1 ᑭᒋᐅᑭᒫᒃ 5 - Ojibwe Kihcimasina'ikan

Swaalaman Kii'inentank Ewii'oshihtootc Kihci anami'ewikamik

¹ Ahpii hsa Haairim (Hiram) kehciokimaawitc Tayar (Tyre) e⁠noontank Swaalamanan (Solomon) ekii onenimimintc ci⁠kihciokimaawinitc ci⁠naapishkawaanitc Tepitoon oteteni, mii hsa kaa⁠ishi ishinisha'waatc aanihkewikimaa'. Haairim iitok okiih saaki wiiciiwaakopan Tepitoon.

² Swaalaman itahsh o'o kii‑ishi anoohkii ci⁠awi'inimintc Haairimoon,

³ “Kikihkentaan iitok misiwe waahkaaya'ii ekii onci miikaacikaniwitc nintetepan Tepit. Miitahsh kaa⁠onci tawihsehsik cikii oshihtoohpan kihci anami'ewikamik ke⁠tanentaakwaninik owiinsowinini kaaTipencikenitc oKishemanitooman. Kaawiin iitok mahshi kaaTipencikenitc okii ishi'ikohsiin ci⁠shaakooci'aatc kaakiih shiinkenimikotc.

⁴ Inashke tahsh noonkom kaaTipenciketc ninKishemanitoom ninkii ishi miinik misiwe waahkaaya'ii ci⁠ayaamakaninik pisaan ci⁠wiiciintinaaniwaninik. Kaawiin awiya ayaahsii ci⁠shiinkenimitc, kaawiin kaye ci⁠ayaak nihshiwanaatahkamikisiwin.

⁵ Miitahsh enentamaan niin ewii oshihtooyaan kihci anami'ewikamik ke⁠tanentaakwaninik owiinsowin kaaTipenciketc ninKishemanitoom. Aaniihsh kaaTipenciketc o'o kii'inaakopan kaakii otetewak Tepitoon, ‘A'a hsa kikosihs ke⁠pakitinak ci⁠namatapitc kitookimaawapiwinink ke⁠naapishkawihk mii hsa awe ke⁠oshihtootc kihci anami'ewikamik ke⁠tanentaakwaninik niwiinsowin.’

⁶ Taka hsa tahsh inaahkoniken ci⁠kiishka'amaakooyaan kiishkaahtikook weti Lepanan (Lebanon) ahkiink. Nintininiimak hsa oka wiitanohkiimaawaa' kitininiima'; kika tipa'amawin kaye ci⁠tipa'amawatwaa kitininiimak minihk iko kiin ke⁠inentaman. Kikihkentaan iitok kaye nintininiimak aahpici e⁠nakacihtoohsikwaa ci⁠kiishka'aahkwewaatc, e⁠ayishiihsikwaa kaashi nakaci kiishka'aahkwenitc Saaitan (Sidon) wenciinitc.”

⁷ Ahpii tahsh Haairim e⁠noontank Swaalamanan ehkitonitc, wiinke okii minwaapantaan ekii ihkitotc, “Taka ta⁠miikwehciwenimaa kaaTipenciketc noonkom kaa⁠kiishikaninik. Okii ishi miinaan iitok Tepitoon kekiihtaawentaminitc okosihsini ci⁠okimaahkantawaanitc kehci inentaakosinitc Isriyala' (Israel),” kii‑ihkito.

⁸ Miitahsh kaakii anoohkiitc o'o ci'inimintc Swaalamanan, “Ninkii otihsikoon i'i kaakiih pi'ishiyan. Kahkina hsa ninka ishihcike eshi antawentaman ci⁠ontinamawinaan kiishkaahtikook, ohkihkaahtakook kaye.

⁹ Nintininiimak Lepanan ahkiink oka onci naasipiiwinaawaa' mihtikoo' ci‑ishiwinaawaatc kihcikamiink. Miitahsh weti keshi ohkwahpinaawaatc ci⁠pahkopii'waawaatc kihcikamiink ci‑inaatika'oonaawaatc aanti piko eshi antawentaman. Miihsh weti keshi aapa'ontwaa, kitininiimak hsa tahsh wiinawaa oka ani tashiihkawaawaa'. Kikakwecimin itahsh kaye ci‑ishihcikeyan eshi kakweciminaan, ci⁠ahshamatwaa nintininiimak, kaye niwaahkaa'ikanink eyaawaatc,” okii'inaan.

¹⁰ Miitahsh Haairim kaakii ontinamawaatc Swaalamanan kiishkaahtikoo', ohkihkaahtikoo' kaye minihk hsa ko entawenimaatc.

¹¹ Swaalaman itahsh okii miinaan Haairimoon ninkotwaahk tahsink mitaahswaahk (100,000) tahsooshkimot pahkweshikaniminan, kaye tahsh ninkotwaahk mitaahso tahsink mitaahswaahk (110,000) tahso tipa'oopaan pimiteni entahso pipoon.

¹² KaaTipencikenitc itahsh okii miinikon kakiihtaawentamowin, ekii ishihcikenitc kaa⁠ishi ahshotamaakohpan. Swaalaman hsa kii⁠mino wiiciintiwak Haairimoon, miihsh minciniish kaa⁠inentamowaatc pisaan ci⁠wiiciintiwaatc.

¹³ Kihciokimaa Swaalaman hsa okii otaahpinaa' nihsimitana tahsink mitaahswaahk (30,000) ininiwa' ke⁠anohkiinitc, misiwe ekii ontinaatc Isriyalahkiink.

¹⁴ Atonaairamoon (Adoniram) itahsh okii inahsaan ci⁠naakaci'aanitc o'o ininiwa'. Nihsweyak hsa okii ishi nenaawinaa' memitaahciink mitaahswaahk (10,000) ekiih tahshinitc. Peshikwewaan hsa peshikokiisihs okii ishinisha'waa' Lepanan ci⁠awi anohkiinitc. Niishwewaan itahsh niishokiisihs kii⁠ayaawa' otaawininiink. Mii'inahke kaa⁠ishi memeshkociinitc.

¹⁵ Swaalaman itahsh kaye nihshwaahsomitana tahsink mitaahswaahk (80,000) kiih⁠tahshiwa' ininiwa' kaakiih kiishkaapihka'ikenitc. Niishwaahsomitana tahsink mitaahswaahk (70,000) tahsh kiih⁠tahshiwa' ininiwa' kaakiih pimiwicikenitc.

¹⁶ Nihsimitana'ashinihsin tahswaahk (3,300) hsa kiih⁠tahshiwa' ininiwa' kaakiih kanawaapantaminitc anohkiiwin, kaakii ani wiintamaakenitc aaniin ke⁠ishihcikenaaniwaninik.

¹⁷ Kihciokimaa tahsh ekii ishi anoohkiitc, mii hsa kaa⁠ishi kiishkaapihka'omintc kihci ahsinii' kaa⁠minwaapihkisinitc ekii oshi'imintc ke⁠nihtamaapihkihshininitc keshi patahkitenik kihci anami'ewikamik.

¹⁸ Swaalaman itahsh otininiima', a'a kaye Haairim otininiima', i'i kaye ininiwa' wenciinitc ootenaank Kiipel (Gebal), okiih kwayaanci'aani ahsinii' ke⁠nihtamaapihkihshininitc. Mihtikoo' kaye okiih kwayaanci'aani ci⁠oshihcikaatek kihci anami'ewikamik.