1 ᑲᕒᐃᑎᔭᓇᒃ 7 - Ojibwe Kihcimasina'ikan

Wiitikentiwin ehtashincikaatek

¹ Shikwa ninkanahkwehtaanan ini kekoonan kaakiihpioshipii'amawiyek. Onishihshin a'a inini pisaaniko wiihkaa e'otaahpinaahsik ihkwewan.

² Paahtiinatin itahsh pihshikwaatisiwin e'ayaak, maano kahkina 'awe inini okatipenimaan tipinawe wiiwan. Miinawaa a'awe ihkwe citipinawewisitc onaapeman.

³ A'awe inini mii 'i citipitootank i'i kaainentaakositc e'wiiwitc cinana'entami'aatc, kayehsh awe ihkwe okanana'entami'aan onaapeman.

⁴ A'awe ihkwe kaawiin wiinehta otipentansiin owiiyaw, wiin tahsh kaye onaapeman otipentamini. Peshikwan a'awe inini kaawiin wiinehta otipentansiin owiiyaw. Inihsh kaye wiiwan otipentamini.

⁵ Keko wiin waniihkenotawaahken kiwiitikemaakan, paanimaa ehta kiikanoonitiyek nahkontiyek, cikakwe teishihsek eshipehpeshikoyek cikanoonek Kishemanitoo. Miihsh i'i miinawaa ciwiiciintiyek. Mii 'i ekaa cioncikashki'ihsinowek a'a Setan (Satan) kiniinamisiwiniwaank.

⁶ Kaawiin wiin ci‑inaahkonikeyaan kahkina awiya ciwiitikehpan. Kimihciwiintamawininim itahsh ketootamekipan.

⁷ Ampehsh kahkina awiya ishiayaawaahpan niin kaashiayaayaan e'wiitikehsiwaan. Entahshitc itahsh awiya mayaa otayaan omiinikoowisiwin, entahsopehpeshik otishimiinikoon Kishemanitoon otishi'ikoowin.

⁸ O'o hsa tahsh nintinaak iki kaamihcipehpeshikowaatc kaye okiiwaatisiik: taaonishihshin ahpane hsa ko ci‑ishipehpeshikoyekipan taapishkoo keniin kaaishiayaayaan.

⁹ Kiishpin wiin kashkihtoohsiwek cikanawenintisoyek, mii 'i pisaan ciniwiitikeyek. Nawac onishihshin awiya ciwiitikehpan, ahpiihc wiin cikakwaataki'ikohpan i'i omihsawentamowin.

¹⁰ Kiinawaa tahsh kaawiitikentiyek kitishiwiintamawininim o'o inaahkonikewin – kaawiin niin o'owe nintihkitowin, a'awehsh kaaTipenciketc: kaawiin okanakanaahsiin a'a ihkwe onaapeman, kitikoom.

¹¹ Kiishpin tahsh nakanaatc, mii 'iwe cipapeshikotc, kemaa miinawaa cikiiwenotawaatc onaapeman. Awiya kaye wiiwitc kaawiin okawepinaahsiin.

¹² Miinawaa iki pehkaanisiwaatc niin o'owe nintinaak – kaawiin wiin kaaTipenciketc mayaa okii'wiintansiin: a'a otepwehtamo ayaawaatc ehtepwehtansinik wiiwan, kiishpin inentaminitc pisaaniko ciwiiciiwikotc, kaawiin okawepinaahsiin ini wiiwan.

¹³ Kaye a'a ihkwe kaaishionaapemitc ekaa ehtepwehtansinik, kiishpin inentaminitc ciwiiciiwikotc, kaawiin otaawepinaahsiin.

¹⁴ Inashke aaniihsh a'awe onaapemimaa kaatepwehtansik, kaye wiin inentaakosi ehtipenimikotc Kishemanitoon e'wiiwitc ihkwewan e'otepwehtamowininitc. Shikwa kaye ihkwe kaaotepwehtamowinihsik, onaapemitc itahsh otepwehtamoon, kaye wiin inentaakosi ehtipenimikotc Kishemanitoon. Inashke kiishpin o'owe ishihsehsinokipan, iki oniicaanihsimaak taapishkoo taainentaakosiwak ehtipenimikohsikwaa Kishemanitoon. Ishihse hsa ko, mii 'i wenci‑inentaakosiwaatc kewiinawaa ehtipenimikowaatc Kishemanitoon.

