1 ᑭᒋᐅᑭᒫᒃ 18 - Ojibwe Kihcimasina'ikan

Ilaaica, Iki Kaye Kaakanootamawaawaatc Manitoohkaanan Peyal Ehtashimintwaa

¹ Naanaake tahsh nihsopipoon (3) ekii ani ocihcihsenik, kaaTipencikenitc Ilaaica (Elijah) okii'ikoon, “Maacaan hsa anta waapam kihciokimaa Ehaap (Ahab). Miitahsh i'i ci‑ishihcikeyaan ci⁠kimiwak,” okii'ikoon.

² Miitahsh Ilaaica kaa⁠ishi maacaatc ekii anta waapamaatc Ehaapoon. I'imaa hsa ahkiink Sameriya (Samaria) ecikaatek ahpii kii⁠ayaahsinok miicim, wiinke hsa kiihkakwaatakentaakwan.

³ Ehaap hsa okiih kanoonaan ininiwan Oopataaya (Obadiah) eshinihkaasonitc kaakii naanaakacihtoonitc otookimaawikamik. Oopataaya hsa wiinke okiih kohtaanenimaakopan kaaTipencikenitc.

⁴ Mii hsa kaa⁠ishihcikekopanen ahpii Cesapelan (Jezebel) kii⁠nihsaanitc ininiwa' kaakiih kanootamawaanitc Kishemanitoon, ninkotwaahk (100) iitok Oopataaya kiih⁠kaanaakopan i'i okanootamaake'. Nenaanimitana (50) hsa okii ishi nenaawinaakopan kaashi wawiimpaapihkaanik ekii ishi kaanaakopanen. Kii⁠ahshamaakopan tahsh kaye pahkweshikanan, nipiini kaye kii⁠mina'aakopan.

⁵ Ehaap tahsh okii'inaan Oopataayawan, “Taka maacaan, misiwe o'omaa ahkiink ishaan kaashi mamoohkiciwank nipi, kaashi papahsatinaak kaye. Maakisha kika mihkaan keshi mashkohsiihkaak keshi kanawenimankwaa mihtatimook, shoonshoomihtatimook kaye ke⁠ontaatisiwaatc, kehcinaac ci⁠nihsaahsiwankwaa kitawahkaaninaanik,” okii'inaan.

⁶ Miitahsh kaa⁠ishi nenaawinamaatiwaatc i'i ahkiini aaniin waa⁠inishkaawaatc. Ehaap hsa pahkaan kii‑ishi maacaa ekiih peshikotc. Oopataaya tahsh kewiin pahkaan inahke kii‑ishi maacaa kewiin ekiih peshikotc.

⁷ Miihsh Oopataaya (Obadiah) e⁠ani pimohsetc kaakii nakishkawaatc Ilaaicawan. Shemaak iko okii nihsitawinawaan. Miihsh kaa⁠ishi animihkohtaatc mihtahkamik ekii ihkitotc, “Kiin ina Ilaaica nintookimaam.”

⁸ Miitahsh kaa'ikotc, “Eya', niin Ilaaica. Taka awi wiintamaw kitookimaam ci'inatc, ‘Inashke hsa naa, Ilaaica ohsha omaa ayaa.’ ”

⁹ Oopataaya (Obadiah) tahsh kii‑ihkito, “Aaniin itahsh kaa⁠ishi mamaashiiyaan wenci antawenimiyan ci⁠nihshitc a'a kihciokimaa Ehaap.

¹⁰ Kehcinaac iko e⁠kehcinaa'oyaan kaaTipenciketc kiKishemanitoom wiin misiwe eh⁠tipenciketc, mii 'i ehpiihci kehcinaa'entamaan kihciokimaa misiwe o'omaa ahkiink e'ishi nanaantone'ohk. Ini hsa tepentaminitc pahkaan ahkiini kii‑ihkitowan inkoci e⁠ayaawaahsiwatc; mii hsa Ehaap entootawaatc i'i pemaatisinitc tepentaminitc ahkiini, ekii ahpimo'aatc tepwe ekii mihkaakoowaahsiwatc otahkiiminiink.

