1 ᑌᓴᓬᐆᓂᔭᓇᒃ 1 - Ojibwe Kihcimasina'ikan

¹ Niinawint o'owe nintooshipii'ikaninaan Pwaal (Paul), Saailahs (Silas), Timahti (Timothy). Kitooshipii'amaakoom kiinawaa otepwehtamook kaamaawacianami'aayek i'imaa Tehsalanaihkaawi ootenaank eyaayek, minihk kaawiiciiwinek Kishemanitoo Kaaoyoohsimintc, kaye kaaTipenciketc Ciisahs Christ. Kikawaapantamowaam okishewaatisiwin, opisaanisiwin kaye.

Aaniin enaatisiwaatc iki otepwehtamook i'imaa Tehsalanaihkaank kaa‑ayaawaatc

² Mooshak nimiikwehciwi'aanaan Kishemanitoo e'maamihkwenimikooyek e'anami'aayaank.

³ Shikwahsh ahpii hko e'anami'ehtawankitc Kishemanitoo Kaaoyoohsimank, mooshak nimaamihkwentaamin i'iwe kaaonci‑ishihcikeyek e'otepwehtamowiniyek, kaye e'oncikihcianohkiiyek saaki'iwewinink, kaye tahsh e'oncishashiipentamek, wawiinke ehkehcinaa'oyek ewiihpitakohshink a'a kaaTipeniminank Ciisahs Christ.

⁴ Kaawiiciotepwehtamoomikooyek! Kikihkenimikoom ehsaaki'inek Kishemanitoo ekii'onaapaminek.

⁵ Inashke hsa ekiihpi‑ishiwiintamaakooyek minwaacimowin, kaawiin ehta nintooninaanink kikiihpi‑ishikakanoonikoohsiim. I'iwe aaniihsh omashkawisiiwin Kishemanitoo ninkii'wiici'ikomin, Kishemanitoo otAhcaahkwan ekii'ishianohkiinitc, wawiinke ekiihkehcinaa'entamaank ehtepwehtamaank minwaacimowin. Kekiinawaa kikihkeniminaam aaniin eshiminopimaatisiyaank minihk iko kaakii'wiicitaamikooyek, kiinawaa ko ekii'onci‑ishihcikeyaank.

⁶ Niinawint kikii'naanaapinawinaam eshipimaatisiyaank, kaye kikii'naapihcikewaam kaaTipenciketc kaakii'ishiminohciketc. Shikwa aanawiin ekiihkihci⁠kakwaatakihtooyek, weyiip kikii'otaahpinaanaawaa i'iwe kaaishiwiintamaakooyek, Kishemanitoo otAhcaahkwan ekii'onciiciihkentamoshkaakooyek.

⁷ Miitahsh kaakii'onci‑⁠kihkinawaateniminekwaa kahkina awiya otepwehtamook, minihk i'imaa Maahsitooniyaawahkiink (Macedonia) kaa‑ayaawaatc kaye Ahkeyaawahkiink (Achaia).

⁸ Kiinawaa aaniihsh kii'oncinoontaakwanini kaaTipenciketc otipaacimikoowin, kaawiin itahsh ehta 'imaa Maahsitooniyaawahkiink kaye Ahkeyaawahkiink ci‑ishinoontaakwahk. Aasha misiwe kii'ishinoontaakaaniwan eshitepwehtawek Kishemanitoo. Kaawiin memwehc niinawint niwiintamawaahsiwaanaanik awiyak eshiwepisiyek.

⁹ Wiinawaa ko kahkina kitashimikowaak aaniin eshipiintikashiyaank ahpii kakiihkiiyootamikooyek, kaye aaniin kaashikwehkentamek ekii'ishiwepinekwaa manitoohkaanak, ekiihtepwehtawek Kishemanitoo, ekiiwii'anohkiihtawek. Mii 'awe Kishemanitoo ehtepwewiniwitc kaye ehpimaatisiwiniwitc.

¹⁰ Kitipaacimikowaak kaye e'ahshawaapamimek Kishemanitoo oKosihsan, kihcikiishikonk cipioncinaakosinitc, mii 'awe Ciisahs weKosihsimaawitc, a'awe kaakiihkiiwepimaatisi'ikotc Kishemanitoon kii'ishkwaanipotc. Mii 'awe Ciisahs kaashaapwii'inank ekaa cipatakoshkaakohsiwank Kishemanitoo onishkaatisiwin kaawiihpitakohshinoomakaninik.