1 ᑭᒋᐅᑭᒫᒃ 21 - Ojibwe Kihcimasina'ikan

Nepwaht Eshikihtikaanaatc Shoomina' Ehtashintenik

¹ Naanaake tahsh e⁠ani ayishihsenik, Nepwaht (Naboth) inini eshinihkaasotc kii⁠oncii ootenaank Cesriiyal (Jezreel) ecikaatenik. I'i hsa kaakii ishi kihtikaanaatc shoomina' kii‑ishi'ayaani i'imaa ootenaank Cesriiyalink. Mii hsa 'imaa ishi ohpime kaakii ishi'ayaanik otookimaawikamikoni kihciokimaan Ehaapoon (Ahab) wenciinitc ootenaank Sameriya (Samaria).

² Ehaap tahsh okii'inaan Nepwahtoon, “Taka miishihshin i'i kaashi kihtikaanatwaa shoominak, ewii ishi kihtikaatamaan miicim, pehsho iitok i'imaa ishi'ayaa nintookimaawikamikonk. Meshkwac tahsh kika miinin nawac ci⁠onishihshik keshi kihtikaanatwaa shoominak. Kiishpin hsa ishi'antawentaman, kika miinin hsa shooniyaa, minihk iko ke⁠inakintaman,” okii'inaan.

³ Miitahsh o'o Nepwahtoon kaa⁠ishi nahkwehtaakotc, “Kaawiin ohsha kaaTipenciketc ta⁠inentansii ci⁠miininaampaan nintetenk kaakii onci tipinawewisiyaan,” okii'ikoon.

⁴ Miitahsh Ehaap kaa⁠ishi kiiwetc ekii nishkentank, ekii nishkaatisitc kaye aaniihsh okii'ikoon Nepwahtoon Cesriiyalininiwan, “Kaawiin kitaa miinihsinoon nintetenk kaa⁠onci tipinawewisiyaan.” Kii⁠oshihshin tahsh onipewinink ekii nishkentank, kaawiin kaye kii⁠wiihsinihsii.

⁵ Wiiwan tahsh Cesapel (Jezebel) eshinihkaasonitc kiihpi piintikewan ekii'ikotc, “Wekonen itahsh wenci nishkentaman, wekonen kaye wenci wiihsinihsiwan?” okii'ikoon.

⁶ Miihsh kaa⁠ishi nahkwehtawaatc, “Nintaanakii'inaa ohsha Nepwaht Cesriiyalinini cikii ataamakipan i'i kaashi kihtikaanaatc shoomina', komaa kaye inentankipan pehkaanatininik ewii miinakipan keshi kihtiketc. Miitahsh o'o kaa'ishitc, ‘Kaawiin kitaa miinihsinoon i'i kaa⁠tipentamaan kaashi kihtikaanakwaa shoominak.’ ”

⁷ Miihsh o'o wiiwan Cesapelan kaa'ikotc, “Mii na 'iwe ke⁠ishihcikehpan kihciokimaa kaa⁠tipenimaatc Isriyala' (Israel). Wanishkaan, wiihsinin kaye. Inashke niin kika ontinamawin i'iweni kaashi kihtiketc a'a Nepwaht,” okii'ikoon.

⁸ Miitahsh Cesapel kaa⁠ishi maaciipii'iketc Ehaapoon owiinsowinini ekii aapacihtootc, okihkinawaacipii'ikanini kaye ekii aapacihtootc. I'i hsa kaa⁠niikaanisinitc, kehci inentaakosinitc weti eyaanitc ootenaank Cesriiyal okii oshipii'amawaa'. Mii hsa 'owe kaa⁠ishipii'amawaatc.

⁹ Miitahsh o'o kaa⁠ihkitoomakaninik otooshipii'ikan, “Taka ishikiishikanohkek ci⁠wiihsininaaniwansinok ci⁠anami'aank. Nepwaht tahsh ishi namatapi'aahkek keshi apinitc kaa⁠kihtentaakosinitc pemaatisinitc.

¹⁰ Niishin tahsh kaye noociko ininiwak ishi namatapi'aahkekwaanik nahpaacinahke keshi apitc Nepwaht. Miiwak hsa iki ke⁠inaacimaawaatc Nepwahtoon ekii maci'inaahpinemaanitc Kishemanitoon, kihciokimaan kaye. Miitahsh keshi saakisi'ek ci⁠papiimwahsina'intc ci⁠niiwana'ikaniwitc,” mii 'i kaa⁠ishipii'iketc.

¹¹ Miitahsh iki kaa⁠niikaanisiwaatc, iki kaye kaa⁠kihci inentaakosiwaatc i'imaa ootenaank Cesriiyalink Nepwahtoon eshi'ayaatc kaa⁠ishihcikewaatc kaakii ishipii'amaakowaatc Cesapelan.

¹² Miitahsh kaa⁠ishikiishikanohkenaaniwaninik ci⁠wiihsininaaniwansinok ci⁠anami'aank. Nepwahtoon hsa okii ishi onapi'aawaan eshi apinitc kehci inentaakosinitc pemaatisinitc.

¹³ Miihsh i'i niishin noociko ininiwa' kiih⁠piintikewa' nahpaac ekii ishi apinitc Nepwahtoon eshi apitc. Miitahsh i'i niishin ininiwa' kaakiih tipaacimaanitc ini Nepwahtoon i'imaa kaakii ishi paahtiinonaaniwaninik o'o ekii ihkitonitc, “Nepwaht ohsha okii maci'inaahpinemaan Kishemanitoon, kihciokimaan kaye.” Miihsh Nepwahtoon kaa⁠ishi saakiciwinimintc i'imaa ootenaank, ekiih papiimwahsina'imintc ekii niiwana'ikaniwinitc.