¹¹ Miitahsh o'o noonkom eshiyan, ‘Maacaan awi ishi kitookimaam kihciokimaa, Ilaaica hsa 'omaa ayaa.’

¹² Inashke nakaninaan o'omaa, kehcinaac hsa kaaTipenciketc otAhcaahkwan kika maaciinik, kaawiin tahsh ninka kihkentansiin aaniinti ke⁠ayaayan. Ahpii tahsh wiintamawak Ehaap o'omaa e⁠ayaawatc, mihkawihsinok itahsh, mii hsa 'i ci⁠nihshitc. Niin iitok kitanohkii'aakan inentaakwan, e⁠oshkaatisiyaan ekii onci maacii kohtaanenimak kaaTipenciketc.

¹³ Kaawiin ina tahsh mahshi kinoontansii aaniin kaa‑ayiishiiyaan ahpii Cesapel kii⁠nihsaatc kaa⁠kanootamawaanitc Kishemanitoon? Ninkiih kaanaak ohsha ninkotwaahk (100) okanootamaakek, nenaanimitana (50) ekii ishi nenaawinakwaa, eshi wiimpaapihkaanik ekii ishi kaanakwaa. Miitahsh kaa⁠ishi ahshamakwaa pahkweshikanan, nipiini kaye ninkii mina'aak.

¹⁴ Miitahsh noonkom eshiyan, ‘Maacaan awi wiintamaw kitookimaam kihciokimaa ci'inatc, Ilaaica hsa o'omaa ayaa.’ Miitahsh i'i kehcinaac ci⁠nihshitc,” kii‑ihkito Opataaya.

¹⁵ Miihsh o'o Ilaaica kaa⁠ihkitotc, “Kehcinaac iko kaaTipenciketc kaaMaawaci mashkawisiitc kaa‑anohkiihtawak, wiin misiwe eh⁠tipenciketc, mii 'i ehpiihci kehcinaa'entamaan tepwe ci⁠waapamitc kihciokimaa Ehaap noonkom kaakiishikaninik,” kii‑ihkito.

¹⁶ Miitahsh shemaak Oopataayawan kaakii anta wawiintamawaanitc Ehaapoon. Miitahsh Ehaapoon kaakiih piishaanitc ekiih pi'anta nakishkaakotc Ilaaica.

¹⁷ Ahpii hsa Ehaapoon e⁠waapamikotc mii 'iwe kaa⁠ihkitonitc, “Kiin ina'a, kaa⁠mamaashiihkantawatwaa Isriyalak (Israel)?”

¹⁸ Miihsh o'o Ilaaica kaa⁠ishi nahkwehtawaatc, “Kaawiin ohsha niin kaa⁠mamaashiihkantawakwaa Isriyalak! Kiin ohsha, iki kaye kitetehkaank kaa⁠ontahkaanesiwaatc, onsaam aaniihsh kikii nakatamowaam kaaTipenciketc otinaahkonikewinan, tekwac itahsh e⁠anami'ehtawek Peyal (Baal) kaa⁠inaahkoniketc.

¹⁹ Taka hsa kanoosh kahkina Isriyalak ci⁠nakishkawiwaatc weti kihci waciink Kaarmal (Carmel) ecikaatenik. Iki tahsh kaye kanoonaahkan niiwaahk naanimitana (450) kaa⁠kanootamawaawaatc manitoohkaanan Peyal enimintc. Iki kaye antomaahkan kotak niiwaahk (400) ininiwak kaa⁠kanootamawaawaatc manitoohkaanan Aasharah (Asherah) kaa'inimintc, kaa⁠wiici wiihsiniimaawaatc Cesapelan otatoohpowinaahkoniink,” okii'inaan.

