1 ᑲᕒᐃᑎᔭᓇᒃ 4 - Ojibwe Kihcimasina'ikan

Christ hsa kaakii'inanohkii'iyamintc otishinisha'waakana' citinowiyaank

¹ Mii 'iwe keinenimikooyaank e'otanohkii'aakanimiyamintc Christ, ekiihkanawenta'ikooyaank ini kekoonan payesh kaakihkentaakohtootc Kishemanitoo.

² Shikwa kaye antawentaakosi 'awe kaakanawenta'intc misiwe ko cikehcinaa'entaakositc.

³ Niin itahsh kaawiin niwiinaahpakentansiin kiishpin kekoon ishinaanaakasawaapamiyek nintanohkiiwinink, kaye piko awiya pemaatisitc, aaniin iko keinenimihshitc. Kaawiin niin iko ninaanaakaci'itisohsii.

⁴ Kaawiin kekoon nintishikihkenintisohsii kekoon ci‑ishiayaayaan. Kaawiin tahsh i'imaa oncikihkentaakwahsinoon ehkwayahkohsink nintishiayaawin. KaaTipenciketc mii ehta kekwayahko⁠nihsitawinawitc.

⁵ Mii 'i kekiinawaa, keko onsaam wiipa anoociko inenimaahkek awiya otishihcikewin cipwaa na'ihsek. Paanimaa ehta takohshink kaaTipenciketc, okapitootaan waahseyaank cimohshenaakwaninik kahkina kekoon, mihsawaako wanitipihkanonk aana kaatoonitc awiyan otishihcikewinini. Kaye okatootaan cimohsheyaapancikaatenik aaniin enentamowaatc awenenak ote'iwaank. Mii 'iwe ahpii kahkina awiya keshiminwaacimikotc Kishemanitoon aaniiniko kaashikashkihtamaasotc.

⁶ Niiciotepwehtamook, onoweniwan kaapitashintamaan ninkii'aawehcikaakenan taapishkoo niinehtawint Ahpwaalahs (Apollos) kaakii'ikooyaank, cioncikihkinawaapamihshinaayaank keshiayaayek, cionsaamihcikehsiwek, i'iwe hsa ehta ko kaaishipii'ikaatek i'i Kihcimasina'ikan. 'Imaa tahsh kaatahshiyek kaawiin awiya taishinaakehsii ini peshik ci‑ishpenimaatc kaye kotak citapahsenimaatc, kaawiin kaye ci‑ishiaanwaapantiyek.

⁷ Inashke awenen kaa'ishi'ihk awahshime cikii'inentaakosiyan? Wekonehsh wiin i'i eyaayan wiihkaa kaa'miinikoohsiwan? Kiishpin tahsh tepwe kaa'miinikoowanen kahkina kekoon, aaniin tahsh keoncimamiihkwaasoyan taapishkoo ekii'mihciayaayan?

⁸ Aasha na kahkina kekoon kitayaam kaa‑antawentamek? Aasha na kitewenootisim? Aasha na kitookimaawim keniinawint itahsh ehtinowihsiwaank? Ampehsh tepwe kiikihciokimaawiyekipan, kitaakii'wiiciiwikoom eshiokimaawapiyek.

⁹ Mii 'owe eshinamaan: niinawint Kishemanitoo otishinisha'waakana' maawac otaanaank mohsheaya'ii ninkii'inahsikonaan. Nintishinaakosimin taapishkoo ikiweniwak nipowinink kaainaahkonikaniwiwaatc ewiihkihtaapamintwaa aaniin keshinihsintwaa. Kahkina misiwehkamik kaatahswenowaatc iki pemaatisiwaatc kaye encalak ninkihtaapamikonaan eshihcike'ikooyaank.

¹⁰ Okakiipaatisiik nintinentaakosimin e'anohkawankitc a'a Christ. Kiinawaa tahsh “Ninkakiihtaawentaamin e'wiiciiwinank Christ” kitinentaam. Niinawint nimacentaakosimin, kiinawaa tahsh wiin kitishpentaakosim.

¹¹ Piinihsh hsa ko o'o noonkom nimpapaa⁠noonteskatemin, ninoonteyaapaakwemin, ninoontehkonayemin, kaye nimpahpahkihte'okoomin, ninkwiinawi‑ishitaamin,

¹² kaye ninihtaa caakii'itisomin ehkihcianohkiiyaank. Aanawiin e'maciahshotamaakooyaank, aanciko tahsh niinawint “kikashawenimikoom” nintinaanaanik. Ahpii tahsh ahko e'onciihkaakooyaank, ninkakwemashkawentaamin.

¹³ Miihkinsomikooyaank kaye, aanciko niwaankawimaanaanik. Taapishkoo wepinikanak nintinenimikoomin, maawac iko nintapahsenimikoomin, piinihsh iko noonkom.

¹⁴ Kaawiin wiin cimenihshi'ikooyek kitishipii'amawihsinooninim. Taapishkoo niniicaanihsak kiwii'ishi⁠kihkino'amawininim.

¹⁵ Aaniihsh mitaahcink mitaahswaahk aana tahshiwaatc ehkanawenimaawahswaaninekwaa e'wiiciiwek a'a Christ, peshik ehta kitooyoohsim. Niin hsa kikii'oniicaanihsimininim ekiihpiwiintamawinakook i'i minwaacimowin. Mii 'imaa kaapionciwiiciiwek a'a Christ Ciisahs.

¹⁶ Mii 'iwe kaaoncipakohseniminakook cikihkinawaapamiyek.

¹⁷ Mii 'iwe nintinanoonaa 'awe Timahti (Timothy) ciantawaapaminek. Mii 'awe ninkosihs kaasaaki'ak, kaakwayahkwentaakositc ehpiminisha'waatc ini kaaTipencikenitc. Mii 'awe kemihkawaasominek aaniin kaaishipiminisha'ikeyaan e'aniwiiciiwak Christ Ciisahs. Kaye kikashiwiintamaakowaa aaniin keniin kaashikihkino'amaakeyaan aanti hsa ko kaaishimaawaci'itiwaatc otanami'aak.

¹⁸ Aaninta tahsh kiinawaa aasha kitepakenintisom. Kikii'inenimim ekaa miinawaa wiihkaa cipimawatihsihsinoonakook.

¹⁹ Inentank itahsh kaaTipenciketc, piciinak kikapiantawaapamininim. Mii ahpii ketashi⁠kihkentamawakwaa oko kaakihtenimowaatc, aaniin i'i tepwe eshimashkawisiiwaatc, kaawiin ehta otihkitowiniwaa.

²⁰ Kaawiin aaniihsh imaa kakitowinink ehta tawaapancikaatehsinini entashikimaawitc Kishemanitoo, imaahsh wiin omashkawisiiwin entashianohkiimakaninik takihkencikaateni.

²¹ Aaniin tahsh keshiminwentamek cipi‑ishiotihsinakook? Pahshanshe'ikan ina ninkapikikis, komaa kaye saaki'iwewinink cipi‑ishiminokanooninakook?