¹⁵ Kiishpin itahsh kaatepwehtansik wiinakanaatc ini wiitikemaakanan kaatepwehtaminitc, pisaaniko tamaacaa. Kiishpin o'owe ishihsek, a'awe kaanakanintc ishipakitinaa aaniiniko ci‑ishihciketc, aaniiniko a'awe kemaa inini, kemaa ihkwe. Aaniihsh Kishemanitoo kikii'ishiantomikonaan misiwe ko cikakwe minowiiciintiyank.

¹⁶ Kiin otepwehtamoohkwe, aanti keoncikihkentamampan cipimaaci'atc kinaapem? Kaye kiin onaapemimaa, aanti keoncikihkentamampan cipimaaci'atc kiwiiw?

Ishipimaatisik kaashiayaayek ahpii kaa'antominek Kishemanitoo

¹⁷ O'owe tahsh wiin kitikoom: entahshitc awiya tani‑ishipimaatisi kaaishimiinikotc kaaTipencikenitc, kaye kaakii'ishiayaahpan ahpii kii'antomikotc ini Kishemanitoon. Mii 'owe niin kaaishionakintamaan misiwe entashianami'aank.

¹⁸ Awiya inini aasha kaakiih kihkinawaatashakeshontc kiiantomikotc Kishemanitoon, kaawiin otaakakwe aancihtoohsiin okihkinawaacishokoowin. Awehsh kaye inini ekaa mahshi ehkihkinawaatashakeshwaahsiwintc ahpii e'antomintc, kaawiin memwehc taa⁠kihkinawaatashakeshwaahsii.

¹⁹ Kaawiin inkotano inentaakwahsinoon kemaa ehkihkinawaatashakeshontc inini kemaa cikihkinawaatashakeshwaahsiwintc. Mii 'iwe kaakihci‑inentaakwahk: awiya cina'ihtankipan Kishemanitoon otinaahkonikewinini.

²⁰ Kahkina awiya peshikwan taishiayaa otishi'ikoowinink kaakii'ishiayaatc ahpii kaa'antomintc.

²¹ Kiin ina kikii'anohkii'aakaniw ahpii kii'antomikooyan? Keko wiin i'i papaapisiskentanken. Kiishpin itahsh ishihsek cipakitinikooyan, mii 'i otaahpinan.

²² Awiya hsa ko anohkii'aakan ehtinowitc ahpii kiiantomikotc kaaTipencikenitc, kaaTipenciketc otaapa'waakanan inentaakosi. Peshikwan itahsh awiya kaa‑awahkaaniwihsik ahpii kiiantomikotc Christan, noonkom itahsh otootanohkii'akanimikoon ini Christan.

²³ Kishemanitoo kikiihtipa'okowaa citipeniminek. Kaawiin kikatipenimikohsiiwaak ininiwak.

²⁴ Niiciotepwehtamook! Kahkina awiya peshikwan otaa‑ani‑ishiwiiciiwaan ini Kishemanitoon taapishkoo kaakii'ishiayaatc ahpii kaa'antomikotc.

Aaniin keishihciketc awiya kaaowiiciiwaakanihsik

²⁵ Shikwa kaa'ishikakwecimiyek aaniin keishihcikewaatc oshki ihkwewak mahshi kaapapaamenimaahsiwintwaa. Kaawiin nintayaawaahsiin amanc kaainaahkonikekopanen kaaTipenciketc. Kiwiintamawininim itahsh niin enentamaan. KaaTipenciketc oshawencikewinink nintoonci inentaakos citepweyenimikooyaan.

²⁶ Mekwaa hsa ko noonkom mikoshkaaci'iwewin e'ayaamakahk, nintinentam e'onishihshink awiya peshikwan iko ci‑ishiayaahpan.

²⁷ Kiwiiw ina? Kaawiin kitaakakwe pahkewinaahsii. Keyaapi na kipapeshik? kaawiin kitaa antone'waahsii kewiiwiyan.

