaaciwin. Aaniihsh awiya kaananiisaanentank ewii'nana'ahsintc, mii 'imaa wenciik kohtaaciwin. Awiya tahsh kaakohtaacitc kaawiin mahshi kiishinaakohcikaatehsinini saaki'iwewin opimaatisiwinink.

¹⁹ Miitahsh kaaoncisaaki'iweyank, aaniihsh Kishemanitoo nihtam kikiihshawenimikonaan.

²⁰ Kiishpin awiya ihkitotc ehsaaki'aatc Kishemanitoon, shiinkenimaatc itahsh wiitanami'aan, mii hsa 'awe kaakakiinawishkitc. Aaniihsh awiya kaasaaki'aahsik wiitanami'aan kaawaapamaatc, aaniin itahsh inaa keishikashkihtoohpan cisaaki'aatc Kishemanitoon kaawaapamaahsik?

²¹ Miitahsh o'o Kishemanitoo kaakii'inaahkoninank, awenen hsa kesaaki'aatc Kishemanitoon, ishinaakwanini kaye cisaaki'aahpan wiitanami'aan.