1 ᑭᒋᐅᑭᒫᒃ 8 - Ojibwe Kihcimasina'ikan

KaaTipenciketc Otahshotamaakemahkahk Kii'piicikaatenik I'imaa Kihci anami'ewikamikonk

¹ Kihciokimaa Swaalaman (Solomon) hsa okii ohkonaa' kaa⁠niikaanisinitc Isriyala' (Israel), i'i kaye kahkina kaakii niikaanishkawaanitc kaa⁠pepahkaanwewaanakisinitc Isriyala', i'i hsa kaye kaakii niikaanishkaminitc taawinan. I'imaa tahsh Ceroosalamink (Jerusalem) okii ishi antomaa' ci⁠piitoonitc kaaTipencikenitc otahshotamaakemahkahkoni. Weti hsa Tepitoon (David) Otootenaaminiink kii‑ishi'ayaani, Saayan (Zion) kaakii ishinihkaatenik.

² Kahkina hsa Isriyalak okii ohko naasihkawaawaan kihciokimaan Swaalamanan ahpii kii⁠akawaahte'ikanikiwaami wiihkwantink kiih⁠pimakinsonitc niishwaahsokiisihsoon (7) Etanim (Ethanim) enimintc.

³ Ahpii tahsh kahkina kaa⁠niikaanisinitc Isriyala' kaah⁠pi takohshininitc, miihsh anami'ewikimaak kaakii otaahpinamowaatc i'i mahkahkoni.

⁴ Miihsh kaakiih pi'ishiwitoowaatc i'i kaaTipencikenitc otahshotamaakemahkahkoni i'imaa kihci anami'ewikamikonk. I'iwe kaye maawaci'itiwi pakwaanekamik, ini kaye tako aapacihcikanan, Liipaai (Levites) kaa⁠ontahkaanesiwaatc hsa, anami'ewikimaak kaye okiih piintikatoonawaan.

⁵ Kihciokimaa Swaalaman tahsh, iki kaye Isriyalak kahkina ko i'imaa kaakiih tahshiwaatc, kii‑inaahsamikaapawiwak eshi'ayaanik mahkahkoni. Aahpici tahsh niipiwa' okiih pakitinaahsowaanaawaa' maanahcaanihsha', pishihkiwa' kaye, kaawiin hsa kiih⁠tetakwakimaahsiiwa' kaa‑ahpiihci paahtiinonitc.

⁶ Miihsh anami'ewikimaak kaakii ishiwitoowaatc i'i ahshotamaakemahkahkoni i'imaa kihci anami'ewikamikonk ekii ishi piintikatoowaatc maawac iko eshi kohtaanentaakwaninik piintik. I'imaa shiipaaya'ii kaakii ishi tehsininkwiikaneninitc cerapii' (cherub) okii ishi ahtoonaawaa.

⁷ Iki hsa cerapiik kaakii ishi tehsininkwiikaneniwaatc okii akawaahteshkaanaawaa i'imaa kaashi ahtek i'i mahkahkoni, okii aakawishkaanaawaa kaye. Ini kaye mihtikoon kaakii ishi pimiwicikaatenik okii aakawishkaanaawaa.

⁸ Awiya hsa kii⁠niipawitc enaahsamiayaanik maawac eshi kohtaanentaakwaninik piintik, okii waapantaanan iitok eh⁠kaashihpooyaahkwakootenikin mihtikoon kaakiih taninikaatenik ahshotamaakemahkahkoni. Kaawiin hsa miinawaa pahkaan inkoci kii⁠onci naakwahsininiwan. Ini hsa mihtikoon keyaapi i'imaa ayaawan noonkom kaa⁠kiishikahk.