²⁸ Kiishpin itahsh maano aniwiiwiyan, kaawiin i'imaa kitishiwanitootansii. Kiishpin kaye oshki ihkwe wiitiketc, kaawiin kewiin wanitootansii. Nawac itahsh nintaaminwentam cikihciwininakook cianimekwaashkansiwek i'iwe sanakisiwin kaaniotihtamowaatc owiitikek.

²⁹ Mii 'owe etamaan, niiciotepwehtamook! Kaawiin keyaapi kinwesh tatawaahsinoon. Mii 'omaa ahkonaak ikiweniwak kaawiiwiwaatc taishipimaatisiwak taapishkoo e'ontami'ikohsikwaa wiiwiwaa'.

³⁰ Ikihsh kaye kaamawiwaatc ekaa cinaa'ikohsikwaa kashkentamowin. Ikiwehsh kaye kaaciihkentamowaatc ekaa ciontami'ikohsikwaa 'iwe kaaonciminwentamowaatc. Iki tahsh kaye kaa‑ataawewaatc kekoonan kaawiin otaaonsaamentansiinaawaa, taapishkoo ehtipentansikwaa kekoon taainentamook.

³¹ Ikiweniwak kaye ahkiiwi kekoonan kaa‑anohkaatamowaatc, kaawiin otaaonsaamiihkansiinaawaa. O'owe aaniihsh kaaishinaakwahk o'o ahki, kaawiin kinwesh taniayaamakahsinoon.

³² Kinantawenimininim ekaa mikoshkaatentamowin ciayaahsiwek. Mahshi awiya e'wiitikehsik otayaankwaamentaan kaainentaminitc ini kaaTipencikenitc, aaniin keishina'entami'aatc.

³³ A'awe hsa kaawiitiketc kaye opimentaan ahkiiwi anohkiiwin, ewiihkakwe nana'entami'aatc ini wiiwan,

³⁴ mii 'iwe kaa aayaashawentank. Shikwa kaye 'awe kaaonaapemihsik kemaa kaye kihcioshkiniikihkwe nawac otayaankwaamentamawaan kaaTipencikenitc otishianohkiiwinini, misiwe ewiihpakitinitisohkantawaatc wiiyawink kaye otahcaahkonk. A'a tahsh wiin kaaonaapemitc otayaankwaamentaan ahkiiwi anohkiiwin ewii'nana'entami'aatc onaapeman.

³⁵ Kiwiihkakwe wiici'ininim 'iwe kaaonci ihkitoyaan. Kaawiin kiwii'mihci onci'ihsinooninim, i'iwehsh kaakwayahkonaakwahk citootamek kaye misiwe cianohkawek kaaTipenciketc, ekaa pahkaan kekoon ciontamentami'ikohsiwek.

³⁶ Shikwa awiya otaanihsitc e'oshkiniikihkwewinitc, kiishpin enentank ehkwayahkonaakwahsininik kaatootawaatc e'wiitike'aahsik aasha ehtetahsopipoonwenitc cikii'wiitikenihpan, kiishpin ishiantawentaakwahk, pisaaniko okatootawaan eshiantawentank: okawiitike'aan. Kaawiin wani‑ishihcikehsii e'wiitike'aatc.

³⁷ Awiya tahsh e'aayiitentank ekaa ciwiitike'aahsik ini oshkiniikihkwen, wiin iko e'ayinentank, ekaa awiya e'ishi'ikohsik, kaye wiin ehkashkihtootc eshiantawentank, mii 'i cionishihshininik e'wiitike'aahsik.

³⁸ Mii hsa ko minotootam a'awe kaawiitike'aatc ini oshkiniikihkwen. A'awe tahsh kawiitike'aahsik nawac taminotootam.

³⁹ Shikwa 'awe ihkwe kaaonaapemitc inentaakosi 'imaa ciayayaatc ini onaapeman keahkopimaatisinitc. Kiishpin niponitc onaapeman, mii 'i ehpakitinintc piko awiyan miinawaa cionaapemitc eshiantawenimaatc. Mii ehta otepwehtamoon ciwiitikemaatc.

⁴⁰ Nawac itahsh taminwentam peshikwan iko ci‑ishiayaahpan. Mii 'iwe niin enentamaan. Nintinentam itahsh keniin wencikiikitoyaan ehkikishkawimak Kishemanitoo otAhcaahkwan.