1 Cwaan 3 - Ojibwe Kihcimasina'ikan

Kishemanitoo oniicaanihsa' ehtashinsonitc

¹ Inashke pemi⁠ahpiihci⁠shaweniminank Kaaoyoohsimintc! Kishemanitoo oniicaanihsa' kitishinihkaanikoomin. Tepwe aaniihsh kitinowiwaamin! Mii hsa o'omaa ahkiink pemaatisiwaatc kaaonci⁠kihkenimisinowinankwaa aaniihsh kaawiin okihkenimaahsiwaawaan Kishemanitoon!

² Kaasaaki'inakook, aasha ohsha noonkom Kishemanitoo oniicaanihsa' kitinowiwaamin, weti tahsh niikaanaya'ii kaawiin mahshi kihkentaakwahsinoon aaniin mayaa keinentakosiwankwen. Shaakooc itahsh kikihkentaamin, ahpii naakositc, kaainentaakositc kekiinawint ci‑inentaakosiyank; aaniin kaye mayaa eshinaakositc kikaishiwaapamaanaan.

³ Kahkina tahsh awiya o'o kaashiahpenimonotawaatc, ishipehki'itiso taapishkoo kaashipehkentaakosinitc Christan.

⁴ Kahkina tahsh awiya kaanihtaa⁠macitootank, mii 'awe tino kaanihtaa‑aanawentank Kishemanitoon otoonahshowewinini. Kiiaanawencikaatek ohsha onahshowewin, mii hsa 'i e'macitootamonaaniwank.

⁵ Kikihkentaamin tahsh kaye ekiihpitakwihshink ciwepinamawinank kimacitootamowininaanin. Kaawiin wiin Christ otayaahsiin macitootamowin.

⁶ Awiya hsa kaawiiciiwikotc Christan kaawiin nihtaa⁠macitootansii, a'a tahsh awiya kaanihtaa⁠macitootank, mii iinsan 'awe wiihkaa kaawaapamaahsik, kaakihkenimaahsik kaye.

⁷ Niniicaanihsak, taka keko awiya kikawanimikohsiiwaa. A'awe hsa kwayahk kaanihtaatootank, mii hsa a'awe kaashikwayahkwaatisitc taapishkoo kaashikwayahkwaatisinitc Christan.

⁸ A'a tahsh wiin kaanihtaa⁠macitootank maciaya'aank oncitipentaakosi, aaniihsh maciaya'aa kii'oncimacitootam kiimaacihsenik o'o ahkiini. Miitahsh o'o kaakii'oncinaakosinitc Kishemanitoo oKosihsan, ewii'nihshiwanaacihtamawaanitc enanohkiinitc maciaya'aan.

⁹ Awiya hsa Kishemanitoon kaa'oniicaanisimikotc kaawiin nihtaa⁠macitootansii, aaniihsh Kishemanitoon kaaishiayaanitc okikishkaakon. Kaawiin otaakashkihtoohsiin keyaapi cianimacitootank, aaniihsh Kishemanitoonaank oncinihtaawiki.

¹⁰ Aahpici ohsha peyahtenaakosiwak iki Kishemanitoon kaaoniicaanihsimikowaatc, iki kaye maciaya'aan kaaoniicaanihsimikowaatc. Awiya hsa kaaishihcikehsik kaakwayahkonaakwaninik kaawiin Kishemanitoon otooniicaanihsimikohsiin, kaawiin kaye a'a tino osaaki'aahsii' wiitanami'aa'.

E'wiintamaakooyank cisaaki'itiyank

¹¹ Miitahsh o'owe tipaacimowin kaakiihpinoontamek kiimaacii⁠anami'ewaatisiyek, kiinawint hsa cisaaki'itiyankipan.

¹² Keko tahsh wiin nanaapinawaahkek Ken (Cain), kaakii'oncitipentaakositc maciaya'aank, ekii'nihsaatc itahsh ini wiicihkiweyan. Wekonenini tahsh kaa'oncinihsaatc? Otishihcikewinan iitok kii'macinaakwaniniwan, wiicihkiweyan tahsh wiin otishicikewinini kii'minonaakwaniniwan.

¹³ Niitanami'aak, keko maamahkaatentankek kiishpin shiinkeniminekwaa ahkiink kaa‑ayaawaatc.

¹⁴ Kikihkentaamin tahsh kiinawint nipowinink ekii'oncisaakicishkaayank, ekii'ishipiintikeshkaayank tahsh pimaatisiwinink, aaniihsh kisaaki'aanaanik kiitanami'aanaanik. A'awe tahsh wiin kaasaaki'iwehsik, nipowinink tanentaakosi.

¹⁵ Awiya tahsh kaashiinkenimaatc wiitanami'aan mii hsa taapishkoo enentaakositc kaanihshiwetc. Kikihkentaamin itahsh awiya kaanihshiwetc kaawiin okikishkaakohsiin i'i pimaatisiwin wiihkaa kepoonihsehsininik.

¹⁶ I'i tahsh Christ kaakii'ishipakitinank opimaatisiwin kiinawint onci, mii 'imaa keoncikihkentamankipan aaniin awiya kaasaaki'iwetc keishihciketc. Miitahsh kekiinawint eshinaakwahk cipakitinamankipan kipimaatisiwininaanin kiitanami'aanaanik onci.

¹⁷ Awiya tahsh kaatepihsetc kekoonan, waapamaatc wiitanami'aan noontehsenitc, ishikoohpaatenimaahsik tahsh, aaniin tahsh inaa keshikikishkaakohpan Kishemanitoon osaaki'iwewinini?

¹⁸ Kaaoniicaanihsiminakook, taka kaawiin wiin ehta kitihkitowininaanink kikaoncisaaki'iwehsiimin, kaawiin kaye kikamihcitashintansiimin; kikatootaamin hsa cinaakwahk tepwe saaki'iwewin.

¹⁹ O'o tahsh ishihcikeyank, mii 'omaa keoncikihkentamank tepwewinink e'oncitipentaakosiyank. Miitahsh kaye o'omaa keoncipisaanihtooyank kite'inaanin cishaakwenimohsiwank Kishemanitoo enaahsamiitc.

²⁰ Kiishpin hsa ko kiimikoshkaatentami'ikoyank kite'inaanin, kimaci‑ishiwepis e'ikoyank, nawac iitok Kishemanitoo kikihkenimikonaan ahpiihc wiin kaa‑ahpiihci kihkenintisoyank kite'inaanink, wiin kaye kahkina kekoonini kaakihkentank.

²¹ Kaasaaki'inakook, kiishpin kimaci‑ishiwepis ikohsiwank kite'inaanin, miitahsh i'i keoncisoonkite'eyank enaahsamiitc.

²² Miitahsh kaye wencitepinamowank wekonen iko kaakakwecimank, aaniihsh kina'ihtamowaamin, e'ishihcikewank kaye kaaminwaapantank.

²³ Miitahsh o'o enaahkoniketc, citepweyentamowank otishinihkaasowinini oKosihsan Ciisahs Christan, cisaaki'itiyankipan, kaakii'inaahkoninank.

²⁴ A'a tahsh iko kaakanawentank aaniin enaahkonikenitc, otipiwiiciiwaan Kishemanitoon, owiiciiwikoon itahsh kaye. Ini tahsh otAhcaahkwan kaakii'miininank, mii 'imaa wencikihkentamank e'wiiciiwinank.