1 ᑌᓴᓬᐆᓂᔭᓇᒃ 4 - Ojibwe Kihcimasina'ikan

Ishipimaatisik cikakwenana'entami'ek Kishemanitoo

¹ Shikwa o'o pahkaan kekoon kiwii'wiintamaakoom, kaawiiciotepwehtamoomikooyek. Kikii'ishikihkino'amaakoom aaniin keishikwayahkoshkaayek, aaniin keishi kakwe nana'entami'ek Kishemanitoo. Aasha o'owe kitishihcikem. O'o tahsh noonkom kipakohsenimikoom, kitoonci⁠ayaankwaamimikoom owiinsowinink kaaTipenciketc Ciisahs, keyaapi cinikihcionishihshink kitishihcikewiniwaa.

² Aaniihsh kikihkentaam kaakii'ishikihkino'amaakooyek, kaaTipenciketc Ciisahs okashki'ewisiwinink ekii'oncikanoonikooyek.

³ Mii 'owe kaa‑antawentaakosiyek, Kishemanitoonaank ehta cionciaapatisiyek, ekaa wiin cikakiipaacihcikehsiwek.

⁴ Kiinawaa kaaininiiwiyek kahkina kitaakihkentaam aaniin inahke kwayahk keshiwiiwiyekipan, eshiminwaapantank Kishemanitoo cikakwetootamek, minowiinsowin ciayaayek.

⁵ Keko nanaapinawaahkekwaanik kaaotepwehtamowinihsikwaa. Aaniihsh tepinaahk iko omihsawentamowiniwaank ishipimaatisiwak, ehkihkenimaahsikwaa Kishemanitoon.

⁶ Keko awiya okamacihcike'aahsiin wiiciotepwehtamoon cikimootitc wiiwini. Aaniihsh kikii'ayaankwaamimikoom o'owe: “Awenen iko ketootamokwen, ini kaaTipencikenitc oka‑aahkwaahkonikoon,” kikii'ikoom.

⁷ Inashkehsh kaawiin anooc ci‑ishihcikeyankipan kaakii'oncinantominank Kishemanitoo, i'i hsa wiin cikwayahkwaatisiwank, Kishemanitoonk ehta ci‑inaapatisiyank.

⁸ Kiishpin awiya wiihpiikonank o'o kihkino'amaakewin, kaawiin ehta ininiwan otaanawenimaahsiin, ini hsa wiin Kishemanitoon kaa‑aanawenimaatc. Mii 'awe Kishemanitoo kaakikishkamooninek otAhcaahkwan maawac kaakwayahkwaatisiiwentaakosinitc.

⁹ Kaawiin memwehc kikaoshipii'amaakoohsiim cisaaki'ekwaa kiwiiciotepwehtamoomiwaak. Aasha Kishemanitoo kikiihkihkino'amaakowaa cisaaki'itiyek.

¹⁰ Kaye mii peshikwan eshisaaki'ekwaa kahkina kiwiiciotepwehtamoomiwaak misiwe Maahsitooniyaawahkiink (Macedonia) kaa‑ayaawaatc. O'o tahsh kipakohsenimikoom, kaawiiciotepwehtamoomikooyek: keyaapi awahshime kakwesaaki'itik.

¹¹ Shikwa kakweniikaanentamok o'owe kaakii'ishikakanoonikooyek: kakwesakahkamisik. Kakweminohcikek kiinawaa kitanohkiiwiniwaank, kiinawaa ko kiniinciiwaan cipami'ikoyek.

¹² Mii 'iwe kikaishi minohcikewakenimikowaak iki ekaa kaaotepwehtamowinihsikwaa. Shikwa kaawiin memwehc kika‑ahpenimohsiim pahkaan mininciin cipami'ikoyek.

Keshiayaanik kaaTipenciketc otakohshinowin

¹³ Kaawiiciotepwehtamoomikooyek, kinantawenimikoom cikihkentamowek aaniin keishiwepisiwaatc iki otepwehtamook kaakii'ishkwaapimaatisiwaatc. Keko kihcikashkentankek taapishkoo eshihcikewaatc iki ekaa kaaotahpenimowinihsikwaa.

¹⁴ Kiinawint kitepweyenimaanaan Ciisahs tepwe ekii'nipohpan, miitahsh i'i miinawaa ekiihkiiwepimaatisitc. Shikwa mii 'i ta‑ayintiwak ikiweniwak kaakii'ishkwaapimaatisiwaatc kaakiihtepwehtawaawaatc ini Ciisahsoon. Kishemanitoon okaishiwinikowaan ciniwiiciiwaawaatc ini Ciisahsoon i'i ahpii pitakoshininitc.

¹⁵ Kitoonciwiintamaakoom itahsh o'o kaa'ishiyamintc a'a kaaTipenciketc: kiinawint minihk keyaapi kepimaatisiyank piinihsh cipitakohshink kaaTipenciketc, kaawiin kikaniikaanishkawaahsiwaanaanik ikiweniwak aasha kaakii'noonte⁠ishkwaapimaatisiwaatc.

¹⁶ Tanoontaakwan shaakowewin i'i ahpii, takishiiwe peshik maawac wekimaawentaakositc encal. Tanoontaakohtamawaa Kishemanitoo 'iwe kihcipootaacikanink enwenik. Mii 'i ahpii kaaTipenciketc tipinawe kihcikiishikonk tapioncinoomakeishaa. Shikwa mii 'i ahpii wiinawaa nihtam takiiwepimaatisiwak ikiweniwak kaakiihtepwehtawaawaatc Christan kaakii'ishkwaapimaatisiwaatc.

¹⁷ Miitahsh kekiinawint, aaniin iko minihk ketahshiyank keyaapi cipimaatisiyank i'i ahpii, kikaketahto ishpishkaa'ikoomin weti wahkwiihkaank ciniwiici⁠ohkwenoomankwaa. Mii 'imaa newacikiishik mincikahkina kikakihsaapamaanaan a'a kaaTipenciketc. Shikwa mii 'iwe ahpane ko ciwiici/ayaamank.

¹⁸ Mii 'owe ihkitowin ishimaamihkawaasontik cioncisoonkite'eshkotaatiyek.