1 Cwaan 1 - Ojibwe Kihcimasina'ikan

Ihkitowin kaapimaatisiwiniwank

¹ Kitooshipii'amawininim ehtashintamawinakook a'awe Kishemanitoo otIhkitowin kaaishinihkaasotc, wiin kaamiikiwetc pimaatisiwin. Wiin iitok maawac nihtam kii'ayaa. Niinawint iko ninkii'noontawaanaan, nishkiinshikonaanink ninkii'onciwaapamaanaan. Ninkii'naanaakatawaapamaanaan kaye, ninkiihsaaminaanaan kaye, mii hsa a'awe kaa⁠oncioshipii'amaakooyek!

² Ahpii tahsh kiinaakosii'itisotc a'awe pimaatisiwin, ninkii'waapamaanaan, nintipaacimaanaan kaye, ehtashintamaakooyek a'awe mooshak iko pimaatisiwin kaa‑ayaatc. Wiin kaakii'wiiciayaamikotc Kishemanitoon kaaoTetemaawinitc, ninkii'naakosiihtaakonaan.

³ I'i tahsh niinawint kaakii'waapantamaank, kaakii'noontamaank kaye, kaaonciwiintamaakooyek kekiinawaa ciwiiciiwiyaank, o'o kaashiwiiciiwankitc kaaoTetemaawitc, ini kaye kaashiwiiciiwimankitc oKosihsan Ciisahs Christan.

⁴ Miitahsh kaaoncioshipii'amaakooyek niinawint wiinke cikiishinaakwahk niminwentamowininaan.

Kishemanitoo e'waahseyentaakositc

⁵ Miitahsh o'oweni otipaacimowin kaakii'noontawankitc e'wiintamawinankitc, miitahsh o'o kaawiintamaakooyek; Kishemanitoo e'waahseyaasitc, kaawiin kaye awaac pankii kashkiitipihkisiwin otayaahsiin.

⁶ Kiishpin ihkitoyank e'wiiciiwank, kashkiitipihkanonk tahsh ishipimohseyank, kikakiinawishkimin iinsan; kaawiin kitishipimaatisihsiimin kaainahtek tepwewin.

⁷ Kiishpin tahsh waahseyaank ishipimaatisiyank, taapishkoo wiin iko a'a waahseyaank kaaishiayaatc, miitahsh e'minowiiciintiyank; Ciisahs tahsh omiskwiim Kishemanitoon kaaoKosihsimikotc, kipehki'ikowaamin macitootamowinink onci.

⁸ Kiishpin tahsh kaawiin wihkaa nimacitootansiimin ihkitoyank, mii 'i iinsan e'wayeshintisoyank, kaawiin tepwewin kikikishkaakohsiimin.

⁹ Kiishpin tahsh waawiintamawank Kishemanitoo kimacitootamowininaanin, wiin hsa kaatepweyentaakositc kwayahk kaatootank; miitahsh i'i kaaoncipoonentamawinank, kaaoncipehki'inank kaye kahkina onci kaaishikwayahkohcikehsiwank.

¹⁰ Kiishpin kaawiin ninkii'macitootansiimin ihkitoyank, amii 'i iinsan peshikwan ehkitoyank ehkakiinawishkitc Kishemanitoo. Kaawiin iinsan otihkitowin kikikishkaakohsiiwaamin.