⁹ Kaawiin tahsh kekoon i'imaa mahkahkonk kiih⁠piintehsinoon miiehtako i'i niishin napakaapihkahsinii' Moosihs (Moses) kaakii piina'waakopanen weti kihci waciink Oorep (Horeb) ecikaatenik. Mii hsa 'iweni kaaTipenciketc, iki kaye Isriyalak kaakii ahshotamawaakopanen ahpii Isriyalak kii‑ishkwaa saakiciwinintwaa weti Iicipahkiink (Egypt).

¹⁰ Iki tahsh anami'ewikimaak ekii ani saaka'amowaatc i'imaa eshi kohtaanentaakwaninik piintik, mii hsa 'i wahkwiini kaa⁠ishi mooshkineyaanahkwaninik i'imaa kaaTipenciketc okihci anami'ewikamikonk.

¹¹ Kaa‑ahpiihci waahseyentaakwaninik itahsh kaaTipenciketc otanentaakosiwin i'imaa, anami'ewikimaak hsa kaawiin okii kashkihtoohsiinaawaa ci⁠kiiwe piintikewaatc cikiih tootamowaahpan otanohkiiwiniwaan.

¹² Miitahsh Swaalaman kaa⁠ihkitotc, “KaaTipenciketc hsa kii‑ihkito ewii ishi'ayaatc i'imaa kaashi kihpakaanahkwaninik.

¹³ Tepwe hsa kikii oshihtamawin kehtentaakwahk kihci anami'ewikamik, taawin nehpic iko ke⁠taanotaman,” kii‑ihkito.

Swaalaman Kiikanoonaatc Pemaatisinitc

¹⁴ Mekwaa tahsh e⁠ayaanitc kahkina pemaatisinitc Isriyala' (Israel) i'imaa, mii hsa 'i Swaalaman kaakiih kwehkikaapawitc ekii inaahsamikaapawihtawaatc. Miitahsh kaa⁠ishi kakwecimaatc Kishemanitoon ci⁠minohse'aanitc.

¹⁵ Miihsh o'o kaa⁠ihkitotc, “Taka hsa ta⁠miikwehciwenimaa kaaTipenciketc, Isriyalak kaa⁠oKishemanitoomiwaatc, wiin itahsh iko kaakii ishihciketc ekiih caaki tootank i'i kaakii ishi ahshotamawaatc Tepitoon (David) kaakii otetewak, o'o kii‑ihkitokopanen.

¹⁶ ‘Ahpii hsa weti otaanaank kiih⁠kiishikaninikipan kii⁠saakiciwinakwaapan nimpimaatisiimak Iicipahkiink (Egypt), kaawiin hsa awaac peshik ootena ninkiihpi onaapantansiin piinihsh noonkom o'o ahpii, i'imaa kaakii ayaakin misiwe Isriyalahkiink cikii ishi oshihcikaatekipan ninkihci anami'ewikamik niwiinsowin kekiih tanentaakwahkipan. Shikwa hsa tahsh Tepit ninkii onaapamaa ci⁠tipenimaatc nimpimaatisiima' Isriyala'.’ ”

¹⁷ Miitahsh o'o kaa‑ani ihkitotc, “Inashke tahsh Tepit kaakii oteteyaan ohsha kii‑inentamoopan cikii oshihtoohpan waahkaa'ikanini kekiih tanentaakwaninikipan kaaTipencikenitc owiinsowinini, weKishemanitoomiwaatc Isriyalak.

¹⁸ Miihsh o'o kaaTipencikenitc kaa'ikotc Tepit kaakii oteteyaan, ‘I'i hsa kaashi mihsawentaman ewii oshihtooyan ke⁠okihci anami'ewikamikoyaan ke⁠tanentaakwahk niwiinsowin, aaniihsh mii 'i kwayahk e⁠inentaman i'imaa kite'ink.

¹⁹ Shaakooc itahsh kiin kaawiin kika oshihtoohsiin niwaahkaa'ikan, a'a hsa tipinawe kikosihs ke⁠nihtaawikitc, mii hsa awe ke⁠oshihtootc niwaahkaa'ikan ke⁠tanentaakwaninik niwiinsowin,’ kii‑ikokopan.”

