1 ᑲᕒᐃᑎᔭᓇᒃ 3 - Ojibwe Kihcimasina'ikan

Aaniin enentaakosinitc Kishemanitoo otanohkii'aakana'

¹ Niiciotepwehtamook! Weti otaanaank kaakiihpiwaapaminakook, kaawiin i'iwe kikiihteahpiihtaatisihsiim ci‑ishikanooninakook taapishkoo kaa‑ayaawimek Kishemanitoo otAhcaahkwan. Mii piko ehta taapishkoo kaa‑ahkiiwaatisiwaatc kikii'ishikanoonininim, aaniihsh kikii'apinoonciishiwentaakosim i'i ahpii e'maaciipiminisha'wek Christ.

² Mii ehta coocoohshaapo kikii'mina'ininim, kaawiin iko kaamashkawaak miicim kikii'ahshamihsinooninim, ekaa mahshi ekiihteishiayaahsiwek. Noonkom hsa ko kaa mahshi kitishiayaahsiim.

³ Keyaapi aaniihsh kitishipimaatisim taapishkoo ahkiink kaaishitipentaakosiwaatc. Aaniihsh kiinawaa ko ayaamakan ontenintiwin, ayaanoontiwin, kaawiin ina ishinaakwahsinoon o'o hsa ahkiink e'oncitipentaakosiyek? Kaawiin ina kitinaatisihsiim kaamihciahkiiwaatisiwaatc?

⁴ I'i peshik ihkitotc: “Niin Pwaal (Paul) nimpiminisha'waa,” kaye kotak, “Niin Ahpwaalahs (Apollos) nimpiminisha'waa,” ihkitotc, kaawiin ina ininiinaank kitishiayaahsiim?

⁵ Awenen tahsh a'a Ahpwaalahs? Awenen a'a kaye Pwaal? Niinawint ehta Kishemanitoo otanohkii'aakana' nintinowimin kaa'ontinamek kitepwehtamowiniwaa. Pepahkaan tahsh nintinanohkiimin 'iwe kaashipaminamo'iyamintc a'a kaaTipenciketc.

⁶ Niinihtam ninkiihkihtikaataanan kihtikaanenhsan, miihsh wiinihtam Ahpwaalahs okiihtihpaapaawatoonan. Wiin itahsh iko Kishemanitoo okii'maaciikihtoonan.

⁷ Mii hsa 'i kaawiin kekoon inentaakosihsiiwak a'awe kaakihtiketc, a'awe kaye kaatihpaapaawaciketc, a'awehsh ehta Kishemanitoo kihci‑inentaakosi e'maaciikihciketc.

⁸ Kaawiin pepahkaan tainentaakosihsiiwak a'a kaakihtiketc, a'a kaye kaatihpaapaawaciketc: pepeshik okatipa'amaakowaan ini Kishemanitoon aaniiniko eshinaakwaninikin otanohkiiwiniwaan.

⁹ Niinawint ihsa niwiitanohkiintimin e'anohkawankitc Kishemanitoo. Kiinawaa tahsh wiin Kishemanitoo kaashikihtiketc kitinentaakosim. Kaye hsa kitinentaakosim Kishemanitoo e'oshihtootc waahkaa'ikan.

¹⁰ Niin ninkii'ishihcike 'iwe kaaishimiishitc a'a Kishemanitoo. Taapishkoo awiya wawiinke kaanakaciwaahkaa'iketc niin nihtam ninkii'onaahkohsitoon i'imaa keshiwaahkaa'ikaatek. Pahkaan miinawaa awiya wakitaapihk kii'maaciiwaahkaa'ike i'imaa kaakii'ishionaahkohsicikeyaampaan. Tahsopeshik itahsh weweni takakweishimaacii.

¹¹ Kishemanitoo aasha nihtam okii'inahsaan Ciisahs Christan wiin cionaahkohsicikaakaaniwinitc. Kaawiin taapahkaanahsinoon kekoon awiya ci‑inahtootc.

¹² Iki tahsh o'omaa wakitaapihk kaashiwaahkaa'ikewaatc, aanint osaawi shooniyaawahsiniin otishiaapaci'aawaan, kaye waapishkishooniyaawahsiniin, kaye ehkihtakinsonitc ahsinii'. Aanint itahsh kaye mihtikoon, mashkohsiin, kaanoohkashkaninikin otaapacihtoonaawaan.

¹³ Kahkina tahsh awiya tawaapancikaateni otanohkiiwin. Tawaapanta'iwemakan i'i kiishikan kepiokiishikaamitc a'a Christ. Mii 'iwe ahpii kahkina awiya i'imaa ishkotenk taoncikihkencikaateni aaniin mayaa eshiayaanik otanohkiiwin.

¹⁴ I'iwe wakitaapihk kaawaahkaa'ikaatek, kiishpin ishkwaahkitek, tatipa'amawaa 'aweti otanohkii.

¹⁵ Caakaahkitenik itahsh awiya otooshihcikewin, mii 'i ciwanihtootc. Wiin ehta tapimaaci'aa. Taapishkoo mekweshkote e'oncipahpiitc taishinaakosi.

¹⁶ Kaawiin ina kikihkentansiim maamaw e'inwaanikooyek Kishemanitoo okihcianami'ewikamik? Wiin aaniihsh Kishemanitoo otAhcaahkwan ishitaawan i'imaa kaashimaamawi'itiyek.

¹⁷ Kiishpin awiya nihshiwanaacihtamawaatc 'oweni okihcianami'ewikamikoni Kishemanitoon, kaye wiin okanihshiwanaaci'ikoon Kishemanitoon. Aaniihsh inahcikaate ehta Kishemanitoo citipentank okihcianami'ewikamik. Mii 'iwe entinowiyek.

¹⁸ Keko wiin awiya tawayeshintisohsii. Kiishpin awiya inenintisotc e'ishikakiihtaawisitc noonkom okoweniwak kaapimaatisiwaatc eshinamowaatc kakiihtaawisiwin, maano ciwepinank i'i kaashikihkentamaasotc. Miihsh i'imaa tepwe cioncinikakiihtaawentank.

¹⁹ I'we aaniihsh omaa ahkiink kaaishinamowaatc cikakiihtaawaninik, mii 'iwe eshinank Kishemanitoo ehkakiipaataninik. Aaniihsh o'owe ishipii'ikaate: “Ikiwe okakiihtaawisiik wiinawaa ko owayeshimiwewiniwaank okashitahsonikowaan Kishemanitoon.”

²⁰ Kaye ishipii'ikaate: “KaaTipenciketc okihkentamawaa' onaanaakatawentamowinini ini okakiihtaawisii', ekaa kekoon e'inwaatehsininik.”

²¹ Keko wiin awiya okamamiihkwaatansiin i'iwe kekashkihtootc pemaatisitc. Aasha kahkina kekoon kimiinikoom:

²² Pwaal, Ahpwaalahs, Piitar, o'o noonkom ahkiink kaa‑ayaak, pimaatisiwin, nipowin, i'iwe kaye noonkom kaani‑ishiwepahk, niikaanaya'ii kaye keishiwepahk, kahkina kekoon kitipentaanaawaa.

²³ Kiinawaa tahsh kitipenimikowaa Christ, shikwa Christ wiin Kishemanitoon otipenimikoon.