1 ᑲᕒᐃᑎᔭᓇᒃ 8 - Ojibwe Kihcimasina'ikan

Enentaakwahk miicim ekiihpakitinamawintwaa manitoohkaanak

¹ Shikwa 'iwe kaakii'ishipii'amawiyek, aaniin enentaakwahk i'i miicim ehpakitinamawintwaa manitoohkaanak: tepwemakan o'owe ihkitowinenhs: “Kahkina kitayaamin kihkentamowin.” 'Owe tahsh ishikihkentamowin okihtenimo'ikon awiya e'ayaatc. A'awe tahsh saaki'itiwin kaa‑aapacihtootc, okakwe mashkawiki'aan owiiciotepwehtamoon.

² Awiya “ninkihkentaan kekoon” kaainentank, kaawiin hsa tepwe kekoon otekihkentansiin i'i kaaishiantawentaakositc.

³ Awiya tahsh kaasaaki'aatc Kishemanitoon, okihkenimikoon.

⁴ I'iwehsh miinawaa enentaakwahk e'miicinaakaatek kekoon kaakiihpakitinamawintwaa manitoohkaanak: kikihkentaamin i'iwe eshiaapatisitc manitoohkaan. Kaawiin tepwe ayaahsii awiya. Kikihkenimaanaan peshik ehta e'ayaatc Kishemanitoo.

⁵ Aanawiin e'ayaawaatc manitook kaainintwaa kiishikonk kemaa ahkiink ehtanentaakosiwaatc, kaye aana paahtenowaatc manitook kaye otipencikek kaainintwaa,

⁶ kiinawint itahsh peshik ehta ayaa Kishemanitoo, mii 'awe Kaaoyoohsimintc, kahkina kekoon kaakii'oshihtootc. Kaye wiin kitooncipimaatisimin cianohkiihtawank. Shikwa kaye peshik ehta ayaa kaaTipenciketc, mii 'awe Ciisahs Christ. Mii ohsha 'awe kahkina kekoon kaakii'onciimakahk kaakii'oshihcikaatek, shikwa wiin a'awe kipimaatisiwininaan kaaonciimakahk.

⁷ Kaawiin tahsh kahkina awiya otayaahsiin o'o kihkentamowin. Aaniihsh aaninta awiyak onanamaayaapantaanaawaa manitoohkewin, piinihsh iko noonkom awiya e'miicitc kekoon, mii 'i eshinank tepwe ehtipentaminitc ini manitoohkaanan. Miitahsh ehkwayahkwenintisohsik kaaoncimaanenintisotc i'i ekii'miicitc.

⁸ I'iwe tahsh miicim eshiaapacihtooyank, kaawiin o'owe kitishi'ikohsiimin awahshime ciminowiiciiwank Kishemanitoo. Kiishpin manaamiiciyank kaawiin i'imaa awahshime kikatapahsentaakosihsiimin. Shikwa miiciyank kaawiin awahshime kikaminoishiwepisihsiimin.

⁹ Kiinawaa tahsh aanawiin ehpakitinikooyek aaniiniko eshiantawentamek, ayaankwaamisiyohk! Maakishaa kekoon ehtootamek taakii'onci pisokehshin awiya tino kaamashkawitepwehtansik.

¹⁰ Kiin kitayaan i'iwe kihkentamowin, pahkaan itahsh awiya kaakwayahkwentansik i'i otishihcikewin, kiishpin e'waapamihk i'imaa manitoohkewikamikonk ehtashiwiihsiniyan, kaye wiin maawiin tainentam pisaan iko 'imaa ciontancikehpan i'iwe kaakiihpakitinamawimintc manitoohkaana'?

¹¹ Miitahsh i'i cioncinihshiwanaaci'ikotc a'a kiwiiciotepwehtamo e'niinamisitc, onsaam iko ekii'naakohtooyan kikihkentamowin. Mii ohsha 'awe peshik kaakii'nipoohtamaakotc Christan.

¹² O'owe tahsh ishihcikeyekipan, kitaawanitootawaawaa Christ, aaniihsh kitishiwanitootawaawaak kiwiiciotepwehtamoomiwaak, e'wahke‑⁠maanenintisowaatc ehkwayahkwentansikwaa otishihcikewiniwaa, e'ishimaanihse'ekwaa.

¹³ Mii 'owe niin enentamaan: kiishpin awiya macitootamo'ikotc i'iwe kaamiicinaatek, nintaainentam wiihkaa miinawaa wiiyaahs cimiicihsiwaampaan, ekaa cipankihshimaahsiwakipan a'a niiciotepwehtamo.