²⁰ “Inashke tahsh kaaTipenciketc aasha kahkina kii‑ishihcike kaakii ihkitotc. Niin iitok kaa⁠naapishkawak Tepit (David) kaakii oteteyaan, miitahsh i'i kaa⁠onci namatapiyaan o'omaa okimaawapiwinink Isriyalahkiink, e⁠ishihsenik kaaTipenciketc kaakii ishi ahshotamaaketc. Mii kaye niin kaakii onci oshihtamawak kaaTipenciketc owaahkaa'ikan owiinsowin ke⁠tanentaakwaninik, kaa⁠oKishemanitoomiwaatc Isriyalak.

²¹ Ninkii ontinamowaan tahsh kaye keshi ahtenik i'i ahshotamaakemahkahk kaashi piintenikin kaaTipenciketc kaakii ishi ahshotamawaakopanen kikehteya'aaminaapanii' ahpii kii⁠saakiciwinaakopanen weti Iicipahkiink,” kii‑ihkito Swaalaman.

Swaalaman Kaakii'ishi'anami'ehtawaatc Kishemanitoon

²² Swaalaman itahsh kii⁠niipawi i'imaa entashi pakitinaahsonaaniwaninik, ishpimink inahke ekii ishpinihkenitc ekii anami'ehtawaatc kaaTipencikenitc. Kahkina tahsh kaye i'imaa kii⁠ayaawa' pemaatisinitc.

²³ Miitahsh o'o kaa⁠ihkitotc, “Kiin Tepencikeyan weKishemanitoomimihkwaa Isriyalak (Israel). Kaawiin kotak manitoo ayaahsii ci‑inentaakosihpan enentaakosiwatc weti ishpimink kihcikiishikonk, kaye o'omaa niihsaya'ii ahkiink. Kikanawentaan hsa eh⁠tootaman kaakii oshihtamawatwaapan ahshotamaakewin iki kaa⁠saaki'atwaa kipimaatisiimak wiinke piko enikohkote'ewaatc kaa⁠ishihcikewaatc eshi antawentamowatc.

²⁴ Kikiih kanawentamowaan kaye kaakii ishi ahshotamawatipan kitanohkii'aakan Tepit (David) kaakii oteteyaan. Noonkom hsa kaa⁠kiishikahk kitishihcike kahkina kekoon kaakii ihkitoyampan.

²⁵ Taka tahsh noonkom Tepencikeyan weKishemanitoomimihkwaa Isriyalak, kanawentan kaakii ishi ahshotamawatipan kaakii oteteyaan Tepit o'o kii'inaawatipanen, ‘Kaawiin hsa wiihkaa ta⁠panihsehsinoon peshik kipiiwesiim ci⁠ani namatapitc kitookimaawapiwinink ke⁠tipenimaatc Isriyala', kiishpin kota kikosihsak weweni ishihcikewaatc kwayahk cishi pimohsewaatc enaahsamiiwak taapishkoo kiin kaapi ishi pimohsewatc.’

²⁶ WeKishemanitoomimihkwaa Isriyalak, taka hsa tahsh noonkom ta⁠ishinaakwan ci⁠mooshkinehsek kaakii ishi ahshotamawatipan kitanohkii'aakan Tepit nintetepan.”

²⁷ “Konike tahsh Keshemanitoowiyan tepwe o'omaa ahkiink kitaa ishitaa? Inashke i'i kiishik aana kihci ishpaak, kaawiin te⁠inikohkwaahsinoon i'imaa ci⁠ayaayan! Aaniin itahsh inaa o'o waahkaa'ikan kaa⁠oshihtooyaan keshi te'inikohkwaakipan ci⁠tepashkineyan?

