1 ᑲᕒᐃᑎᔭᓇᒃ 9 - Ojibwe Kihcimasina'ikan

Opapaamisiwin kaamiinintc e'ishinisha'waakaniwitc

¹ Kaawiin ina nintipenintisohsii? Kaawiin ina nintishinisha'waakanimikoohsii? Kaawiin ina niin ninkii'waapamaahsii 'awe Ciisahs Christ kaaTipeniminank? Kaawiin ina kiinawaa kaaoncitepwehtamek e'anohkiihtawak kaaTipenciketc?

² Aanawiin pahkaan awiya ishiotaahpinihsikwaa ci‑ishinisha'waakaniwiyaan, kiinawaa eniwehk kitinenimim, aaniihsh kiinawaa kaaTipenciketc e'wiiciiwek oncikihkencikaate e'ishinisha'waakaniwiyaan.

³ Ahpii hko ehkakwe naanaakaci'iwaatc awiyak, amii 'owe eshinahkwehtamaan:

⁴ Kaawiin ina nintinakinsohsii o'o kaashianohkiihtamaakeyaan cionciahshamikooyaampaan?

⁵ Kaawiin ina niin nintinakinsohsii cinaapihcikeyaan kaatootamowaatc iki kotak ishinisha'waakanak kaye kaaTipenciketc wiicihkiweya', kaye wiin Piitar (Peter) kaatootank? Kaawiin ina kaye niin peshikwan nintaapapaami⁠ wiiciiwaahsiipan otepwehtamoohkwe wiiwiyaampaan kewiin ciahshamintipan?

⁶ Komaa niinawint ehta Paarnapahs (Barnabas) intawaa e'anohkiihtamaasoyaank ciahshantisoyaank?

⁷ Awenen tipinawe keontaaci'itisohpan ehshimaakanihshiiwitc? Awenen a'a kihtikewinini keamoominehsikipan tipinawe oshoominikihtikewinink? Awenen a'awe okanawimaanahcaanihshiwe keaapacihtoohsikipan i'i coocoohshaapooni wiin i'imaa e'ontinank omaanahcaanihshimink?

⁸ Kaawiin wiin memwehc ininiinaank ninkaontinansiin ihkitowin. Aaniihsh peshikwan ihkitoomakan kehteinaahkonikewin.

⁹ Mii 'iwe eshipii'ikaatenik Moosihs (Moses) otInaahkonikewin: “Keko kipitoonehpinaahken a'a pishihki ehpawishkawaatc pahkweshikanan,” ihkitoomakan. Kaa maawiin mayaa pishihkiwa' ehsaaki'aatc kaaonci‑ihkitotc Kishemanitoo.

¹⁰ Kaawiin ina tepwe kiinawint kaakii'onci‑ihkitotc? Kehcinaac kiinawint kii'oncioshipii'ikaate. Inashkehsh awe kihtikewinini kaapikishkahkamikipiciketc, kaye piinihsh awe kaapawishkiketc, kahkina kekoon taishianohkiiwak ehpiihtoowaatc i'i ahpii keontancikewaatc.

¹¹ Inashke niinawint i'iwe kaa‑ahcaahkwentaakwahk ninkiihkihtikaataamin i'imaa kaashiayaayek. Onsaam ina kitaa sanakentaam pimanishikeyaankipan kitahkiiwi kekoonimiwaan ciwiici'ikoyaankipan?

¹² Pehkaanisiwaatc o'owe ishitipeniminekwaa, kaawiin ina niinawint nawac nintinentaakosihsiimin? Kaawiin itahsh niinawint i'iwe ninkii'aapacihtoohsiimin. Maano tahsh ninkii'inentaamin kahkina kekoon cipimiwitooyaank, ekaa kekoon cikipishkansiwaank iwe ominwaacimowin Christ.

¹³ Kehcinaac kikihkentaanaawaatok, awiyak Kihcianami'ewikamikonk kaatananohkiiwaatc, i'imaa ontancikewak. Iki tahsh kaye kaapaminamowaatc kaaishipakitinikenk, pahkwenamawaawak pakitinikewinink cionciwiihsiniwaatc.

¹⁴ Mii ko peshikwan kaaTipenciketc okii'inahtoon i'iweniwa' kaawiintamaakenitc i'i minwaacimowin i'imaa ciontaatisinihpan.

