1 Cwaan 2 - Ojibwe Kihcimasina'ikan

Ciisahs kaawiici'inank

¹ Kiinawaa kaasaaki'inakook niniicaanihsak kaaineniminakook, kitooshipii'amawininim ono cimacitootansiwek. Kiishpin hsa awiya macitootank, kitayaawaanaan kaakiikitoohtamawinank ehkanoonaatc kaaoTetemaawinitc, mii hsa 'awe Ciisahs Christ, kwayahk kaaishihciketc.

² Wiin hsa ko kaaoncipoonentamaakoowank kimacitootamowininaanin, kaawiin wiin kiinehtawint ehta, i'i hsa kaye kaashimacitootaminitc kahkina pemaatisinitc o'omaa ahkiink cipoonentamawimintc.

³ Ehkanawentamowank itahsh Kishemanitoo otinaahkonikewinan, mii 'omaa wencikehcinaa'oyank ehkihkenimank.

⁴ A'awe tahsh wiin “Ninkihkenimaa” kaaihkitotc, ehkanawentansik tahsh otinaahkonikewinini mii 'i iinsan a'a kaakakiinawishkitc. Kaawiin iitok okikishkaakohsiin tepwewin.

⁵ A'awe tahsh wiin kaakanawentank otihkitowinini, Kishemanitoon hsa kekii'ishisaaki'aahpan kiihkiishihcikaateni opimaatisiwinink. Miitahsh i'i ishihcikeyank, mii 'omaa keoncikehcinaa'oyank e'wiiciayaamank Kishemanitoo.

⁶ A'awe tahsh kaaihkitotc ehtipiwiiciiwaatc Kishemanitoon, ishinakwanini ko ci‑ishipimohsehpan peshikwan kaashipimohsenitc Christan.

Oshki‑inaahkonikewin ehtashintek

⁷ Kaasaaki'inakook, kaawiin wiin oshki‑inaahkonikewin o'o kaaoshipii'amawinakook; kehteinaahkonikewin ohsha kaatashintamawinakook, mii hsa i'iwe kaa'maaciikihkentamek kiimaacii⁠anami'ewaatisiyek. O'o tahsh kehteinaahkonikewin, mii hsa 'iweni Kishemanitoo otipaacimowin aasha kaakii'noontamek.

⁸ Shaakooc itahsh oshkikekoonink inentaakwan o'o inaahkonikewin kaaoshipii'amawinakook. Tepwewin iitok i'imaa Christink ishinaakwanini, i'imaa kaye kipimaatisiwiniwaank. Aaniihsh kaakashkiitipihkahk aniankonaakwan, i'i tahsh kaawaahseyaak aasha anisaakaahte.

⁹ A'a tahsh kaaihkitotc e'ayaatc kaashiwaahseyaanik, shaakooc tahsh shiinkenimaatc wiitanami'aan, kaashikashkiitipihkaninik hsa keyaapi ishiayaa.

¹⁰ A'a tahsh wiin kaasaaki'aatc wiitanami'aan, kaashiwaahseyaanik ishipimaatisi. Kaawiin tahsh kekoonini otayaahsiin keoncipisokehshink.

¹¹ A'awe tahsh wiin kaashiinkenimaatc wiitanami'aan, kaashikashkiitipihkaninik iinsan ishiayaa, kaashikashkiitipihkaninik kaye ishipimohse. Kaawiin okihkentansiin aaniinti eshaatc, aaniihsh kaakashkiitipihkaninik okipaapishkaakon.

¹² Kaasaaki'inakook niniicaanihsak kaaineniminakook, mii ohsha kaaoncioshipii'amawinakook, cimaamihkawiyek ekiihpoonencikaatekin kimacitootamowiniwaan Christ otishinihkaasowinink onci.

¹³ Kekiinawaa hsa nawac kaakihtaatisiyek, kitooshipii'amawininim cimaamihkawiyek ehkihkenimek a'a kayehte kaakii'ayaatc kiimaacihsenik kahkina kekoon. Kekiinawaa kaaoshkaatisiyek, kitooshipii'amawininim cimaamihkawiyek ekiihshaakooci'ek maciaya'aa. Kitooshipii'amawininim kiinawaa kaaineniminakook apinoonciishak, cimaamihkawiyek ehkihkenimek kaaoTetemaawitc.

¹⁴ Kitooshipii'amawininim kiinawaa kaakihtaatisiyek, cimaamihkawiyek ehkihkenimek a'a kayehte kaakii'ayaatc kiimaacihsenik kahkina kekoon. Kitooshipii'amawininim kiinawaa kaaoshkaatisiyek, cimaamihkawiyek e'mashkawisiiyek, Kishemanitoo kaye e'ayaanik otihkitowin kipimaatisiwiniwaank, ekiihshaakooci'ek kaye maciaya'aa.