²⁸ Tepencikeyan ninKishemanitoom, niin iitok kitanohkii'aakan. Pisintawihshin aaniin eshi kakweciminaan, ishihcikehtamawihshin kaye aaniin kaashi kakweciminaan noonkom kaa⁠kiishikahk.

²⁹ Kanawaapantan hsa ci⁠kanawentaman o'o kihci anami'ewikamik kiishikahk, tipihkahk kaye. Mii iitok i'i kaakii'itaman, ‘Mii hsa 'iwe ke⁠tanentaakwahk niwiinsowin.’ Noontawihshin itahsh kii⁠anami'aayaan ahpii kii‑inaahsamihtaayaan eshi'ayaak o'o kihci anami'ewikamik.

³⁰ Noontawihshin eshi anami'ehtawinaan, iki kaye kipimaatisiimak Isriyalak o'omaa nahke kii‑inaahsamihtaawaatc eshi'ayaanik kihci anami'ewikamikoni. Weti hsa kihcikiishikonk eshitaayan onci noontan, ahpii tahsh noontaman, miihsh ishi poonentamaakehkan.”

³¹ “Ahpii hsa inini kii⁠maanshi tootawaatc wiicipimaatisiin, piicikaniwitc itahsh eshi'ayaanik kipakitinaahsowinaapihk ci⁠ahpimotc ewii ihkitotc kekoon eshi anaamentaakosihsik,

³² kiin Tepencikeyan kihcikiishikonk onci noontan weweni kehcinaac ci‑inaahkonatwaa kitanohkii'aakanak. Nana'ahshi hsa a'a kaa⁠tepimintc omamaanshi wiin iko kaakiih kashkihtamaasotc, pakitin itahsh wiin a'a kaa⁠tepimaahsiwintc ekii mamaashiihsik.

³³ Ahpii kipimaatisiimak Isriyalak kii⁠shaakooci'ikowaatc kaa⁠shiinkenimikowaatc, onsaam aaniihsh ekii macitootawihkwaa; ahpii tahsh kiiwenotawihkwaa o'omaa tahsh piishaawaatc kihci anami'ewikamikonk, kiwiinsowinink itahsh inahke ishi wiintamowaatc ekii maci'ishihcikewaatc, anami'ehtawihkwaa kakwecimihkwaa ci⁠poonentamawatwaa,

³⁴ kihcikiishikonk hsa onci noontaw ci⁠poonentamawatwaa omaci'ishihcikewiniwaan kipimaatisiimak Isriyalak, ci⁠pikiiwewinatwaa kaye ahkiini kaakii miinimatipan okehteya'aamiwaa'.

³⁵ Ahpii kaye kii‑ishihcikeyan ci⁠kimiwansinok onsaam aaniihsh e⁠macitootawihkwaa kipimaatisiimak, ahpii tahsh o'omaa inaahsamihtaawaatc kihci anami'ewikamikonk kiwiinsowinink itahsh ishi wiintamowaatc omacitootamowiniwaan weweni tahsh eh⁠kakwecimihkwaa ci⁠poonentamawatwaa,

³⁶ mii hsa 'i kihcikiishikonk onci noontaw, ci⁠poonentamawatwaa kitanohkii'aakanak, kipimaatisiimak Isriyalak. Kihkino'amaw kwayahk ci⁠pimaatisiwaatc. Ishihciken ci⁠kimiwank o'omaa ahkiink kaakii miinatwaa kipimaatisiimak ci⁠tipinawewisiwaatc.”