¹⁵ Onoweniwan itahsh kaainahtekin, kaawiin niin ninkii'aapacihtoohsiinan. Kaawiin kaye noonkom nintoonci ishipii'ansiin ciotaahpinamaasoyaan o'o kaainahtek ciwiici'ikoyaan. Nawac nintaanip ahpiihc awiya “anihshaa ihkito” ci‑ishihpan o'o kaashikihci‑inentamaan.

¹⁶ Aanawiin i'i e'minwaacimoyaan, kaawiin nintayaahsiin keoncimamiihkwaasoyaampaan. Inashke nintahpiihci antawenimikoo mii 'iwe citootamaan i'i kaaikooyaan. Takohtaanentaakwan i'i keishihseyaampaan wiintamaakehsiwaan minwaacimowin.

¹⁷ Ishianohkiiyaampaan niin iko kaashionentamaan taapishkoo anohkiiwin e'otaahpinamaan, nintaainentam ciontisiyaan. O'owe tahsh kaatootamaan ninantawentaakos. Aaniihsh ninkii'opapaamisiwini'ik Kishemanitoo.

¹⁸ Wekonen itahsh i'i ketipa'amaakooyaan? Mii 'iwe maanikooyaan, ciwiintamaakeyaan i'i minwaacimowin, kekoon e'ontisihsiwaan, kaye hsa ko e'aapacihtoohsiwaan niwiici'ikoowin kaainahtamaakooyaan, 'iwe minwaacimowin ehpapaamisiinotamaan keoncimiinikooyaampaan.

¹⁹ Kaawiin awiya inini nintipenimikohsii. Nintishi'itis itahsh kahkina awiyak ciotanohkii'aakanimiwaatc, amii 'iwe awahshime niipiwa' cikashki'akwaa citepwehtamowaatc.

²⁰ Mekwaa e'wiiciiwakwaa Coowak, mii 'iwe nintishipimaatis ci‑ishikashki'akwaa. Aanawiin niin Moosihs (Moses) otInaahkonikewin ehtipenimikohsiwaan, kaye niin nintishipimaatis cikashki'akwaa kaatipenimikowaatc.

²¹ Shikwa peshikwan iki kaa‑aapacihtoohsikwaa Coowa' otinaahkonikewinini, wiiciiwakwaa, keniin nintishipimaatis, ekaa keniin e'aapacihtoohsiwaan i'i inaahkonikewin, mii 'i nawac cikashki'akwaa. Kaawiin nintihkitohsii ehkanawentansiwaan Kishemanitoo otinaahkonikewin, aaniihsh a'a Christ nintipenimikowaan otinaahkonikewin.

²² Kaye awiyak kaawahkewisiwaatc otepwehtamowiniwaank wiiciiwakwaa, kaye niin nintaapacihtamawaak otishiayaawiniwaa, mii 'iwe ci‑ishikashki'akwaa. Aaniin iko ninkakwetinowi'itis kahkina awiyak kaatinowiwaatc, aaninta hsa ko cipimaaci'akwaa. Wekonen iko nintootaan keoncikashkihcikeyaan.

²³ Kahkina kekoon nintishihcike cipapaawiintek i'i minwaacimowin, kaye niin i'imaa citako shawentaakosiyaan.

²⁴ Kehcinaac kikihkentaanaawaa wiihkakwecihkanitink, niipiwa' awiya wiici'iwewak e'maaciipa'itiwaatc. Peshik itahsh ehta tapahkinaake citipa'amawintc. Mii 'iwe kiinawaa kwayahk kakwepimipahtook cipahkinaakeyek.

²⁵ Shikwa kahkina kaakakwecihkashiwetc, mekwaa e'oshiihtaa'itisotc, weweni ko naakacihtamaaso; mii paanimaa kiipahkinaaketc cimiinintc opahkinaakewaanohkwaan wiipa kenihshiwanaataninik. Kiinawint itahsh kikamiinikoomin peshik wiihkaa kenihshiwanaatahsinok.

²⁶ Mii 'iwe niin kaaoncikwayahkopahtooyaan weti ciniikaaniocihcihseyaan. Taapishkoo kaye nintishiayaa ehkakwetakaneyaan. Kaawiin anihshaa nimihcipapanakanehsii.

²⁷ Miitahsh kaaoncipahpahkihte'amaan i'i niwiiyaw cikashkihtooyaan misiwe ci ishitipentamaan. Kiishpin i'i ishihcikehsiwaan maakishaa “kinoontehse” nintaaikoo, aanawiin pehkaanisiwaatc ekii'antomakwaa cikakwecihkashiwewaatc.