1 ᑌᓴᓬᐆᓂᔭᓇᒃ 5 - Ojibwe Kihcimasina'ikan

Kiishiihtaak kaaTipenciketc citakohshink

¹ Kaawiiciotepwehtamoomikooyek, kaawiin memwehc kekoon kikaoshipii'amaakoohsiim ciwiintamaank ini kekoonan keni‑ishihsekin, kaye aaniin ahpii kepiocihcihsekin.

² Aasha weweni kikihkentaam ekaa awiya mayaa ciwiintansik aanahpii keocihcihsenik. Taapishkoo ehkoshkowiciketc awiya kaaniipaakimootitc, takoshkotakohshin a'a kaaTipenciketc i'i kiishikaninik cinaakohtootc omashkawisiiwin.

³ Shikwa taapishkoo a'a ihkwe e'ahsho⁠nihtaawikinaawahsotc, e'mihciantapakwanoonotc ciwiihsakaahpinetc, mii 'iwe keishiwepisiwaatc iki pemaatisiwaatc. Mekwaa e'ihkitowaatc, “Niminohsemin, kaawiin ninaniisaanisihsiimin,” miitahsh sesakooc okapiotihsikonaawaa onihshiwanaaci'ikoowiniwaa. Kaawiin okakashkihtoohsiinaawaa citapasiihtoowaatc.

⁴ Kaawiiciotepwehtamoomikooyek, kaawiin kiinawaa i'imaa kashkiitipihkanonk kitayaahsiim. Kaawiin taapishkoo awiya ehkoshkowinikotc okiimoocishkan kitaaishi⁠ayaahsiim. Kaawiin kiinawaa kikakoshkowinikohsiim ahpii piocihcihsenik a'a kaaTipenciketc okiishikanoom.

⁵ Kahkina kitinentaakosim e'onciiyek waahseyaank kaye kiishikanonk. Kaawiin kiinawint i'imaa kitoonciihsiimin tipihkanonk. Kaawiin i'imaa ehkashkiitipihkahk kitishitipentaakosihsiimin.

⁶ Iki tahsh kotak mii 'i enentaakosiwaatc e'ontaminkwaamiwaatc. Keko tahsh kiinawint i'i kikanaapi‑ishiayaahsiimin. Taka kikaishinaakosimin taapishkoo awiya mooshak e'ayinaapitc kaye ehkoshkwaawaaciayaatc.

⁷ Inashke ehtipihkahk, mii 'i ahpii nepaaniwank; mii 'o ahpii aanint eshikiiwashkwepiiwaatc ehtipihkaninik.

⁸ Kiinawint itahsh mii taapishkoo pishihshik ehkiishikahk i'iwe kitinaatisiwininaan. Mii 'iwe onci koshkwaawaaciayaataa. Inaapacihtootaa tepweyentamowin, saaki'iwewin taapishkoo shimaakanihsh piiwaapihk kaa‑aakooshkaakot ohkaahkikanink. Shikwa kehcinaa'entantaa ewiihshaapwii'ikooyank, taapishkoo miikaasowaanohkwaanan ehpihsihkamank kenaatamaakoyank.

⁹ Aaniihsh kaawiin kiinawint kikii'inahsikohsiinaan Kishemanitoo onishkaatisiwin cipatakoshkaakoyank, mii hsa 'iwe cioncishaapwii'inank kaaTipenciketc Ciisahs Christ onci.

¹⁰ Mii 'awe Ciisahs kaakii'nipohtamawinank, miitahsh kiishpin keyaapi pimaatisiwank ahpii takoshink, kiishpin kaye noonte⁠ishkwaapimaatisiyank, kikawiicipimaatisiimaanaan.

¹¹ Mii 'iwe onci soonkite'eshkotaatik, wiici'itik entahsopeshikoyek cisoonkikaapawiyek, peshikwan iko ehpi‑ishiwiici'itiyek.

Otayaankwaamimaa', opooshoo'aa'

¹² Shikwa kipakohsenimikoom, kaawiiciotepwehtamoomikooyek: minwakimihkwak iki oniikaanakinsook kaa‑anohkiihtamowaatc anami'aawin i'imaa eyaayek. Aaniihsh okii'inahsikowaan kaaTipencikenitc cimaamiinominekwaa.

¹³ Wawiinke kihtenimihkwak okoweniwak, oncisaaki'ihkwak otanohkiiwiniwaa. Kaye kiinawaa minowiiciintik.

¹⁴ Shikwa kikakaansomikoom, kaawiiciotepwehtamoomikooyek: kiishpin wii'mihciontaaci'intwaa aanint, kika‑ayaankwaamimaawaak cikwehkihcike'itisowaatc. Shikwa soonkite'eshkawihkwak iki kaawahkemikoshkaatentamowaatc. Iki tahsh kaye ekaa kaasaapiayaahsikwaa, wiici'ihkwak. Shashiipenimihkwak kahkina awiyak.

¹⁵ Keko awiya okanaapitootawaahsiin awiyan macihcike'ikotc. Mooshak itahsh kakweminohcike'itik, kaye kahkina pemaatisiwaatc minohcike'ihkwak.

¹⁶ Mooshak taapitawi⁠ciihkentamok.

¹⁷ Keko kipitanami'aahkek.

¹⁸ Aaniin iko 'i ishiwepahk, miikwehciwentamok. Mii aaniihsh o'owe Kishemanitoo kaaineniminek, ci‑inaatisiyek e'wiiciiwek Christ Ciisahs.

¹⁹ Keko kipihtinimaahkek Kishemanitoo otAhcaahkwan i'i kaawiihtootaminitc.

²⁰ Kiishpin awiya wiihkanoocikehtamawaatc Kishemanitoon, keko shiinkihtawaahkek.

²¹ Mekwaa kiikitotc itahsh kahkina kekoon kikanaakasohtawaawaa. Kikaotaahpinaanaawaa wenishihshininik.

²² Minihk itahsh kekoon wenishihshinsininik kaawiin awaac pankii kikatawinamawaatansiinaawaa.

²³ Shikwa nimpakohsenimaa Kishemanitoo, mii 'awe pisaanisiwin kaamiininank: maano wiin Kishemanitoo kikaishi'ikowaa misiwe wiinehta ci‑inaapaci'inek. Maano kikakanawenimikowaa enikohkwentaakosiyek. Kaye kitahcaahkowaa', kipimaatisiwiniwaan, kiwiiyawiwaan kikakanawentamaakowaa, piinihsh ahpii takohshink kaaTipenciketc Ciisahs Christ, ekaa awaac kekoon cimihkikaatehsinok ci‑ishiayaahsiwek.

²⁴ Mii 'owe eshipakohsentamaakooyek. Kishemanitoo kikaishihcike'ikowaa, aaniihsh tepweyentaakosi Kishemanitoo kaa‑antominek.

²⁵ Kaawiiciotepwehtamoomikooyek, anami'ehtamawihshinaam.

²⁶ Kishemanitoonk onci ociimihkwak kahkina kiwiiciotepwehtamoomiwaak taapishkoo e'wiicishaanintiyek. Mii 'owe nahke ishipooshoo'itik.

²⁷ O'o hsa kaye kitayaankwaamimininim, kaaTipenciketc e'ahpimoyaan: entahsopeshikowaatc otepwehtamook ta‑anamihtamawaawak o'o nintooshipii'ikaninaan.

²⁸ Okishewaatisiwin Ciisahs Christ kaaTipeniminank kikawiiciiwikowaam. Mii 'iwe.