1 ᑲᕒᐃᑎᔭᓇᒃ 13 - Ojibwe Kihcimasina'ikan

Eshinaakwahk Saaki'iwewin

¹ Aanawiin kashkihtooyaan pepahkaan kaaishikiishwewaatc ininiwak kaye encalak, kiishpin itahsh ekaa saaki'iwehsiwaan, mii anihshaa cimihci naanoontaakosiyaan. Taapishkoo kamihci paahpaawaapihka'ikaatek kaye e'mihci pahpahsweweyaapihkihsek e'wanishkwewehtaakwahkin taainentaakwan ninkakitowin.

² Maakishaa kaye ayaayaan miinikoowisiwin cikanootamawak Kishemanitoo, maakishaa kaye kahkina kekoon kihkentamowin ayaayaan, kaye kahkina kekoonan cioncinihsitohtamaan ekaa mahshi kaakihkentaakwahsinokin, kaye ehtepihseyaan tepweyentamowin cikanootamaan waciwan ciaantahtekin; kahkina ini aanakashkihtooyaan, kiishpin tahsh ekaa saaki'iwehsiwaan, kaawiin iinsan kekoon nintaainaapatisihsii.

³ Kaye kahkina aana maamaata'oohkiiyaan nintipinawewisiwin, pooshke niwiiyaw pakitinamaan cicaakisikaatek, kiishpin tahsh saaki'iwehsiwaan kaawiin kekoon i'imaa ninkaontinansiin.

⁴ Saaki'iwetc awiya tashashiipentam, takishewaatisi. Kaawiin okaontenimaahsiin awiyan. Kaawiin mamiihkwaanitisohsii, kaawiin kaye ishpenintisohsii.

⁵ Saaki'iwetc awiya tamanaa maashiwaapanta'iwe. Kaawiin niikaanenintisohsii, kaawiin wiipa nishkaatisihsii. Kaawiin opapaamentansiin kekoon e'ishihcike'intc.

⁶ A'a siyaaki'iwetc kaawiin onciminwentansii awiyan e'macihcikenitc. Nawac itahsh onciminwentam i'i tepwewin ehtoocikaatenik.

⁷ Kaawiin taoncipakiciihsii. Kapeaya'ii tepweyentam, mashkawiahpenimo, pishihshik iko mashkawentam.

⁸ Kaawiin wiihkaa taishkwaahsehsinoon i'i saaki'iwewin. Aaninta anaishimiinintwaa keishikanoocikehtamawaawaatc Kishemanitoon, paanimaa tahsh tapooniayaa 'iwe ishikiikitowin. Aaninta kaye pahkaanikiishwewin e'miinintwaa, paanimaa ahpii tapoonikiishwem. Aaninta kihkentamowin aana ayaawaatc, paanimaa tanakacikaate 'iwe noonkom kaakihkentaakwahk.

⁹ O'owe aaniihsh noonkom kaakihkentamank, pankii ehta 'iwe kikihkentaamin. Shikwa aanawiin ishimiinikooyank Kishemanitoo ehkanoocikehtamawank, pankii ehta kiwiintaamin otinencikewin.

¹⁰ Ahpii tahsh piocihcihsek i'i kaa ahpiihci misiweayaak, kaawiin keyaapi tanaakwahsinoon i'iwe pankii kaa ayaak.

¹¹ Ahpii kiiapinoonciishiwiyaampaan, apinoonciishink ninkii'ishikakit, ninkii'ishinam, ninkii'inentam. Paanimaa tahsh ekiihkihci‑ininiiwiyaan, aasha ninkii'nakataan nintapinoonciishiwi aayintiwin.

¹² I'iwe noonkom kaawaapantamank taapishkoo waapamonink e'mihcipawinaakwahk kitishinaamin. Piciinak itahsh ocihcihsek, kwayahk iko pehsho kikawaapamaanaan. Mekwaa piko o'o ahpii pankii ehta nintishikihkentam. Paanimaa tahsh ahpii ninkamisiwe kihkentam taapishkoo Kishemanitoo kaaishi⁠shaapo⁠kihkikenimihshitc.

¹³ Mekwaa tahsh ayaawan ono nihsin ekaa keishkwaahsehsinokin: tepweyentamowin, ahpenimowin, saaki'iwewin. I'iwe tahsh saaki'iwewin maawac kihci‑inentaakwan.