1 ᑲᕒᐃᑎᔭᓇᒃ 6 - Ojibwe Kihcimasina'ikan

Tipaahkonitiwinink ciahsitihsikwaapan otepwehtamook

¹ Kiishpin awiya ontenintiwaatc e'ayaayek, kaawiin ina taashaakwenimohsii awiya ciahsaatc owiiciotepwehtamoon i'imaa tipaahkonitiwinink kaashionaahkoniwenitc awiya' ekaa kaa‑anami'aahsinik? Kaawiin ina taakii'nana'ahtamaasohsiiwak e'wiici'ikowaatc Kishemanitoo okwayahkwaatisiima'?

² Kaawiin ina kikihkentansiim Kishemanitoo okwayahkwaatisiima' cionahshowaanaanitc kahkina ahkiink kaa‑ayaanitc? Kiishpin tepwe awiyak keonahshowaanekwaa kahkina ahkiink kaa‑ayaawaatc, kaawiin ina kiteahpiihtentaakosihsiim kekoon kaa‑akaahsentaakwahk cinana'ihsitooyek?

³ Kaawiin ina kikihkentansiim kiinawint inkotink cionahshowaanankwaa encalak? Mii 'i awahshime keshikashkihtooyek onoweniwan noonkom pimaatisiwinink citeonahshowaatamank!

⁴ Kiishpin kiinipasikwiimakahk o'o tino, kitaainahsaawaak ina iki ekaa kanake kaainentaakosihsikwaa eshimaawaci'itiyek, wiinawaa cikakwe nana'ihsitoowaatc?

⁵ 'Owe kitishikanoonininim cimenihshentamek. Kehcinaac peshik taakii'ayaa kaatahshiyek e'ishiayaankwaamisitc cinana'ihsitamawaatc wiiciotanami'aa' kekoonan eshiontenitinitc.

⁶ Aanciko pahkaan kitishihcikem, peshik i'imaa tipaahkonitiwinink e'ahsaatc wiiciotepwehtamoon, ekaa kaatepwehtansinik e'anoonaatc cinana'ihsitoonitc.

⁷ I'imaa ohsha oncikihkentaakwan aasha ekii'wanihcikeyek, ahpii e'ontenintiyek, e'onaahkonitiyek. Kaawiin ina awahshime taakii'onishihshinsinoon aana maashitootawintc awiya cinanaahkwiihsik? Kaawiin ina taakii'onishihshinsinoon aana wayeshimikotc awiyan ekaa cimaanaahkonaahsik?

⁸ Aanciko meshkwac kitootaam e'maashitootaakeyek, e'wayeshinkeyek, ampooshke kiwiiciotepwehtamoomiwaak ehtootawekwaa.

⁹ Kehcinaac kitaa kihkentaam: iki kaamaci ishiwepisiwaatc kaawiin ta‑ayaahsiiwak i'imaa entashitipencikenitc Kishemanitoon. Keko kekoon kikawanihshimikohsiim: kaawiin oko tamiinaahsiiwak Kishemanitoon oTipencikewinini: iki kaapihshikwaatisiwaatc, kaye kaamanitoohkewaatc, kaye awiya kaakiimooci⁠wiiciiwaatc pahkaan awiyan owiitikemaakanini, kaye ininiwak kaaihkwehshihtoowaatc, kaye kaawiici⁠pihshikwaacihkotaatiwaatc iki ininiwak,

¹⁰ shikwa kaakimootishkiwaatc, kaaonsaamisiwaatc, kaanihtaa minihkwewaatc, kaatashimiwewaatc, kaawanihcike'iwewaatc kaye. Kahkina oko tino kaawiin tamiinaahsiiwak Kishemanitoon otipencikewinini.

¹¹ Aanint hsa kiinawaa o'o kikiihtinowim. Aasha tahsh kikii'anta pehkaapaawanikoom, aasha kikii'onahsikoom Kishemanitoo citipeniminek, aasha kikii'ishihcike'ikoom cikwayahkwakiminek Kishemanitoo. KaaTipenciketc Ciisahs Christ owiinsowinink kaa'ishihcike'inek kaye iniwe otAhcaahkwan kiKishemanitoominaan.

Inaapacihtaawaahk kiwiiyawiwaan cioncikihtentaako'ek Kishemanitoo

¹² O'owe maawiin awiya taihkito: “Kahkina kekoon nintawinamaakoo citootamaan.” Eha', kaawiin itahsh kahkina kikaminoshkaakohsiin ehtootaman. Kaye niin nintaakii'ihkit kahkina kekoon ehtawinamaakooyaan citootamaan. Kaawiin itahsh kekoon nintaa pakitinamawaatansiin citipenimikoyaampaan.

¹³ Kaye ihkitom: “Mii 'i wencikwayaantahtek i'i miicim cimiicinaakaatek, mii 'i enwaatek omihsataamaa cionciwiihsinink.” Eha', nintihkit, ninkotink itahsh Kishemanitoo mincikahkina okakipihtinaanan miicim kaye omihsataamaa. Kaawiin ohsha 'iwe kii'onci inahcikaatehsinoon i'i wiiyawimaa cipihshikwaatisiwiniwank, i'ihsh wiin kaaTipenciketc cianohkaakotc. Kaye kaaTipenciketc wiin otoonciihtamawaataan i'i wiiyawimaa.

¹⁴ Kaye Kishemanitoo okiihkiiwepimaatisii'aan ini kaaTipencikenitc kaakii'niponitc. Kaye kiinawint tipinawe omashkawisiiwinink kikaonci kiiwepimaatisii'ikonaan.

¹⁵ Kaawiin ina kikihkentansiim kiwiiyawiwaan e'opahkewisiwinitc Christ? Nintaaotaahpinamawaan ina Christ opahkewisiwin ciaantahtamawak opihshikwaatisiihkwen ciopahkewisiwininitc? Kaawiin 'iwe ci‑ishinaakwahkipan!

¹⁶ Kaawiin ina kikihkentansiim? Awenen hsa ko kaawiiciiwaatc opihshikwaatisiihkwen, inentaakwan cipeshikowiiyaahsewaatc. Aaniihsh Kishemanitoo kii'ihkito kihcioshipii'ikewinink: “Iki kaaniishiwaatc cipeshiko wiiyawiwaatc.”

¹⁷ Awiya tahsh kaawiiciiwaatc kaaTipencikenitc, peshikwentaakosiwak i'imaa ahcaahkonk.

¹⁸ Mooshak maaciipa'iwaatamohk pihshikwaatisiwin. Kahkina hsa ko 'iwe macitootamowin kaatootank awiya, mii hsa 'iwe saakici nahke wiiyawink kaainentaakwahk. A'awehsh pihshikwaatisiwin kaatootank owanitootaan tipinawe owiiyaw.

¹⁹ Kaawiin ina kikihkentansiim kiwiiyawiwaan e'otanami'ewikamikominitc Kishemanitoo otAhcaahkwan kaakikishkawinek, Kishemanitoo kaa'miininek? Kaawiin kiinawaa tipinawe kitipenintisohsiim.

²⁰ Aaniihsh kikiihtipa'okowaa Kishemanitoo, wiin ekii'ahtootc tipa'ikewin. Mii 'iwe inaapacihtaawaahk kiwiiyawiwaan cionci kihci‑inentaako'ek Kishemanitoo.