1 ᑌᓴᓬᐆᓂᔭᓇᒃ 3 - Ojibwe Kihcimasina'ikan

¹ Onsaam itahsh kikiihkwiinomikoom ekii'noontansiwaank aaniin eshiayaayek. Mii'i kaa'oncikiishentamaank niinehtawint i'imaa Aahtinsiiwi ootenaank (Athens) ci‑ishkwiiyaank.

² A'a tahsh Timahti (Timothy) kikii'ishinisha'amaakoom cimaawatihsinek. Niicihkiwenaan nintinenimaanaan, kaye owiitoohkawaan Kishemanitoon e'wiintamaaketc i'iweni ominwaacimowinini Christan. Mii 'iwe ciaayiisominek kaakii'oncimawatihsinek kaye cimashkawikaapawiyek kitepweyentamowiniwaank.

³ Kaawiin ninkii'antawentansiimin peshik kaatahshiyek ciaanawenciketc onsaam e'onciihkikaniwitc otepwehtamowin. Inashke hsa kiinawaa kikihkentaam mii 'owe kaaineniminank a'a Kishemanitoo, cionciihkaakooyank kitepwehtamowininaan.

⁴ Aaniihsh mekwaa ekii'wiiciayaamikooyek, kiishaac kikii'wiintamaakoom: “Kikaonciihkaakoom o'o kitepweyentamowininaan,” kikii'ikoom. Shikwa kikihkentaam mii 'iwe mayaa kaakii'ishiwepisiyek.

⁵ Mii 'owe kaakii'onci‑ishinisha'amawinakook a'a Timahti: ninkiiwii'aahkokihkentaan kiishpin keyaapi e'otepwehtamowiniwekwen. “Maakishaa okiihkakwewanaa'ikowaan ini Setanan,” kikii'inenimininim. Kiishpin aanawencikeyekipan, mii anihshaa cikii'anohkiiyaankipan.

⁶ Aasha tahsh ninkiihpikiiweotihsikonaan a'a Timahti, ekii'ishaatc kaaishiayaayek. Kitipaacimikowaa keyaapi eshitepweyentamek kaye eshisaaki'itiyek. Shikwa niwiintamaakonaan e'minomaamihkwenimiyaank kaye ewii'noontewaapamiyaank, mii peshikwan keniinawint eshiantawentamaank ciwaapamikooyek.

⁷ Kaawiiciotepwehtamoomikooyek, ahpii ko mecihseyaank ehkakwataki'ikooyank, mii 'imaa wencihsek ninsoonkite'ewininaan, e'mihkwenimikooyek eshitepwehtamek.

⁸ Wawiinke hsa ko noonkom nintoonciminohsemin nimpimaatisiwininaanink ehkihkenimikooyek ehsoonkitepwehtawek a'a kaaTipenciketc.

⁹ Aaniin ehpiihcimiikwehciwi'ankitc Kishemanitoo kiinawaa onci! Aaniin keshinanaahkomankitc i'i minihk ciihkentamowin eshimooshihtooyaank e'mihkwenimikooyek ehkanoonankitc?

¹⁰ Tahsokiishik kaye tahsotipihk wawiinke nintishipakohsentaamin ciotihsaapamikooyek piciinak, kaye cinankinamaakooyek kitepweyentamowiniwaank aaniin iko kaaishinoontehseyek.

¹¹ Maano ninkaishiwinikonaan ciotihsikooyek, mii 'i eshipakohsenimankitwaa Kaaoyoohsimank Kishemanitoo kaye Ciisahs kaaTipeniminank.

¹² KaaTipenciketc maano kikamiinikowaa awahshime cimaaciishkaamakaninik kisaaki'itiwiniwaa kaye kahkina pemaatisiwaatc cisaaki'ekwaa, taapishkoo keniinawint eshisaaki'ikooyek.

¹³ Piinihsh cimashkawisii'inek kite'iwaank, ekaa kekoon ci‑ishiayaahsiwek, Kishemanitoonaank ehta cionciaapatisiyek, mii 'iwe ci‑inaatisiyek paanimaa inaahsamikaapawiihtawek Kishemanitoo Kaaoyoohsimank, ahpii pitakohshink kaaTipeniminank Ciisahs – minihk itahsh iko kaaTipenimaatc okapiwiiciiwaa' i'i ahpii.