²⁰ Miitahsh Ehaapoon kaakii ishihcikenitc, misiwe ekii ishi tipaacimonitc Isriyalihkaank, i'i kaye okanootamaake' ekii maawantoonaanitc i'imaa kihci waciink Kaarmal ecikaatenik.

²¹ Miihsh Ilaaica pehsho kaakiih pinaasihkawaatc kahkina pemaatisinitc Isriyala' ekii'inaatc, “Aaniin tahsh minihk niishin kekoonan wa⁠waawaanentami'ikoyek? Kiishpin hsa kaaTipenciketc Kishemanitoowitc mii hsa awe piminisha'ohk! Kiishpin tahsh wiin Peyal manitoowikwen, mii hsa awe piminisha'ohk!” I'i hsa pemaatisinitc kaawiin awaac pankii okii nahkwehtaakohsii'.

²² Miihsh Ilaaica kaa‑ani ihkitotc, “Niin ohshehta keyaapi nimihcipeshik e⁠ishkwiiyaan eh⁠tinowiyaan kaa⁠kanootamawaatc kaaTipencikenitc; iki tahsh wiin kaa⁠kanootamaawaawaatc Peyalwan niiwaahk naanimitana (450) tahshiwak.

²³ Taka hsa piitamawihshinaam niishin aape pishihkiwak. Peshik hsa oka otaahpinaawaan pishihkiwan, oka nanawishwaawaan itahsh, miitahsh i'imaa wakicimihshink keshi ahsaawaatc, kaawiin tahsh ta⁠pootawehsiiwak weti shiipaaya'ii. Keniin tahsh a'a kotak pishihki ninka nanawishwaa, wakici mihshink hsa ninka ishi ahsaa, kaawiin keniin ninka pootawehsii shiipaaya'ii.

²⁴ Miitahsh ci⁠kanoonaawaatc otishinihkaasowininiink omanitoomiwaan, miihsh keniin keshi kanoonak otishinihkaasowinink kaaTipenciketc. A'a tahsh kenahkwehtank, mii hsa awe tepwe Keshemanitoowitc,” kii‑ihkito. Kahkina hsa pemaatisinitc kii‑ihkitowa', “Mii hsa 'i eminwaahkonikeyan.”

²⁵ Miitahsh Ilaaica kaa'inaatc kaakiih kanootamawaanitc Peyalwan, “Awiyohk otaahpinamaasok peshik aape pishihki kiinihtamawaa eh⁠paahtiinoyek. Nanaawishohk itahsh, keko tahsh wiin pootawehkek shiipaaya'ii. Miitahsh i'i ishi kanoonaahkek kimanitoomiwaa,” okii inaa'.

²⁶ Miitahsh kaa⁠ishi otaahpinaanitc peshik pishihkiwan ekii nanawishwaanitc. Miihsh kaye kaa⁠ishi kanoonaanitc otishinihkaasowininiink Peyalwan. Ehkishepaawakaninik tahsh ekii onci maacihtaanitc piinihsh ekii naawahkwenik ekii ihkitonitc, “Kiin Peyal, taka nahkwehtawihshinaam.” Kaawiin tahsh awiyan kii⁠noontansiiwan, kaawiin kaye awiyan okii nahkwehtaakohsiiwaan! Miitahsh kaashi ayihshpikwaashkwaaniwaatc i'imaa waahkaaya'ii otoonaapihkinikaniwaank.

²⁷ E'ani aapihta kiishikaninik tahsh Ilaaica okii miihkinsomaa' ekii'inaatc, “Enikohk hsa kanoonihk, manitoowi iitok. Maakishaa kaye ontamiitok, komaahsh kaye ontamentiwitok, komaahsh kaye waahsa ishi kihci maacaatok, komaahsh kaye ontaminkwaamiwitok, ishinaakwanini tahsh cikii amaci'intipan,” okii'inaa'.