³⁷ “Ahpii tahsh kaye miicimihkaahsinok o'omaa ahkiink, komaa kaye kihci wahsitaawihsek, komaa kaye kihtikaanan onci nihshiwanaatahkin onsaam eh⁠kishinoowek, komaa kaye onsaam paahtiinowaatc pahpahkinek, komaa kaye kaa⁠shiinkenimikowaatc waahkaashkaminitc otootenaamiwaan, komaa kaye kihci ishiwepahk komaa kaye aahkosiwin ayaamakahk,

³⁸ noontaw hsa eshi anami'ehtawihkwaa, eshi kakwecimihkwaa kaye kipimaatisiimak. Kiishpin awenen iko kipimaatisiimak Isriyalak ote'ink onci mooshi'otc emaanentank, ishi tehsinihkenitc kaye anami'aatc o'omaa nahke eshi'ayaanik kihci anami'ewikamik,

³⁹ kihcikiishikonk hsa onci noontaw eshitaawatc. Poonentamaw, wiici' kaye. Kiin iitok ehta kikihkenimaa awiya enentank ote'ink. Tootaw hsa ko awiya aaniin eshi kashkihtamaasotc.

⁴⁰ Miitahsh i'i ci⁠kohtaanenimihkwaa kipimaatisiimak minihk iko ke⁠taawaatc i'imaa ahkiink kaakii miinimatipan okehteya'aamiwaapanii'.”

^41-42 “Ahpii hsa a'a piiwite waahsa ahkiink eyaatc noontank eh⁠tashintenik kiwiinsowin, aaniin kaye kaa⁠ishi kihci ishihcikehtamawimatc kipimaatisiima', piishaatc itahsh o'omaa kihci anami'ewikamikonk ewii anami'ehtawihk,

⁴³ kihcikiishikonk eshitaawatc onci noontaw. Ishihcikew aaniin iko eshi kakwecimihk a'a kaa⁠piiwitewitc, miihsh kahkina pemaatisiwaatc o'omaa ahkiink ci⁠kihkentamowaatc kiwiinsowin, ci⁠kohtaanenimihkwaa kaye taapishkoo kipimaatisiimak Isriyalak kaa⁠ishihcikewaatc. Miitahsh ci⁠kihkentamowaatc o'o kihci anami'ewikamik kaakii oshihtooyaan, mii 'imaa eh⁠tanentaakwahk kiwiinsowin.

⁴⁴ Ahpii hsa kipimaatisiimak kii⁠anta miikaanaawaatc kaa⁠shiinkenimikowaatc, aanti piko eshinisha'watwaa, anami'ehtawihkwaa tahsh, komaa hsa enaahsamihtaawaakwen inahke eshi'ayaanik o'o kihci ootenaani kaakii onaapantamowatc, o'o kaye kihci anami'ewikamik kaakii oshihtamawinaan,

⁴⁵ kihcikiishikonk hsa onci noontaw eshi anami'aawaatc eshi kakwecimihkwaa kaye. Miinaahkan itahsh ci⁠shaakoocihtwaawaatc.”

⁴⁶ “Ahpii hsa kaye kipimaatisiimak macitootawihkwaa, kaawiin iitok awiya ayaahsii wiihkaa meci tootansik, ekii nihshki'ihkwaa tahsh ishi pakitinatwaa ci⁠shaakooci'ikowaatc kaa⁠shiinkenimikowaatc, ishiwinintwaa tahsh mihsawaa ko waahsa ahkiink eh⁠tahkonikaniwiwaatc,

⁴⁷ noontaw hsa eshi anami'ehtawihkwaa. Kiishpin hsa weti waahsa ahkiink tashi kwehkaatisiwaatc, anami'ehtawihkwaa, wiintamawihkwaa aaniin eshi macitootamowaatc, aaniin kaye eshi maci'ishiwepisiwaatc, kiin Tepencikeyan noontaw eshi anami'ehtawihkwaa.

⁴⁸ Kiishpin hsa ko enikohkote'ewaatc, otahcaahkowaank kaye ishi kiiwe naasihkawihkwaa weti otahkiiminiink kaa⁠shiinkenimikowaatc entashi tahkonikaniwiwaatc, miitahsh ishi anami'ehtawihkwaa inaahsamihtaawaatc inahke eshi'ayaanik ahkiini kaakii miinimatc okehteya'aamiwaapanii', o'omaa kaye nahke eshi'ayaanik kihci ootena kaakii onaapantamowatc, o'omaa kaye nahke eshi'ayaanik kihci anami'ewikamik kaakii oshihtamawinaan.

