1 ᑲᕒᐃᑎᔭᓇᒃ 16 - Ojibwe Kihcimasina'ikan

Ewii'maamawi pakitinikewaatc ciwiici'aawaatc otepwehtamoo'

¹ Shikwa 'iwe ehtashincikaatek ewii'maamawi pakitinikenk ciwiici'imintc Kishemanitoo opimaatisiima' eshinoontehsenitc Cootiiya (Judea) ahkiink kaa‑ayaanitc: i'iwe hsa kaakii'ishi kihkino'amawakwaa pepahkaan kaaishimaawaci'itiwaatc otepwehtamook Kalehshiya (Galatia) ahkiink, mii'iwe kekiinawaa citootamek.

² Entahso anami'ekiishikahk kaatahsopeshikoyek pahkaan ishiahsihk pankii kishooniyaamiwaa. Aaniin iko awiya eshikashkihcikekwen cimanaaci'aatc, ekaa memwehc cimaawacihcikehsiwek ahpii takohshinaan.

³ Ahpii tahsh takohshinaan, awenenak iko kekwayahkwenimekwaa ninkamiinaak nintooshipii'ikewin ciwiintenik eshiopapaamisiwiniwaatc. Miihsh ninkaishinisha'waak Ceroosalamink (Jerusalem) ci‑ishiwitoowaatc kikishewaatisiwi pakitinikewiniwaa.

⁴ Kiishpin tahsh keniin na'inaakwahk ci‑ishaayaan ninkaniwiiciiwaak.

Aaniin Pwaal kaa'ishionentank waa'ishipapaamiayaatc

⁵ Piciinak itahsh kikapiotihsininim paanimaa kiishaapooshkaayaan Maahsitooniyaawahkiink (Macedonia). Mii aaniihsh weti enentamaan Maahsitooniyaawahkiink cianipimiayaayaan.

⁶ Maakishaa ishihsek kikawiiciyayaamininim, maakishaa kaye citashipipoonihshiyaan, miitahsh i'i ahpii ciwiici'iyek aanti hsa ko keishaayaan.

⁷ Kaawiin nintinentansii ehta cipimimekweyaapaminakook. Nawac nintinentaan kinweshiihsh ciwiiciyayaaminakook, kiishpin ishipakitinamawitc kaaTipenciketc.

⁸ Keyaapi ahkawe o'omaa ninka‑ayayaa Ehpihsahsink (Ephesus) piinihsh iko aniocihcihsek Pentikwaastiwi kiishikan (Pentecost).

⁹ Aaniihsh inahte keyaapi 'omaa ehpaahkihsink niipiwa' cikashkihtooyaan kaakihci‑inentaakwahkin. Niipiwa' itahsh awiya ayaawak ehkakwekipishkawiwaatc.

¹⁰ Kiishpin i'imaa pi‑ishitakohshink a'a Timahti (Timothy) kaashiayaayek, kakweminowiici'ihk ekaa cisekisihsik. Aaniihsh taapishkoo kaye niin eshianohkawak kaaTipenciketc, kaye wiin tahsh otanohkawaan a'a Timahti.

¹¹ Kaawiin otaa‑aanwaapamikohsiin awiyan. Wiici'ihk itahsh, cinionciminomaacaatc cipiotihshitc miinawaa. Aaniihsh nimpii'aa cipiwiiciiwikotc i'i otepwehtamoo' kaawiihpiishaanitc.

¹² A'awe tahsh kiicihkiweyinaan Apwaalahs (Apollos) kaainintc, niipiwa'aank nintaanakii'inaa ciniwaapaminek ciniwiiciiwaatc kotak wiicihkiweyimaa', kaawiin tahsh kanake mahshi inentansii noonkom ci‑ishaatc. Aaniin ihsa ko ahpii ishina'ihsek, taishaa.

Miihsh ini ishkwaac otihkitowinan

¹³ Ahshawaapiyohk, mashkawikaapawiyohk tepwehtamowinink, ahpane cisoonki‑ininiiwiyek. Mashkawisiik!

¹⁴ Kahkina kekoon saaki'itiwinink ishitootamok.

¹⁵ Niiciotepwehtamook, kekoon kiwiihpakohsenimininim. Kikihkenimaawaa Istehpanahs (Stephanas) kaye owaahkaa'ikanink kaawiicitaamaatc. Miiwakiki niikaan kaakiihtashi kwehkaatisiwaatc i'imaa Ahkeyaawahkiink (Achaia), shikwa weweni ekii'inahsitisowaatc e'wiici'aawaatc i'i Kishemanitoo opimaatisiima'.

¹⁶ Kinantawenimininim ciniikaanakimekwaa cipisintawekwaa okoweniwak tino, kaye kahkina awiya' kaawiitanohkiimikowaatc e'ishipamiihtaakenitc.

¹⁷ Nintooncina'entam ekiihpiotihshiwaatc Istehpanahs kaye Pwaarcanetahs (Fortunatus) kaye Ahkeyihkahs (Achaicus). Kikii'naapishkaakowaak o'omaa e'ayaahsiwek.

¹⁸ Ninkiih kishishawisiishkaakook mii peshikwan iko kekiinawaa kaakii'ishihcike'inekwaa. Kitaakihkenimaawaak oko kaatinowiwaatc.

¹⁹ Kipooshoo'ikowaak otepwehtamook pepahkaan eshimaawaci'itiwaatc Eshaawahkiink (Asia). Pooshoo kaye kitikowaak Ahkwila (Aquila) kaye Parihsila (Priscilla) kaye iki 'omaa owaahkaa'ikaniwaank kaatashimaawaci'itiwaatc otepwehtamook. KaaTipencikenitc kitishiahpi⁠pooshoo'ikowaak.

²⁰ Kaye kahkina o'omaa kaa‑ayaawaatc owiicihkiweyimaak kewiinawaa kipooshoo'ikowaak. Otepwehtamook anami'eociimihkwak. Kiipooshoo'ekwaa, mii'i nahke ishipooshoo'itik.

²¹ Niin Pwaal (Paul) kipooshoo'ininim, niin tipinawe nininciink e'oshipii'amaan.

²² Awenen hsa ko siyaaki'aahsik ini kaaTipencikenitc, taicikaaso cinihshiwanaatisitc! “Marana taa!” – NinTipencikeminaan, wiihpitakohshinin!

²³ Maano okishewaatisiwin a'a kaaTipeniminank Ciisahs Christ kikawiiciiwikowaam.

²⁴ Kahkina kiinawaa ninsaaki'iwewin kikawiihtashi wiiciiwikom e'ishimaamawi wiiciintiyank i'imaa Christ Ciisahsonk.