²⁸ Miitahsh enikohk kaa⁠ishi shaahshaakowenitc ekiih pehpehshitisonitc ekii aapacihtoonitc pashipa'ikewihkomaanan, moohkomaanenhsan kaye. Mii 'i aaniihsh kaa⁠nihtaa ishihcikenitc piinihsh miskwiini ekiih saakiciciwaninik.

²⁹ E⁠ani ishkwaa aapihta kiishikaninink tahsh aanciko kiih⁠shaahshaakowewa', kaawiin kiih⁠pakiciihsiiwa' piinihsh ekii ani onaakohshininik kaakii nihtaa pakitinaahsowintc ahpii kii⁠onaakohshininik. Kaawiin tahsh awiyan kiih⁠kiikitohsiiwan, kaawiin kaye awiyan okii nahkwehtaakohsiini, kaawiin kaye awiyan okiih papaapisiskihtaakohsiini.

³⁰ Miitahsh o'o Ilaaica kaa'inaatc kahkina pemaatisinitc, “Taka kahkina pehsho pinaasihkawihshik.” Mii hsa 'i kahkina kaa⁠pishi naasihkaakotc. Miitahsh kaakii ishi kiiwe waweshihtootc i'i eshi pakitinaahsoohtamawimintc kaaTipencikenitc kaakiih piikoshkikaatenik.

³¹ Miihsh Ilaaica kaa⁠ishi otaahpinaatc mitaahshiniishin (12) ahsinii' kaakiih tahswewaanakisinitc Isriyala' kaakii okosihsimikonitc Cekapoon (Jacob). KaaTipenciketc iitok kaakii'inaakopanen, “Isriyal hsa kika ishinihkaas.”

³² Miiwa' tahsh i'i ahsinii' kaa‑aapaci'aatc kii⁠oshihtootc kaakii ishi pakitinaahsowintc otishinihkaasowininiink kaaTipencikenitc. Miihsh kaye kaa⁠ishi waahkayaanihketc ekii inikohkwaanihketc ci⁠tepipiinik niiwitipa'opaan.

³³ Miitahsh kaa⁠ishi onaahkohsitootc mihsan, ekiih piihsishwaatc ini pishihkiwan. I'imaa tahsh wakicimihshink okii ishi ahsaan. Miihsh kaa⁠ihkitotc, “Mooshkinepatook hsa ini niiwin ahtoopaanan. I'imaa hsa tahsh pakitinaahsowinink, wakicimihshi kaye ishi siikinamok i'i nipi.”

³⁴ Miihsh kaa‑ani ihkitotc, “Niishink i'i tootamok.” Mii hsa niishink kaa⁠ishihcikenitc. Aanciko tahsh kii⁠ani ihkito, “Nihsink i'i tootamok.” Miihsh i'i kaa⁠ishihcikenitc.

³⁵ Wiinke tahsh kiih⁠shaapopiini i'i kaakii ishi pakitinaahsowintc, wiinke kaye kii⁠mooshkinepiini i'i waahkaayaanihkaan.

³⁶ Ekii ani ocihcihsenik tahsh e⁠ani onaakohshininik ahpii kaakii nihtaa pakitinaahsowintc, Ilaaica (Elijah) pehsho kiih⁠piishaa ekii ihkitotc, “Kiin Tepencikeyan, kaa⁠oKishemanitoomiwaatc Eparahaam (Abraham), Aaisik (Isaac), a'a kaye Isriyal kaakii'inintc. Taka hsa noonkom kaakiishikahk ta⁠kihkentaakwan kiin eh⁠Kishemanitoowiyan o'omaa Isriyalahkiink, niin tahsh kaye eh⁠tinowiyaan kitanohkii'aakan. E⁠ishihcikeyaan kaye kahkina ono kaashi anooshiyan.

³⁷ Nahkwehtawihshin, Tepencikeyan, taka nahkwehtawihshin, oko hsa pemaatisiwaatc ci⁠kihkentamowaatc kiin kaaTipencikeyan ehKishemanitoowiyan; kiin kaye ewii ishi'atwaa ci⁠kiiwe naasihkawihkwaa,” kii‑ihkito.