¹⁵ Keko saakihtoohkek kaanihtaainahkamikahk o'omaa ahkiink, ini kaye kekoonan kaa‑ayaakin ahkiink. Kiishpin awiya saakihtootc ahkiiwihcikewinan, kaawiin iinsan osaaki'aahsiin kaaoTetemaawinitc.

¹⁶ Aaniihsh kahkina kekoonan onoweniwan o'omaa ahkiink kaa‑ayaakin, awiya kaaishimacimihsawenciketc, oshkiinshikomaank kaye kaaoncimihsawinaakenk, ishipimaatisiwinink kaye kaashikihci‑inenintisonk, kaawiin ono Otetemaank onciimakahsinoonan, ahkiink ohsha oncioshi'oomakanoon!

¹⁷ I'i hsa ahki, kaaishi⁠mihsawencikenaaniwank kaye, tapoonihsewan. A'a tahsh wiin kaatootank kaashiantawentaminitc Kishemanitoon nehpic tapimaatisi.

Ehtashinsonitc ini kaashiinkenimikotc Christ

¹⁸ Kiinawaa kaasaaki'inakook apinoonciishak, mii 'owe ishkwaac e'ishihsek. Kaakii'ishinoontamek ewiihpitakwihshink a'a kaakakwenakaashkawaatc Christan, aasha tahsh niipiwa' kaakakwenakaashkawaawaatc Christan kiihpitakohshinook. Miitahsh o'omaa wencikihkentaakwahk mii 'i aasha ishkwaac e'aniocihcihsek.

¹⁹ Kaawiin tahsh wiinawaa kiwiicitipentaakosiimikohsiinaanik, mii hsa 'i kaakii'oncinakaninankwaa. Kiishpin kaaoncitipentaakosiyank tepwe ishitipentaakosiwaahpan, keyaapi iitok kitaakii'wiiciiwikonaanik. Ekii'nakaninankwaa tahsh mii 'imaa eshipehtenaakwaninik kaashitipentaakosiyank tepwe e'oncitipentaakosihsikwaa.

²⁰ Kiinawaa tahsh wiin kikii'miinikoowisim Kishemanitoo otAhcaahkwan, kahkina kaye kikihkentaam.

²¹ Kaawiin tahsh kaakii'onci⁠oshipi'amawinakook ehkihkentansiwek tepwewin, ekihkentamek ohsha. Kikihkentaam kaye kiiwanimowin tepwewinink e'onciihsinok.

²² Awenen tahsh kekiinawishkitc? Awiya hsa ko kaaihkitotc Ciisahsoon e'aawihsinik kaakii'onaapamikonitc Kishemanitoon, mii hsa 'awe kaakakwenakaashkawaatc Christan. Aaniihsh kaawiin otipaacimaahsiin Kaaoyoohsimimintc, oKosihsimaan kaye.

²³ Awenen itahsh iko kaatipaacimaahsik oKosihsimaan kaawiin otayaawaahsiin Kaaoyoohsimimintc. A'a tahsh kaatipaacimaatc oKosihsimaan otakoayaawaan Kaaoyoohsimimintc.

²⁴ Miitahsh eshinaakwahk cikikishkamekipan i'i nihtam kaakii'noontamek kiimaacii⁠anami'ewaatisiyek. Kiishpin i'i ishisek, miitahsh keshikihciwi⁠ayaayek kaashiayaatc oKosihsimaa, a'a kaye Kaaoyoohsimintc.

²⁵ Miitahsh o'oweni wiin iko oKosihsimaa kaakii'ahshotamawinank, pimaatisiwin wiihkaa kepoonihsehsininik.

²⁶ Kitooshipii'amawininim itahsh ehtashintamawinakook iki kaakakwe⁠waniwininekwaa.

²⁷ Kiinawaa tahsh wiin Christ kikiihsiikinamaakowaa otAhcaahkwan. Ehkikishkawiminek itahsh, kaawiin memwehc kikamanesihsiim awiya cikihkino'amawinek. OtAhcaahkwan tahsh kaakiihsiikinamawinek kikakihkino'amaakowaam kahkina kekoonini. I'i tahsh kaakihkino'amawiminek tepwewanini, kaawiin wiin kiiwanimowin tinowansinini. I'i tahsh kaashikihkino'amawiminek, mii 'imaa onci mooshak wiiciiwihk Christ.

²⁸ Kiinawaa niniicaanihsak kaasaaki'inakook, taka mooshak wiiciiwaataa. Ahpii tahsh naakositc cisoonkite'eyank, ciakaciihtawaahsiwank kaye ahpii pitakwihshink.

²⁹ Kikihkentaam iitok Christ ehkwayahkwaatisitc; kikihkentaam kaye kahkina awiya kaaishihciketc kaakwayahkonaakwaninik otooniicaanihsimikoon Kishemanitoon.