¹⁴ Miitahsh kaa⁠ishi oshipii'amawintc Cesapel ekii'inintc, “Nepwaht hsa kiih⁠papiimwahsina'aa, miihsh kaa⁠ishi nipotc.”

¹⁵ Ahpii tahsh Cesapel kaa⁠noontank ekii niiwana'omintc Nepwahtoon ahsinii' ekii aapatisinitc; mii hsa kaa'inaatc onaapeman Ehaapoon, “Maacaan itahsh awi'otaahpinan i'i Nepwaht Cesriiyalinini kaashi kihtikaanaatc shoomina', kaakii wii miinihsinohkipan aanawii'miinatipan shooniyaan. Nepwaht ohsha kaawiin pimaatisihsii, kii⁠nipo iitok,” okii'inaan.

¹⁶ Ahpii tahsh Ehaap kaa⁠noontank eh⁠pimaatisihsinik Nepwahtoon, kii‑ishaa hsa kaakii ishi nihtaa kihtikenihpan Nepwahtoon ekiih tipinawewisitc i'i kihtikaanahkamik.

¹⁷ Ilaaica (Elijah) tahsh Tihshipii (Tishbite) kaakiih onciitc, kaaTipencikenitc okii'ikoon,

¹⁸ “Maacaan anta nakishkaw Ehaap kaa⁠kihciokimaawitc Isriyalahkiink, kihci ootenaank Sameriya kaa⁠onciitc. Inashke hsa weti ayaa kaakii ishi nihtaa kihtikaanaanihpan shoomina' Nepwahtoon. Miihsh kaa⁠onci ishaatc wiin iko ewiih tipinawewisitc.

¹⁹ Miitahsh o'o ke'inatc, ‘O'o hsa kitik kaaTipenciketc, kikii nihshiwe na, kikii mahkantwe na kaye kiin iko ewiih tipinawewisiyan.’ Miihsh o'o keni'inatc, ‘I'imaa hsa kaakii ishi nooskwaata'aminitc animoo' Nepwaht omiskwiim, mii hsa 'imaa kekiin animook keshi nooskwaata'amowaatc kimiskwiim, kiin kota kaa'inihk,’ inaahkan,” okii'ikoon.

²⁰ Miihsh Ilaaica kaa'ikotc Ehaapoon, “Kekahpii na kimihkawish, kaa⁠shiinkeniminaan!” Miihsh o'o Ilaaica kaa'inaatc, “Eya', kimihkawin, onsaam aaniihsh kitishipakitinitis ewii macitootaman enaahsamiitc kaaTipenciketc.

²¹ Miihsh o'o enihk kaaTipenciketc, ‘Inashke hsa maano kiwii ishihse'in ci⁠maanshihseyan, wawiinke kaye niwii nihshiwanaaci'aak kipiiwesiimak kaa⁠ininiiwiwaatc mihsawaa ko tepenintisowaakwen, komaa kaye tepenimaawintwaawen!

²² Mii hsa kaye waah⁠tootamaan kitaawin taapishkoo kaakii ishinaakwaninik ootaawin Ceroopooam (Jeroboam) kaakii otetetc Niipatan (Nebat), kayehsh Peyaasha (Baasha) kaakii otetetc Ahaaicawan (Ahijah), aaniihsh kikiih kakaanci'ish ci⁠nishkaatisiyaan, kiin kaye onci kaa⁠onci macitootamowaatc Isriyalak.’

²³ A'a tahsh wiin Cesapel kaa'inintc ihkwe, o'o hsa kaaTipencikenitc otikoon, ‘Animook hsa oka kitamwaawaan Cesapelan i'imaa ootenaank Cesriiyal (Jezreel) ecikaatenik.’

²⁴ Iki hsa kitinawemaakanak ootenaank ketashi nipowaatc, animoo' hsa oka kitamokowaa'. Iki tahsh wiin noohpimahkamik ketashi nipowaatc mitaskitikwaanehsiwa' oka kitamokowaa',” okii'inaan.

²⁵ Kaawiin hsa wiihkaa inini kiihpi ishi'ayaahsii taapishkoo Ehaap kaakiih pakitinintisotc maano ewii macitootank enaahsamiinitc kaaTipencikenitc. Wiiwan hsa Cesapel eshinihkaasonitc okiih kakaansomikoon i'i ci⁠tootank.

²⁶ Maawac itahsh iko Ehaap kiikihci macitootam, ekiih piminisha'waatc manitoohkaana' ekii ishihciketc eshihcikenitc Emorii kaatinowinitc (Amorites). Miiwak iitok i'i kaaTipenciketc kaakiih saakitaama'waatc mekwaa Isriyala' kii⁠ani piintikeshkaanitc i'imaa Isriyalahkiink.

²⁷ Ahpii tahsh Ehaap kaa⁠noontank aaniin kaakii'inintc, mii hsa kaa⁠ishi taashkiikipitootc okikishkikanan. Miihsh kaa⁠ishi pihsihkank ahsapatapiiwekinowayaan, ekii wiihsinihsik kaye ekii anami'aatc. Miihsh kaye 'imaa kaa⁠ishi pimihshink ahsapatapiiwekinonk, ekiih papaamohsetc kaye wiinke kii⁠wahsitaawentamowinaakosi.

²⁸ Miihsh Ilaaica Tihshipii kaa⁠onciitc kaa'ikotc kaaTipencikenitc,

²⁹ “Kiwaapamaa na Ehaap aaniin ehpiihci wahsitaawentamowinaakositc enaahsamiiwak? Eh⁠tapahsenimotc itahsh enaahsamiiwak, kaawiin hsa intawaa niwii macihse'aahsii minihk ke⁠pimaatisitc. Paanimaa hsa okosihsink ninkaashi maanshihsehtaawaan i'i otaawin.”