³⁸ Miitahsh kaaTipenciketc otishkotem kaakiih pinaashiimakaninik, ekii ankwaahkitek i'i pakitinaahsowin, ini kaye mihsan. Awaac kaye ahsiniik kii⁠ankwaahkisowak, ahki kaye kiih⁠mehtaahkite i'i kaye nipi kaakii mooshkinepiik waahkaayaanihkaanink wiinke kii‑ihskaapaakweyaahkite.

³⁹ Ahpii tahsh pemaatisiwaatc kaa⁠waapantamowaatc o'o e⁠ishihsenik, mii 'i kaa⁠ishi animihkohtaawaatc mihtahkamik ekii ihkitowaatc, “KaaTipenciketc ohsha iinsan Kishemanitoowi, kaaTipenciketc ohsha iinsan Kishemanitoowi.”

⁴⁰ Miitahsh Ilaaica kaakii'inaatc pemaatisinitc, “Otihtinihkwak iki kaa⁠kanootamawaawaatc Peyalwan; keko awaac peshik ta⁠shaapwiihsii.” Miitahsh kaa⁠ishihcikenitc pemaatisinitc kaakii'inaatc. Miihsh Ilaaica kaakii ishiwinaatc okanootamaake' weti siipiinhsink Kaaishan (Kishon) ecikaatenik, mii hsa weti kahkina kaah⁠tashi nihsaatc.

Kiipoonihsek Kii'ayaahsinok Miicim

⁴¹ Miitahsh Ilaaica kaa'inaatc Ehaapoon, “Maacaan itahsh awi wiihsinin, ci⁠awi minihkweyan kaye, ninoontaan ohsha e⁠kihci piitwewe piisa'ank,” okii'inaan.

⁴² Ekii ani maacaanitc hsa e⁠anta wiihsininitc, e⁠anta minihkwenitc kaye, mii hsa Ilaaica kaa⁠ishi inaamaciwetc weti wakitatin waciink Kaarmal (Carmel) ecikaatenik. Miihsh mihtahkamik kaakii animihkohtaatc nahsawikitik ekii ishikwehtaatc.

⁴³ Miihsh o'o kaa'inaatc otanohkii'aakanan, “Maacaan kihcikamiink inahke awi inaapin!” Miihsh kaa⁠ishi ishaanitc ekii awi inaapinitc. Miihsh o'o kaah⁠pi'ikotc, “Kaawiin kekoon nintishinansii!” Niishwaahcink (7) itahsh i'i okii'inaan ci⁠awi inaapinitc.

⁴⁴ Niishwaahcink itahsh kaa⁠ishaanitc mii 'owe kaakii'ikotc otanohkii'aakanan, “Niwaapantaan hsa wahkwi nipiink inahke ehpi'onci piitaanahkwahk e⁠inikohkwaak inini kaa⁠inikohkoninciitc!” okii'ikoon. Miitahsh kaa'inaatc otanohkii'aakanan, “Maacaan awi kanoosh Ehaap ci⁠onahpinaatc otootaapaanaahkwan ci⁠ani kiiwetc cipwaa aacikimiwanihshitc!” okii'inaan.

⁴⁵ Wiinke kii⁠ani mahkatewaanahkwanini, ekii ani kihci nootininik, ekii ani kihci kimiwaninik. Miihsh Ehaap kaa⁠ishi poosipahtootc otootaapaanaahkonk ekii ani ishi kiiwetc weti Cesriiyal (Jezreel) ootenaank.

⁴⁶ Miihsh Ilaaica kaakii otihsikotc omashkawisiiwinini kaaTipencikenitc, miihsh kaa⁠ishi ihkwahpitootc okikishkikanan oshiikanink. Wiin itahsh shaapwaya'ii misiwe kii‑ishi niikaanipahtoo weti Cesriiyal ootenaank.