⁴⁹ Kihcikiishikonk eshitaayan hsa onci noontaw e⁠anami'ehtawihkwaa. Ishihcikew hsa eshi kakwecimihkwaa.

⁵⁰ Poonentamaw kipimaatisiimak kaakii macitootawihkwaa. Poonentamaw kahkina kaakii ishi mamaashiihkantawihkwaa, tootawim kaye kaakiih shaakooci'ikowaatc ci⁠koohpaatenimikowaatc.

⁵¹ Kiin iitok iki kipimaatisiimak kaa⁠tipinawewisiimatwaa, Iicipahkiink (Egypt) kaakii onci saakiciwinatwaa, enentaakwaninik kihci pootawaanaapihkonk kaashi ninkisikaatek piiwaapihk.”

⁵² “Kiin kaa⁠Maawaci Tipencikeyan, taka hsa mooshak noontaw kitanohkii'aakan eshi kakwecimihk, iki kaye kipimaatisiimak Isriyalak, ci⁠pisintawatwaa aaniin iko ahpii kii⁠shaakowaanihkwaa.

⁵³ Kiin iitok kikii onci onaapamaak ci⁠pahkaanentaakosiwaatc ke⁠opimaatisiimiyan ke⁠tipinawewisiyan eshi'ayaanitc kahkina entahswewaanakisinitc pemaatisinitc. Mii iitok kaakii inatipan Moosihs (Moses) kitanohkii'aakan ci‑ihkitokopanen ahpii Iicipahkiink kii⁠onci saakiciwinatwaa ninkehteya'aaminaapaniik,” kii‑ishi anami'aa Swaalaman.

Swaalaman Ishkwaac Kaakii'ishi'anami'aatc

⁵⁴ Ahpii tahsh Swaalaman (Solomon) o'o ekii ishi ishkwaa anami'ehtawaatc ekiih kakwecimaatc, mii hsa kaa⁠ishi pasikwiitc eshi'ayaanik eshi pakitinaahsoohtamawimintc kaaTipencikenitc. Mii iitok i'imaa kaakii ishi ociciinkwanapitc ishpimink inahke ekii ishi tehsinihkenitc.

⁵⁵ Miitahsh kaa⁠ishi niipawitc ekii'inaatc ci⁠shawentaakosinitc kahkina wehkwiinonitc Isriyala' (Israel) o'o ekii'inaatc enikohk,

⁵⁶ “Taka ta⁠miikwehciwentaakosi kaaTipenciketc kaakii anwepi'aatc opimaatisiima' Isriyala' kaakii ishi ahshotamaaketc. Kaawiin hsa kanake peshik otihkitowin ci⁠pwaanawihcikemakaninik kahkina kaakii ishi mino ahshotamaakekopanen kii⁠anoonaakopanen otanohkii'aakanan Moosihsoon (Moses) o'o ci‑ihkitonitc.

⁵⁷ Taka kaaTipenciketc kiKishemanitoominaan kika wiiciiwikonaan kaakii ishi wiiciiwaatc kikehteya'aaminaapanii'. Taka kaawiin kika nakanikohsiinaan, kaawiin kaye kika wepinikohsiinaan.

⁵⁸ Oka ishihtoon kite'inaanin ci⁠kwehkiinotaakotc, cishi pimohsaatamowank misiwe eshihtwaatc. Ci⁠kanawentamowank kaye otoonahshowewinan, otihkitowinan kaye, anami'ewi inaahkonikewinan kaye kaakii miinaatc kikehteya'aaminaapanii'.

⁵⁹ Taka kaye ono ehkitowak kaakii ishi anami'ehtawak kaaTipenciketc, mooshak ci⁠maamihkawitc kaaTipenciketc kiKishemanitoominaan entahso kiishik, entahso tipihk kaye. Wiin hsa ci⁠koohpaasinawaatc eshi noontehsenitc entahso kiishik otanohkii'aakanan, i'i kaye kahkina Isriyala'.

⁶⁰ Miitahsh kahkina pemaatisiwaatc o'omaa ahkiink ci⁠kihkentamowaatc kaaTipencikenitc eh⁠Kishemanitoowinitc, kotak kaye pahkaan e⁠ayaahsinik.

⁶¹ Taka hsa tahsh wiinke piko kite'iwaank ishi tepakenimihk kaaTipenciketc kiKishemanitoominaan cishi pimohsewek ehkitotc, ci⁠na'ihtamowek kaye enaahkoniketc, noonkom kaa⁠kiishikahk kaa⁠pishi pimohseyek piinihsh,” okii'inaan.

Swaalaman Kiikihtentaakohtootc Kihci anami'ewikamik

⁶² Miitahsh Swaalaman (Solomon) i'i kaye kahkina Isriyala' (Israel) kaakii wiiciiwikotc kaa⁠ishi pakitinaahsoohtamawaawaatc kaaTipencikenitc.

⁶³ Niishtanashiniishin mitaahswaahk 22,000 hsa pishihkiwa', ninkotwaahk niishtana tahsink mitaahswaahk 120,000 maanahcaanihsha' kaye okiih pakitinaahsowaakenaa', ekiih pakitinank tino wenci mino wiiciintink. Miihsh kaye kihciokimaa, i'i kaye kaakii wiiciiwikotc Isriyala' kaakii ishihcikewaatc ekii kihtentaakohtoowaatc e⁠miinaawaatc kaaTipencikenitc i'i kihci anami'ewikamikoni.

⁶⁴ Miihsh kaye i'i eh⁠kiishikaninik Swaalaman kaa⁠ishi kihtentaakohtootc naawaya'ii eshi waahkaayaapihkinikaatenik enaahsamahkitenik okihci anami'ewikamikoni kaaTipencikenitc. Miihsh kaakiih pakitinank pakitinaahsowinan tino wenci mino wiiciintink kaa‑ankwaahkisikaatek pahkweshikaniminiwi pakitinaahsowin kaye, kayehsh aya'aawihshipimite pakitinaahsowin. Miitahsh o'o kaakii onci ishihciketc onsaam aaniish kii⁠akaahsinini i'i wensaawaapihkaninik eshi pakitinaahsowintc, ekiih tepihsinsininikin ono kahkina pakitinaahsowinan.

⁶⁵ Miitahsh o'o nahke Swaalaman kaa⁠ishi wiihkwantiiwahkamikisitc i'i ahpii, i'i kaye kahkina Isriyala'. Wiinke hsa kiih⁠paahtiinowa' pemaatisinitc i'imaa kaakii ayaanitc ekii onciinitc kiiwetinonk Hemaht (Hamath) ootenaank piinihsh weti eshi shaawano siipiiwaninik Iicipahkiini kaa⁠onci maacihsenik. Kii⁠wiihkwantiiwahkamikisiwak hsa enaahsamiinitc kaaTipencikenitc oKishemanitoomiwaan niishwaahsokiishik, piinihsh mitaahshiniiwikiishik ekii ani ishihsenik.

⁶⁶ E⁠ani waapaninik itahsh mii 'i kaa⁠ishi kiiwenisha'waatc. Miihsh kahkina kaa⁠ishi miikwehciwenimikotc, ekii ani kiiwenitc wiinke ekiih ciihkentaminitc, aaniihsh kii⁠maamihkawiwa' aaniin kaaTipencikenitc kaa⁠ishi minotootawaanitc Tepitoon (David), i'i kaye opimaatisiimini Isriyala'.